Səidə Sultan: \"Əlli yaşlı kişini bir-iki ay yola verib...\"

O, şou-biznesin sözü üzə deməyi bacaran azsaylı nümayəndələrindəndir.

Elə bəlkə bu səbəbdəndir ki, söhbətimizdə xeyli maraqlı məqamların üstü açıldı. Ona olunan "sponsor" təkliflərindən də danışdıq, illərlə dostluq etdiyi tanınmış sənətçiylə münasibətləri bitirməsindən də, digər maraqlı məqamlardan da. Beləliklə, Ölkə.Az müğənni Səidə Sultanla müsahibəni təqdim edir.

- Səidə xanım, öncə yaradıcılığınızdakı yeniliklərədn dnaışaq...

- İnşallah, yay aylarında yeni ritmik mahnılarımız olacaq. Həmçinin Space-də "Əsl şou" verilişinin aparıcısıyam.

- Bu, teleaparıcı kimi debütünüzdür. Nə jurnalist təhsiliniz yoxdur, nə aparıcı kimi təcrübəniz. Təklifi qəbul edərkən tərəddüd olmadı ki?

- Bunu mənə dostum, müğənni Elnur Məmmədov təklif etdi. Əvvəlcə dedim ki, qorxuram. Sonra gördüm olduğun kimi görünsən, səni qəbul edəcəklər. Çünki tamaşaçı səmimiyyəti sevir. Təbii ki, mən peşəkar aparıcı deyiləm. Sadəcə, müğənni olaraq öz ampluamda çıxış edirəm.

- Hər zaman sərt və əksər hallarda da həqiqət payı çox olan açıqlamalar edirsiniz. Bu açıqlamalardan sonra həmkarlarınızın sizə təzyiqi, təhdidi olurmu?

- Heç vaxt elə şeylə rastlaşmamışam. Belə şeylər mənə çatmır. Kimisə necə hədələmək olar?

- İndiyə qədər münasibətlərinizdə gərginlik olan insanlarla barışırmınızmı, yoxsa bircə dəfə küsürsünüz?

- Həyatımda elə insanlar var ki, 5-10 il dostluq etmişəm. Amma elə bir məqama çatmışıq ki, o dostluğu qırmışam.

- Səbəb?

- Çünki o insan məni insanlara yanlış təqdim edib, haqqımda pis fikir formalaşdırıb. Elə insanları həyatımdan silmişəm. Gərək dost dostu yaxşı təqdim eləsin.

- Sənət aləmində ən yaxın dostlarınız kimlərdi? Kərim Abasov və Niyam Səlamini bilirəm...

- Niyam Səlami, Elnur Məmmədov, Natəvan Həbibi, Xuraman Şuşalı, Xatirə İslam, Sərxan Kərəmoğluyla dostuq.

- Amma Kərimin adını çəkmədiniz.

- O barədə ümumiyyətlə danışmayaq. Olar? Onun artıq başqa dostları var (gülür).

- Belə çıxır ki, dostunuzu yeni dostlarına qısqanmısınız. Bilirəm ki, dost kimi çox yaxın olmusunuz.

- Kərim mənim düşmənim deyil, dost olmuşuq, yaxşı və pis günlərimiz olub.

- Bəs münasibətlərin davam etməsi üçün nə çatmadı?

- Bu artıq Kərimlə bizim öz işimizdir.

- Şou-biznesdə "öz işimiz" deyilən anlayış qalıbmı?

- Bu mövzuda geniş danışmaq fikrim yoxdur və mətbuatda bizim küsülü olmağımızın yazılamağını da istəmərəm. Sadəcə, dostumdan ayrılsam belə, gedib orda-burda ağır söhbətlər etmərəm.

- Ayrıldığınız dostlarınızdan belə sözlər deyənlər olub?

- Bakı balaca şəhərdi. İstədin-istəmədin adamın qulağına gəlib çatır. Biz bir-birimizin cikini də bilirik, bikini də. Əgər kimsə öz cikini görməyib, başqasının bikini açırsa, bu, doğru deyil.

- Sizcə, sənətçi ilə ailə quran şəxsinqazandıqları nə olur, itirdikləri nə? Çünki son zamanlar bu məsələ elə sənət adamlarının özləri arasında müzakirə mövzusudur.

- Müğənniylə ailə quran şəxs hazır olmalı, kiminlə evləndiyinin fərqinə varmalıdır.

- Müğənniyə qadağa qoymaq olmaz?

- Təbii ki, yoldaşıdırsa, qadağaları olmalıdır. Ümumiyyətlə, incəsənət adamlarının ruhu çox incədir. Biz sevilmək, əzizlənmək, təriflənmək istəyirik. Əgər bunlar olmadısa, qaçırıq.

- Artıq 32 yaşınız var. Belə başa düşdüm ki, indiyə qədər subay qalmağınızın səbəbi bu meyarlara uyğun birinin olmamasıdır.

- Evdə üç bacıyıq. Həmişə birinci elçi mənə gəlib. Anam deyir ki, ərə getsəydin, indi uşaqların məktəbdə oxuyurdu. Qismət deyilən bir şey var. Əgər Allah mənə ərə getməyi qismət edəcəksə, onu gec-tez mən yaşayacağam. Qismətimdə yoxdursa, nə etsəm də alınmayacaq. Gec olsun, amma ürəyim istəyən kimi olsun. Elə insanam ki, hər kişiyə ərə gedə bilmərəm.

- Sizə görə, yaş fərqi önəmlidir? Məsələn, 50, yaxud, 25 yaşlı insanla ailə qurmağınız mümkündürmü?

- Əlli yaşlı insanla yola gedəcəyimə inanmıram. Elə tip insanam ki, bir-iki ay yola verib, sonra qaça bilərəm. Heç vaxt da puluna görə göz yumub qalmaram. Kasıb olsun, mərd olsun.

- Dəfələrlə kasıb insanla ailə quran sənət nümayəndələri görmüşük ki, bəyənməyib tez də boşanıblar. Siz bu fikrinizdə nə dərəcədə səmimisiniz?

- Yaxın ətrafım necə xarakterimin olduğundan xəbərdardır. kasıb olsun, amma kişi olsun, qorxaq olmasın. Ruzini verən Allahdır.

- Ad və məktəb olaraq yetərincə tanınırsınız. Amma uzun müddətdir hansısa yaddaqalan layihəniz yoxdur.

- Axırıncı mahnım "Gecələr uzundur" olub ki, yetərincə yadda qalıb. Layihələrə gəlincə, nə qazanmışamsa, öz zəhmətimin hesabınadır. Pul buraxmaq istəyən də başqa şeylər təklif edib.

- Çox yaxşı bir məqama gəldik. Həyatınızda həm sponsor, həm sevgili qismində biri olmayıb?

- Heç vaxt.

- Məsələn, əvvəl, elə indi də belə bir "qayda" var idi. Şou proqrama düşmək istəyən müğənnilər restoran müdirləri ilə sevgili olmalıydılar.

- Bəli, razıyam.

- Sizə belə təkliflər olub?

- Yalandan deyə bilmərəm ki, olmayıb. Təbii ki, olub. Sənəti qoyaq kənara, hətta adi həyatda da olub. Mən elə şeyə gedən insan olmamışam. Soğan olsun, nəğd olsun. Heç vaxt belə şeylərə əyilə bilməmişəm.

- Bəs hazırda "hər şeyi özüm qazanmışam" deyib, "sponsor" gücünə gündəmdə olan sənətçilər çoxdurmu?

- O qədər...

İntiqam VALEHOĞLU
Ölkə.az