Bayağı müğənniləri “top artist” edib trendə salanlar

Yadıma gəlir, ölkəmizin tanınmış, hörmətli bəstəkarlarından biri ara müğənnilərin hələ yeni-yeni ortalığa çıxmağa başladığı zamanda həmin dəstənin üzvünü öz adı ilə tərif etdi. O isə hazırda dünyadan köçmüş sənətkara gözünü ağardaraq tələb tonu ilə “mənə bir daha ara müğənnisi münasibəti göstərməyin!” nidasını sərgilədi. Mərhum bəstəkarımız isə abırına qısılıb pərt siması ilə susdu.

Və beləliklə, bayağı müğənnilərin səltənətə çıxaraq başlarına tac qoyulduğu məlum oldu.

Hazırda günümüzün trendlərinə çevriliblər, bununla fəxr edirlər və efirlərə qonaq kimi dəvət olunmaqdan qürur duyurlar. Çünki onlara tələbat var və günümüzün qəhrəmanlarıdırlar.

Ötən gün bu sarıdan olan musiqili meyxana ustadlarından biri həmkarı Namiq Qaraçuxurlunun ünvanına əda ilə atmacalar atdı. Sosial şəbəkədə paylaşılan videonun rəy bölməsində ara müğənnilərə layiq olduğunu deyil, artıq qiyməti verən insanlarımızın arasında nə yaxşı ki, ona narazılıqlarını ifadə etdilər. Hələ də ağı qaradan ayıra bilənlərin mövcudluğu ən azından ümidvericidir. Köhnə paltarların yenidən dəbə çevrildiyini nəzərə alsaq, belə münasibəti görmək nə zamansa sənətkarlara geniş kütlənin yenə də qayıdacağına inam verir.

Namiq Qaraçuxurlu ilə uzaqdan-yaxından heç bir tanışlığım yoxdur, sadəcə, kimin kim olduğunu bildirməkdə fayda var. Xatırlayıram ki, yeni populyarlıq qazandığı bir dövrdə məhəlləmizdəki həyətlərin birinə məclisə gələcəyi gözlənilirdi. Böyükdən-kiçiyə hamı həyəcanla gözdə-qulaqda idi. Məyusluq var idi ki, gəlməyə bilər, dəqiq deyildi. Amma necə deyərlər, həmin o gözlənilən an gəldi və bir çox insan tanımadığı həmin məclisə axışaraq onunla şəkil çəkdirməyə başladı. İnsanlar onu görməklə, şəkil çəkdirməklə, saniyəlik ünsiyyətə girməklə xoşbəxt olurdu.

Fəaliyyəti dövründə isə heç zaman bayağı müğənnilərlə duet oxuduğunu və bayağılığı təbliğ etdiyini görmədim. Həmçinin cəmiyyətə səviyyəsiz müğənni ərməğan etdiyinin də şahidi olmadım. Namiq meyxananı adam içinə çıxardı, lokal tin tədbirlərindən geniş auditoriyaya daşıdı, özü böyük səhnələrdə yer aldı. Nə zamansa meyxananın belə hörmətli, izzətli olacağını görmək bəlkə də bir çox meyxanaçının xəyalı olub. Xəyalları gerçəkləşdirmək, bu gün meyxanaçıların trendlərə düşməsinə yol açmaq da bir növ onun günahıdır bəlkə. Buna görə də Namiqi tale cəzalandırır, yuxarıdakı şəxs özünü musiqili meyxananın əsas fiqurlarından, hətta Qaraçuxurludan öndə hesab edir və həmkarına “bir cür artistdir” deyir. Axı sənin nəyinə lazım idi ki, deyişmələrdə bir-birinin ünvanına təhqir, hətta ağır söyüş söyən insanların efirdə kiməsə ağıl qoymasına rəvac verəsən?! Üstəlik, meyxanaya görə sinəni sipər edəsən, bu sahədəki neqativ hallara görə sual yağışına tutulasan və meyxananı səviyyəli tədbirlərin bir hissəsinə çevirəsən. Ona qədər meyxana problemləri dar çərçivədə, məhəlli qaydada həllini tapırdı.

Bayağı müğənniləri top siyahıya salan, mədəniyyətin nə yazıq ki, bir parçasına çevirməyi bacaran şəxs bu gün meyxanaçı Namiqi topa tutur.

İnanın ki, dərdim Namiq deyil, sənətkarlara verilən qiymət, büzülən ağızdır. Kədərli cümlələr “kaş”la başlayır. Amma kaş ki insanlarımız kimlərə qiymət verib ucaltdığının, populyarlaşdırıb hörmətli etdiyinin fərqinə varardı. Kaş ki məclislərdə sənətçiləri rövnəqləndirdikləri zaman düzgün seçim etməyi bacarardılar, sonunun nə ilə nəticələnəcəyini dərk edərdilər.

Biz şahidik ki, bəzi sənətçilər dəbə minəndən sonra onu qaldıran xalqla nəinki hesablaşır, hətta onları hiddətləndirəcək çıxışları ilə gündəmə gəlir. Heç “mık” da deyə bilmirlər, çünki tanınmışa çevrilən müğənninin auditoriyası geniş, onu dinləyən fərdlər isə elə fərdliyində qalıb yerində dilinin altında mızıldamaqdan başqa çarələri olmayanlardır. Eləcə yerlərində yaralı ilan kimi qıvrılırlar.

Düşünün, xanımlar və cənablar, bu, əslində, özünə hörmət haqda düşünməkdir.

P.S.: Belə hallardan sonra böyük sənətkarlar haqqında yazaraq mövzuya aydınlıq gətirmək tamamilə yersizdir. Bir neçə dəfə görkəmli incəsənət xadimlərinin adlarını çəkərək yeni nəslin nümayəndələrindən bu adların onlar üçün nə ifadə etdiyini soruşmuşam. Bilməyiblər. Uzaqlardan yox, elə yaxınlardan danışmışam, tanımayıblar.

Samir Mirzə
Ölkə.Az