"XOXAN" təqdim olundu

"Biz bilirik ki, müəyyən səhvlərimiz də var. Baxın, tapın onları və bizi tənqid edin. Bizə lazım olan da elə budur"

Bu gün saat 19:00-da Nizami Kino Mərkəzində xeyli vaxtdır ki, yerli tamaşaçılar tərəfindən gözlənilən "Xoxan" filminin təqdimat mərasimi keçirilib. Komediya janrında çəkilən filmin təqdimatında yaradıcı heyətlə yanaşı, həm də sənət aləminin bir çox tanınmış simaları və media nümayəndələri iştirak

"Xoxan" “Mozart Media Group” və “CNF production”, “PicMus” və “Marshall” yaradıcı birliklərin birgə məhsuludur. Filmin özəl cəhətlərindən biri isə "Xoxan" komediyasının dünya standartlarına cavab verən, eyni zamanda bütün ölkə kinoteatrlarında yayımlanacaq ilk özəl Azərbaycan filmi olmasıdır.

"Xoxan"-ın nümayişindən sonra səhnəyə çıxan yaradıcı heyətin üzvləri hər kəsi Azərbaycan kino sahəsinə verdikləri dəstəyə görə təşəkkürlərini bildiriblər.

Ekran əsərinin prodüseri Zaur Mirzəzadə çıxış edərək bildirib ki, filmi istehsal edən prodüserlərin əsas məqsədi milli kinonun inkişafına təkan vermək və regionlarda kinoya olan marağı artırmaqdır.

"Biz bilirik ki, müəyyən səhvlərimiz də var. Baxın, tapın onları və bizi tənqid edin. Bizə lazım olan da elə budur", - deyə Zaur Mirzəzadə qeyd edib.

Daha sonra tədbir mətbuat konfransı ilə davam edib. Xatırladaq ki, "Xoxan" filmində baş rollarda Fərda Amin və Elməddin Cəfərov, həmçinin Azərbaycan Respublikasının əməkdar artisti Ələsgər Məmmədoğlu, bir çox TV layihələrdən tanıdığımız Şəhriyar Əbilov, sosial şəbəkələrdən məşhurlaşan Aynur Hüseyn oynayıb. Filmdə "Xoxan" obrazı gənc aktrisa Nigar İbrahimovaya həvalə olunub. 23 gün ərzində çox əyləncəli şəkildə çəkilən filmin rejissoru Samir Kərimoğludur, baş prodüserləri Orxan Mərdan və Zaur Mirzəzadədir. 11 dekabrdan "Xoxan"-ı ölkənin bütün kinoteatrlarında izləyə biləcəksiniz.

Təqdimat mərasimindən bəzi görüntüləri sizlərə təqdim edirik: