"Ay Brilliant"da Şəmi və Şöşü yoxdur

Bu gün “Bozbash pictures” komandası media nümayəndələrini bir araya yığaraq “Ay Brilliant” filminin təqdimatı ilə bağlı mətbuat konfransı keçirib.

Çəkilişləri Bakıda və Gürcüstanda reallaşan ekran işinin ssenari müəllifi və rejissoru Kənan M.M.-dir.

Filmlə bağlı məlumat verən aparıcı-aktyor İlkin Həsəni bunları deyib:

“Filmin ideyasını Kənan bizə təklif etmişdi. Ssenarinin yazılması üçün Samit Ağayev və Ənvər Abbasova müraciət etdik. Beləliklə, üç nəfərin birgə işi nəticəsində “Ay Brilliant”ı çəkdik. İstəyirdik ki, filmi dekabrda tamaşaçılara təqdim edək. Amma həmin ay dostlarımızın “My name is İntiqam” və “Xoxan” filmləri ekranlara çıxdığına görə “Ay Brilliant”ın təqdimatını marta saxladıq”.
İlkin Həsəni növbəti filmlərin də çəkiləcəyini bildirib:

“Sevinirik ki, tamaşaçılar artıq kinoteatrlara gedirlər və yerli filmlərimizə maraq böyükdür. Biz dostlarımızın da uğuruna sevinirik. “Xoxan” və “My name is İntiqam” filmləri də uğur qazandı. Bu, bizim ilk işimizdir, sağ olsun sponsorlarımız, bizə kömək etdilər”.

İlkin Həsəni filmdə Şəmi və Şöşü obrazının olmayacağını da vurğulayıb: “150 min manata ərsəyə gələn filmin Şirin obrazının qaçma səhnəsi iki dəfəyə çəkilməli olub. Belə ki, yay ayında çəkilən kadrlar silindiyi üçün dekabrda həmin səhnə yenidən lentə alınıb. Filmin adının “Ay Brilliant” olmasına ən sonda mən qərar verdim. Kinonun soundtrekini isə reper Elşad Xose, meyxanaçı Namiq Qaraçuxurlu, gənc müğənni Boris Bayramov səsləndiriblər".

Filmlə bağlı təəssüratlarını bölüşən Kənan M.M çəkiliş zamanı uşaqların qəlbinə dəydiyi üçün üzrxahlıq edib. Filmdə “Bozbash pictures” komandası ilə yanaşı, tanınmış aktyor Şamil Süleymanlı də rol alıb. Aktyor filmə Kənan M.M-in dəvəti ilə gəldiyini bildirib:

“Mən Kənana “bacıoğlu” deyə müraciət edirəm. Əslində bir dayı kimi mən gənclərə kömək olmalıyam. O, məni nəinki “Bozbash”a, hətta dolma filminə də çağırsaydı, gedib çəkiləcəkdim. Bundan sonra o, mənə dilənçi rolu da versə, oynayacam. Çünki onun istedadına inanıram”.

Qeyd edək ki, filmin qalası martın 2-də baş tutacaq. Ekran işində "Bozbash pictures"in Fəlakəti - Elşən Orucov, Şirin - Nicat Rəhimov, Ağsaqqal - Azər Baxşəliyev, Şöşü - Ramil Babayev rol alıblar.

Axşam.az