Media "Maral xəbərləri"ni niyə tirajlayır?
Son günlər sosial şəbəkədə özünü “dünyanın ən zil səsli” müğənnisi kimi təqdim edən birini mediamız artıq ulduz səviyyəsinə çatdırıb. Bu tip insanları ulduz edən həmin media orqanları və bu orqanlarda çalışan jurnalistlər daha sonra cəmiyyəti səviyyəsizlikdə günahlandırır. Son günlər cəmiyyətə səviyyəsizlik aşılayan da mediamızdır, daha sonra cəmiyyəti səviyyəsilikdə günahlandıran da.
Bu məsələ ətrafında yaranmış ajiotajı Ölkə.Az-a tanınmış media eksperti Zeynal Məmmədli şərh edib:
"Xəbərin 4 cərəyanı var. Birincisi, çox vacib olan şeylərdir, bunu dövlət, qanunlar müəyyənləşdirir və bunu bütün cəmiyyət bilməlidir. İkincisi, cəmiyyət üçün çox vacib olan xəbərlərdir və bunu jurnalistlər özləri seçir, bu isə cəmiyyətin inkişafı üçün vacibdir. Üçüncüsü, cəmiyyət üçün maraqlı digər xəbərlərir ki, buna maqazin və digər xəbərlər daxildir. Dördüncü istiqamət isə hansısa bir tanınmamış simanı gündəmə gətirmək - əyləncə xaraketrli xəbər kimi hərdən ona da yer vermək olar. O biri üçünün olması şərti ilə dördüncü də olmalıdır. Zövqsüz, səviyyəsiz, bəzi insanları əhatə edən xəbərləri verməklə ciddi, cəmiyyət üçün vacib xəbərlərə ehtiyac yaranmasını saxlamaq lazımdır. Ancaq bizim mediada ilk üçlükdəki xəbərlər olmadıqda ancaq dördüncü tipli xəbərlər olduqda cəmiyyət kütlələşir. Səviyyəsiz insanların, səsi olmaya müğənnlilərin populyarlaşmasında media özü günahkardır. Media ilə yanaşı bütövlükdə biz də cəmiyyət olaraq günahkarıq.
Media ona görə günahkardır ki, hədəf auditoriyasının kimlərdən ibarət olduğunu, o hədəf auditoriyasına hansı xəbərləri çatdırmağı, media olaraq öz missiyasının nədən ibarət olduğunu bilmir. "Maral məsələsinə" gəldikdə isə bu tip şeylərdən gündəmi dəyişmək üçün istifadə edirlər. Gündəmdə cəmiyyət üçün, hakimiyyət üçün, siyasət üçün, kimlər üçünsə önəmli olan, ancaq onların özü üçün narahatlıq yaradacaq şeyləri diqqətdən yayındırmaq məqsədi ilə belə xəbərlər çox yayılır. Azərbaycan cəmiyyətində görsənir ki, cəmiyyətlə demokratik dialoqa nə hakimiyət tərəfindən, nə də müxalifət tərəfindən meyil var. Bütün bu durumlar cəmiyyəti bu vəziyyətə salır. Bütün dünyada medianın kommersiyalaşması gedir. Media artıq ticari bir vastəyə çevrilir. Media cəmiyyətin diqqqətinə təqdim etdiyin xəbərin ağına-bozuna belə baxmır. Hansı tip xəbərlərə maraq çoxdursa, o tip xəbərləri də verir. Ciddi media qrumları əslinə qalsa cəmiyətin zövqünü korlayan şeylərə qarşı mübarizə aparmalıdır, özü bunu tirajlamalı deyil. Medianın işi kütləni vətəndaşa, insana çevirmək olmalıdır. Biz hökümətin, cəmiyyətin və kütlənin arasında qalmışıq. Azərbaycan cəmiyyəti kütləyə çevrilib. Kütlə olan yerdə inkişaf olmur və kütləni idarə etmək daha asandır. Ya kökə verirsən ya da kötək vurursan. Bu gün cəmiyyətimizdə mediaya etibar ciddi şəkildə sarsılıb. Ona görə də media "Maral xəbərləri" ilə cəmiyyətin diqqətini əslində öz üzərinə çəkmək istəyir".
Səxavət Məmməd
Ölkə.az
