\"2015-ci ildə mən Qar qız idim, Əlikram Bayramov Şaxta Baba\"

Sosial şəbəkələr vasitəsilə tanınmış müğənni Maral Tahirqızı "Ölkə.Az"-ın və oxucularımızın suallarını cavablandırıb.

- Maral xanım, bir aydan aydan artıqdır ki, həbsdən azad olunmusunuz. Adaptasiya olunmaqda çətinlik çəkmirsiniz ki?

- Elə bir çətinliyim olmadı. Çünki həbsxanada da insanlar içərisindəydim.

- Bəs yadırğadığınız nələr var idi?

- Bəzi şeyləri yadırğamışdım. Evdə nələrinsə yerini unutmuşdum. Ancaq indi hər şey yaxşıdır. 

- İndi azadlığın qədrini daha çox bilirsinizmi?

- Azadlıq hər zaman gözəldir. Ancaq düz qeyd etdiniz ki, indi azadlığımın qədrini daha çox bilirəm. İçəridə də müxtəlif insanlar var. Adam var ki təsadüf cinayət törədib. Adam da var ki, yüngül maddəylə gəlib, amma həmin maddə də onun üçün azdır. Orada əsl cinayətkarlar da var.

- Fədayə Laçının həbs olunduğu ilk günlərdə mətbuatda sizin adınızdan açıqlamalar yazılırdı. Həmin fikirlər sizə məxsus idi, yoxsa adınızdan yazırdılar?

- Bəli, məndən soruşmuşdular. Demişdim ki, Fədayə xanım bacarıqlıdır. Bacarıqsız deyil ki ona nəyisə başa salasan.

- Əsas tövsiyyəniz nə olmuşdu? Hər halda ondan yaşda da böyüksüz, həbsxana təcrübəniz də daha çoxdur.

- Adam var ki, iyirmi yaşı var, məni suya susuz aparar, susuz da gətirər. 

- Tövsiyyənizi bilmək istərdim...

- Özünün müəyyən yaşı, böyük oğlu var. İçəridə bacarıq lazımdır ki, hamıyla yola gedəsən. Utanmaq, çəkinmək olmaz. Orada elə insanlar var idi ki, sanki həbsxanada böyümüşdülər. Yəni, o qədər sərbəst idilər. 

- Sizi "Facebook" tanıtmışdı, amma deyəsən bu sosial şəbəkədən istifadə etmirsiniz.

- Səhifəmə kimsə paxıllıqdan güclü virus atmışdı. Proqramçı gətirdim, təmizlədi, xeyri olmadı. 

- "Facebook"da intim xarakterli videolara baxanda profildə problem yaranır, virus düşür. Bəlkə bilmədən baxmısız, virus düşüb?

- Həmin gün yüzdən artıq dostluq qəbul etmişdim. Beynim yoruldu, özümə söz verdim ki, daha dostluq qəbul etməyəcəyəm. Bir də gördüm Firuz adlı kimsə mənə "marqat" eləyir ki, onu dostluğa qəbul edim. Həmin dostluğu qəbul edəndə gördüm ki, səhifəm bağlanır (gülür). 

- "Instagram" səhifəsini ondan sonra açdınız?

- "Instagram"ı mənə bir jurnalist açıb. 

- Sosial şəbəkədən sizə evlilik təklifi edənlər olur?

- Elə şeylər olur, amma əhəmiyyət vermirəm. Son vaxtlar yazılan mesajları açıb oxumuram. Gözucu baxıram ki, məktublarda güllər gəlir. Yazırdım ki, təşəkkür edirəm.

- Son dəfə müğənni qismində nə vaxt toyda olmusunuz?

- (düşünür) 2015-ci ildən sonra toyda olmamışam.

- Azərbaycandan kənarda toyda olmusunuz?

- Türkiyəyə qonaq getmişdim, xahiş etdilər ki, toylarında oxuyum. Amma bildirdim ki, qala bilməyəcəm. 

- Toy mövsümüdür, təkliflər alırsınızmı?

- Telefon vasitəsilə təkliflər olur. Amma tanımadığıma, niyə zəng vurduğunu bilmədiyimə görə imtina edirəm.

- Məbləğ deyirsiniz?

- Qiymət demirəm.

- Bəs 2015-ci ilə qədər neçəyə gedirdiniz?

- Mən toylara çox getməmişəm, daha çox konsertlərdə oxumuşam. Türkiyənin İzmir şəhərində konsertlərdə iştirak etmişəm. 

- Orada solo konsert vermisiniz?

- Bəli, istəyiblər. Konsertlərdən videolarım var. İzmirin televiziyasında Əsnay adlı aparıcı var. Onun qonağı olmuşam. 

- Yeni repertuar hazırlayırsınızmı?

- Hazırlamağa başlamışam.

- Bildirmisiniz ki, prodüser Tolik sizə iş birliyi təklif edib.

- Bəli, biz qonşu olmuşuq. Təzəlikcə mənə təklif elədi ki, işləyək, mən də etiraz etmədim. Çünki tanıdığım adamdır. 

Söhbətimizin bu yerində sosial şəbəkədən Maral Tahirqızına verilən suallar səsləndirilir.

- Ceyhun Haşımov yazır ki, Flora Kərimova ondan dərs almaq istəsə, qəbul edərdi?

- Mən Flora Kərimovadan dərs ala bilərəm.

- Zümrüd Cavadova soruşur ki, stilisti kimdir? Xüsusən saç düzümünüzü bəyənir.

- "28 May" tərəfdə bir salon var, ora gedirəm. Stilistilərdən Anarı çox bəyənirəm. 

- Mümkündürmü ki, gələcəkdə Anar Ağakişiyevlə çalışasınız?

- Ola bilər.

- Amma o çox bahalı stilistdir.

- Özüylə danışmışam, deyib ki, istəsən pulsuz da iş görərəm. Mən də dedim ki, pulsuz gəlmək istəmirəm.

- Həmkarım Rövşən Ziya mənə irad bildirir ki, belə insanları niyə cəmiyyətə sırımağa çalışırsınız.  Fikrinizcə, mən sizi kiməsə sırıyıram?

- Səsim, sənətim var. Bəlkə o kimlərisə məndən üstün tutur, şəxsi işidir. 

- Azərbaycanda hansı filmə çəkilmək istərdiniz?

- Xasiyyətimə uyğun film olsa, çəkilərəm.

- Çəkiləcək yox, çəkilmiş filmləri soruşuram.

- Elə bir fikrim olmayıb. Amma "Ögey ana" filmində Nəcibə Məlikovanın rolunu bəyənirəm.

- Məsələn, "Təhminə" filmində hansı rola çəkilmək istərdiniz? Təhminəni canlandırmaq necə olardı?

- Elə filmdə çəkilmək istəməzdim. 

- Pis filmdir ki?

- Yaxşı filmdir, həm də mən aktrisa deyiləm. Amma Fəxrəddin Manafovla başqa filmdə tərəf müqabilə olmaq istəyərdim. 

- Bəs Təhminə roluyla bağlı hansı epizodlar çıxarılsaydı, çəkilmək istərdiniz?

- Sevilən filmdir. Amma o xanım açıq-saçıq səhnələr oynayır. Mənə elə gəlir ki, o xanım Azərbaycandan deyil.
 
- Son vaxtlar sənət adamlarının intim görüntüləri yayılır. Bir neçə gün əvvəl sizinlə bağlı da bir görüntü yayımlanmışdı...

- O mən deyiləm. Görüntüdəki adam Finlandiya adamına oxşayır.

- Yaşınızı heç vaxt açıqlamırsız...

- Yaşımı açıqlamağı xoşlamıram.

- Yenidən sosial şəbəkədən sizə verilən sualları oxuyum.  Solo konsertinizin vaxtını soruşurlar.

- Zəngin repertuarım olandan sonra solo konsert verəcəyəm.

- Soruşulur ki, Şakira duet təklif etsə, reaksiyanız necə olardı?

- Şakira xanımdan müsahibə götürüblər. Jurnalist soruşur ki, siz Maral xanımla duet oxuyarsız?

- Şakira nə cavab verir?

- İngiliscə danışır. Deyir, sintez etmək istərdim.

- Siz Şakiraya cavab vermisiniz?

- Şakirayla söhbətimiz olmayıb. Amma xarici mahnı oxuya bilsəm, qəbul edərdim.

- Şakira da zil səsli müğənnidir. Bəlkə qorxursunuz ki, səsiniz çatmaz?

- Yox, dil məsələsi var. 

- Eşitdiyimə görə Beyonce ilə də rəfiqəlik edirsiniz və sosial şəbəkədən yazışırsınız...

- O yazmışdı, vaxt çatdırıb cavab verə bilmədim. Amma Şakira mən barədə müsahibə vermişdi.

- Sevinc Süleymanova soruşur ki, görəsən o özü başa düşmədi ki, aparıcı Zaur onu lağa qoyur? Yəqin ki Zaur Kamalı nəzərdə tuturlar...

- Mənim nəyimi lağa qoyacaq ki? 

- Yəni özünüz belə bir şey hiss etdiniz?

- Verilişdir də, aparır. 

- Elza Seyidcahanın oxuduqlarınızı oxunazsınız demişdiniz. Yazırlar ki, o gözəl musiqiçidir, əsərlər yaradır. Sizin ona çatmağınıza çox var deyirlər...

- Şəxsi fikirdi. 

- Elza Seyidcahanın səsi zil olar, yoxsa sizin?

- Yəqin ki, mənim səsim zil olar.

- Nə vaxt hiss etdiniz ki, sizi tanıyırlar?

- Müğənni olmamışdan əvvəl də məşhur idim. Nərimanovda ərzaq dükanım vardı. Sahə müvəkkilimiz dükanımın yanından keçəndə maraqlı hadisə danışdı. Dedi ki, bir nəfərə olduğum ərazini başa salmaq istəyirdim. Həmin ərazidə də məşhur kafe və klinika vardı. O adama klinikanın adını dedim, tanımadı, kafenin yerini söylədim, yenə tanımadı. Axırda dedim ki, Maral xanımın dükanının yanındayam, ordan dönərsən. Dedi ki, hə, indi tanıdım (gülür). Fabrikdə işləyəndə də hiss edirdim ki, hamı məni tanıyır. Deyirdim necə gedim ki, adamlar məni tanımasın.

- Dekabr ayı olsa da, müsahibəyə də gün eynəyi ilə gəlmişdiniz...

- Bəzən eynəklə də tanıyırlar. İstəmirəm tanısınlar, görsünlər.

- Geyimlərinizi kim seçir?

- Özüm. 

- Ən bahalı geyiminiz neçəyədir?

- Deyə bilmərəm ki, brilyantdan paltarım var. Bahalı geyim brilyantdan olar. Alanda keyfiyyətli paltar alıram.

- Hazırda əyninizdə olan geyimin qiyməti nə qədərdi?

- Vallah hesablamıram. "Kaçestvenni" (keyfiyyətli demək istəyir-red.)  malın, "kaçestvenni" də qiyməti olur. 

- Tərlan Talıbov soruşur ki, yenidən dünyaya gəlsəydi, bu sənəti seçərdi?

- Bəli, mən uşaqlıqdan bu sənəti seçmişəm. İqtisadiyyatı bitirmişəm, nazirlikdə işləmişəm. Buna baxmayaraq, müğənniliyə hər zaman meylim olub.

- Şərqiyyə Kərimi soruşur ki, "Alehandro"nu niyə o günə qoyub?

- Mən oxumaq istəmirəm, xahiş edirlər. 

- Pərəstişkarınız evlilik təklifi etsə, cavabınız nə olar?

- Öz yaşıma uyğun insan olmalıdır. Xoşuma gəlməsə, yox deyərəm.

- Ruhiyyə Fərəcova adlı istifadəçi sizdən müsahibə aldığıma görə məni qınayır...

- Məni hər kəs bəyənə bilməz, şəxsi fikridir.

- Sizi bəyənən çox olar, yoxsa bəyənməyən?

- Orada yüz nəfərin yazmağı xalqın mövqeyi deyil.

- Fatimə Hacıbəyli yazır ki, o, müəyyən yaşda olan qadındır. Hiss etmir ki, onu lağa qoyurlar?

- Aparıcı özünəməxsus nəsə edə bilər. Mən öz hərəkətimə cavabdehəm. İstəyir lağ eləsin, istəyir ciddi desin, özü bilər.

- Efirə çxımaq üçün xahiş etmisiniz?

- Heç vaxt. Bəzən xoşuma gəlməyən mövzular olanda getmirəm. 

- Qarşıdan yeni il gəlir. Qar qız obrazı həvalə edilsə, qəbul edərsiniz?

- İstəmərəm. Çünki qar qız 17 yaşlı qızdır.

- Bu harda yazılıb ki?

- Adı var axı. Şaxta baba və Qar qız. 

- Onda belə çıxır ki, sizin Qar qız olmağınız üçün personajın adını "Qar gəlin" qoymalıdırlar?

- Mən o yaş dövrünü keçmişəm. 2015-ci ildə Space tv-də Qar qız rolunu oynamışam. Əlikram Bayramov da şaxta baba idi. 

- Özünüzlə fotoaparat gəzdirirsiniz. Deyəsən telefonla çəkilən fotolara etibar etmirsiniz...

 

İntiqam VALEHOĞLU
Foto-Video: Vasif Həsənli