Aygün Bəylər: "Qadın paltarında narahat oluram"

Tanınmış xanəndə, əməkdar artist Aygün Bəylər son zamanlar mətbuatda dərc edilən fotoları barədə də danışıb.

Xanəndə "Ölkə.Az"ın əməkdaşıyla söhbətində bildirib ki, qadın geyimlərində fotosessiya etdirmək təklifi ona dostları və tamaşaçılarından gəlib:

"Dostlarım, tamaşaçılar dedilər ki, 25 ildir sizi eyni görkəmdə görürük. Dedim ki, əgər xalq istəyirsə, şəkil çəkdirmək üçün qadın paltarı geyinərəm. Amma mən o geyimdə konsert oxuya bilmərəm, narahat oluram. On iki il əvvəl qəzaya düşmüşəm, ayaqlarım dikdaban ayaqqabının üstündə qala bilmir. Qadın paltarı geyinəndə çox narahat oluram, on beş dəqiqə oxuyandan sonra üzümün makiyajı üstümə axıb tökülür. Əgər xalq üçün yaşayıramsa və xalq məni qadın paltarında görmək istəyirsə, canları sağ olsun, qoy belə də geyinək. Yəqin nə vaxtsa o geyimdən də doyarlar (gülür)".

Xanəndə Azərbaycan muğamına yeniliklər gətirmək istədiyini söyləyib:

"O qədər daxili problemlərim var ki. Çox böyük layihə etmək istəyirəm. Musiqimizə şərq aləmində olan yeni notlar gətirmək, məktəb açmaq istəyirəm. Mən anadangəlmə musiqiçiyəm".

Qeyd edək ki, A.Bəylər bir neçə gün öncə Birinci Vitse-prezident Mehriban Əliyevaya "Mehribani" adlı muğam dəstgahı həsr etdiyini bildirib.

İntiqam VALEHOĞLU
Ölkə.Az