Hafiz Hacıyev: "Aşıq Ədalət rəqqasə Aytənə pis heç nə deməyib"

Müasir Müsavat Partiyasının sədri Hafiz Hacıyev aşıq Ədalətlə rəqqasə Aytən qalmaqalında birinciyə haqq qazandırıb.

Partiya sədri Ölkə.Az-a açıqlamasında bildirib ki, milli mədəniyyətimiz, milli qürurumuz baxımından, gələcəkdə insanlarımızın mənəviyyatının pozulmaması naminə aşıq Ədalət haqlıdır:

"Ona haqq qazandırıram. Bu dərəcədə açıq-saçıqlıq olmaz da. Hər şeyin bir həddi var. Mən rəqqasəni də başa düşürəm. o da pul qazanmaq, dolanmaq istəyir. Amma düzgün hərəkət deyil".

H.Hacıyev hesab edir ki, rəqqasə aşığı məhkəməyə verməklə yanlış addım atır:

"Aşıq Ədalət ona pis söz deməyib ki. Deyib ki, göbəyini xalqa göstərmə, ayıbdır. Aşıq deyir ki, o boyda ağsaqqalların, qarasaqqalların yanında sənin göbəyin heç kimə lazım deyil. İstəməzdim kimsə bu dərəcədə söyülsün. Rəqqası oynasın e, amma göbəyini göstərməsin".

Qeyd edək ki, Aşıq Ədalət "Səbəbkar" verilişinin çəkilişində rəqqasə Aytənin var-yoxunu söymüşdü

İntiqam VALEHOĞLU
Ölkə.Az