"Həmin aktrisaların etdiyi hərəkəti etsəydim, indi alnım açıq olmazdı"

- Zemfira xanım, sizi hamı "Dəli Kür" filminin Mələyi kimi tanıyır. Sənətə olan marağınız hardan qaynaqlanıb?

- Sənətə olan marağım lap uşaqlıqdandır. 3 yaşım var idi,  həmişə şeir deyirdim, mahnılar oxuyurdum. Bir qonşumuz var idi, soruşurdu ki, böyüyəndə nə olmaq istəyirsən? O dəqiqə cavab verirdim ki, əlbəttə ki, aktrisa. 10 illiyi bitirib, sənədlərimi Moskva Kinemotoqrafiya Universitetinə vermək istəyirdim. Nə anam, nə də atam mənə icazə vermədi. O, mənə dedi ki, sən başa düşmürsən ki, səhnənin arxası çox qorxuludur, mən qorxuram ki, sən orda itərsən. Hər dəfə teatr universitetinin qarşısından keçərkən ağlayırdım. Bir dəfə rəfiqəm dedi ki, gəl səni aparım Rahib müəllimin (O vaxtı İncəsənət Universitetinin rektoru) yanına. Qoy səni yoxlasın, bəlkə aktrisa oldun? Mən də o vaxtı evlənmişdim, artıq bir oğlum da var idi. Universitetə daxil olmaq üçün qabiliyyət imtahanı verməli idim. Məndən imtahan qəbul edən Adil İskəndərov dedi ki, "qızım, bizim səhnə sənin kimi aktrisalar üçün ağlayır, mütləq "kağız-kuğuzu"nu götür gəl universitetə". Atam icazə verməsə də, həyat yoldaşım aktrisa olmağıma icazə verdi.

- Mən bilirəm ki, siz bir müddət Gənc Tamaşaçılar Teatrında da çalışmısınız. Həmin teatra necə gəldiniz?

- Universiteti bitirəndən sonra mənim təyinatımı Gənc Tamaşaçılar Teatrına verdilər. Böyük məmnuniyyətlə, bu teatra gəldim. Artıq mənim həyat yoldaşım da rəhmətə getmişdi, bir oğlumla tək qalmışdım. Mənə bir-iki tamaşa verdilər oynadım, amma bu, məni qane etmirdi. Elə oldu ki, mən teatrdan çıxdım, radioda diktor kimi işə düzəldim.

- İlk filminizə nə vaxt çəkilmisiniz?

- Universitetdə oxuyanda "Torpaq, dəniz, od, səma" filmində artıq çəkilmişdim. Rejissor Hüseyn Seyidzadə məni o filmdə görüb,  "Dəli Kür" filminə dəvət etdi. Baxmayaraq ki, bu obrazın sınaq çəkilişinə 100-ə qədər aktrisa dəvət olunmuşdu, amma hamı məni təsdiqlədi.

- Obraza görə sizə qınaqlar oldu?

- Təbii ki, qınaqlar oldu. Çünki o zaman heç filmlərdə öpüşmək falan da yox idi. Cahandar ağa obrazını oynayan Ələddin Abbasov da bu cür səhnələri ehtiyatla oynayırdı. Bəzi səhnələrdə Cahandarlıqdan dönüb, Ələddin də olurdu (gülür).

- O vaxtı aktrisalara mane olanlar da az deyildi. Sizə də bu cür maneələr olmuşdu?

- Bəli, mane olmasaydılar, mən çox filmlərə çəkilə bilərdim. Səhnənin arxası çox qaranlıqdır, orda sən gərək sınmayasan, ləyaqətini saxlayasan. Mən neçə il kinostudiyada çalışdım, bir insan deyə bilməz ki, mən nəsə səhv addım atmışam. O vaxt kinostudiyada Cəmil Əlibəyov adında bir insan var idi, o mənim filmlərdə çəkilməyimə mane olurdu.

- Səbəb nə idi?

- Mən açıqlamaq istəmirəm, amma səbəbi çox böyük idi. Hətta o, məni kinostudiyadan bacarıqsız bir aktrisa kimi çıxarmaq istəyirdi. O zaman artıq Yusif Vəliyev də rəhmətə getmişdi. Ağladım dedim ki, mənim axı başqa sənətim yoxdur, siz necə məni kinostudiyadan çıxara bilərsiniz? Həsən Turabov, Eldar Quliyev və s. orda olsalar da durub məni müdafiə etmədilər. Çünki artıq Yusif Vəliyev yox idi. İş elə gətirdi ki, 90-cı il hadisələrinə görə kinostudiya bağlandı.

- Sonuncu dəfə hansı filmə çəkilmisiniz?

- Sonuncu dəfə 2015-ci ildə "Dmitrov küçəsi 86" filmində çəkilmişəm. Çəkildiyim filmlərin içərisində "Dantenin yubileyi" filmində oynadığım Anaxanım obrazı daha ürəyimə yatan idi. Mən "Dəli Kür" filmində elə də böyük aktrisalıq qabiliyyətimi göstərməmişəm.

- Ovaxtkı aktrisalarla ədavətiniz olub?

- Bəlkə də kiminsə mənimlə ədavəti olub, amma mənim yox. Mənim haqqımda eşidirdim, deyirdilər ki, "bezdarnıy aktrisa". Kiminsə yanında deyirdilər, onlar da gəlib mənə çatdırırdılar. Əgər vaxtında həmin aktrisaların etdiyi hərəkəti etsəydim, indi uşaqlarımın yanında alnım açıq olmazdı.

- Yusif müəllim sizə sənətdə dəstək olub?

- Bəli, dəstək idi, amma bəzi hallarda mane də olurdu. Yusifdən çəkinirdilər deyə məni filmlərə dəvət etmirdilər. O, biruzə verməsə də məni qısqanırdı. Yusif də mənim kimi sözü düzünü deyirdi, ona görə də onu filmlərə çəkmirdilər. O, hər bir obrazı oynaya bilərdi, amma Yusifdən bir aktyor kimi lazımınca istifadə etmədilər.

- Bildiyimə görə Tofiq Tağızadə sizi "Bağ mövsümü" filminə çəkmək istəməyib. Buna səbəb nə idi?

- Bəli, o, mən də daxil olmaqla 2 aktrisanı həmin rola çəkmək istəyirdi. Mən həmin aktrisaların adlarını çəkmək istəmirəm, çünki hər ikisi də istedadlı aktrisa idi. Mənə xəbər çatdırdılar ki, həmin aktrisa artıq Ağabacı roluna paltar seçimi edir. Həqiqətən də, çox pis oldum. Kinostudiyanın o vaxtkı direktorunun yanına gedib şikayət etdim. Ondan sonra Tofiq Tağızadə məni filmə çəkdi.

- Həmin çəkilişlərdə Leyla Şıxlinskaya ilə münasibətiniz necə idi?

- Leyla Şıxlinskaya ilə münasibətim yox idi. Mən qrim edirdim, o qrimə gecikmişdi. Gəlib əda ilə mənə dedi ki, "xanım bəlkə yeri boşaldasınız, mən də qrim edim". Dedim ki, buyurun. Qrim ustası dedi ki, o da sizin kimi aktrisadır, siz niyə onunla elə danışırsınız? Ondan sonra bildi ki, mən də aktrisayam.

Ölkə.Az