Nadir Qafarzadədən şok sözlər: \"Bu işlər Allahın yox, bəndənin əlindədir\"

Nadir Qafarzadə son günlərin ən çox müzakirə olunan sənətçilərindəndir. Xüsusən də əməkdar artist Cavanşir Məmmədovun həmkarını məhkəməyə verməsi böyük rezonansa səbəb oldu. Amma artıq məlum olduğu kimi Məmmədov bu iddiasından daşınıb. Bəs görəsən bu barışıq hansı formada baş tutub? Ümumiyyətlə, sənətçi niyə son zamanlar belə qalmaqallara səbəb olur?

Beləliklə, Ölkə.Az-ın bu və digər suallarını tanınmış müğənni Nadir Qafarzadə cavablandırır.

- Nadir bəy, Cavanşir Məmmədovla barışığınız necə baş verdi? Kim barışdırdı sizi?

- Birinci dəfə bizi xalq artisti İlhamə Quliyeva barışdırmışdı. Bu dəfə isə bizi Manaf Ağayev və Razi Şükürovün təşəbbüsüylə barışdıq. Amma əsaas səbəbkar Manaf Ağayevdir. Dedi ki, eyni səhnəni paylaşan, hər gün üz-üzə gələn insanların küsülü qalması, bir-birini məhkəməyə verməsi ayıb olar.

- Nəyə görə tez-tez sizinlə bağlı bu kimi hadisələr baş verir? Gah dediyiniz söz qalmaqala çevrilir, gah qınanırsınız.

- Heç özüm də nə baş verdiyini bilmirəm. Hərdən özüm də buralardan çıxıb getmək, hətta özümü öldürmək istəyirəm. Anlamıram, mənim ətrafımda nə baş verir? Manaf Ağayevin yaxşı bir sözü var. Deyir görüntüdə hamımız guya bir-birimizi çox istəyirik. Amma əslində sənət aləmində heç kim də bir-birini istəmir. Əgər istəsəydilər, onlar da Manaf Ağayev kimi addım atardılar. Yığışıb məsləhətləşərdilər, barışıq təşkil edərdilər. Manafdan başqa heç kim bunu etmədi. Deməli, bir çox sənət adamları buna sevinir. İstəyirlər ki, hamı düşmən olsun.

- Bir müddət öncə də bacınızla bağlı müxtəlif yazılar yazıldı, süpürgəçi işlədiyi bildirildi. Hətta şəxsən məndə də belə qənaət formalaşmışdı ki, bu, piardır...

- Ay başınıza dönüm, mənim bacılarım süpürgəçi işləmirlər, kənddə yaşayırlar. Bacılarımı, qardaşımı mən saxlayıram. Qardaşım Qarabağda kantuziya alıb, ruhi xəstədir. Hamısının hər ay pulunu göndərirəm. İkincisi də, istər süpürgəçilik, istər fəhləlik, yaxud hansısa fiziki işi görmək ayıb deyil. Çoxları asan pul qazanmaq üçün başqa yolu seçirlər. Hər halda süpürgəçilik elə şeylərdən qat-qat yaxşıdır.

- Asan yol deyərkən nəyi nəzərdə tutursunuz?

- Siz bilirsiniz mən nədən danışıram. Çoxları işləmək istəmir, pul qazanmaq üçün əyri, nalayiq yollar axtarırlar. Hətta gənc xanımlar da 150-200 manata işləmək istəmir. Gedib daha asan və çox pul qazanmaq üçün başqa yollara əl atırlar.

- Müsahibələrinizin birində demişdiniz ki, gəlininizin müğənni olmasını istəməzdiniz...

- Qızım yoxdur və olsaydı da, müğənni olmasına imkan verməzdim. İndi də deyirəm ki. gəlinimin də müğənni olmasına razılıq vermərəm. Bacımın da gözəl səsi var.

- Düşünürsünüz ki, qadının müğənni olması qəbahətdir?

- Qəbahət deyil. Mənim oğlum müğənni qızla evlənirsə, deməli, hər şeyi gözümün qarşısına gətirib, evləndirirəm.

- Deməli, dolayısıyla düşünürsünüz ki, bu qəbahətdir də. Qəbahət olmayan bir şeyə niyə razı olmayasınız ki?

- Mən istəmirəm də. Bəlkə başqasına xoşdur, o, qəbul edir. Bəli, qadının müğənni olması mənimçün qəbahətdir.

- Bəs düşünmürsünüz ki, bu fikriniz xanım həmkarlarınız tərəfindən pis qarşılanacaq?

- Bu, mənim fikrimdir. Elə şeylər var ki, mən də bəyənmirəm, amma heç kimə, heç nə demirəm.

- Yaradıcılıqda nə var, nə yox?

- Dünən yeni mahnı yazdırmışam. "Deyə bimədim" adlı mahnım da artıq radiolarda səslənir. "Oğlumun toyudur" adlı bir yeni mahnım da var. Deyim ki, belə bir mahnı heç vaxt səslənməyib. Bu barədə ilk dəfə sizə deyirəm. Musiqisi və sözləri Samir Vidaya aiddir.

- Bir ara klassik əsərlərə müraciət etdiniz. Hu kampaniya xarakterlidir, yoxsa davam edəcək?

- Mən hər zaman klassik əsərlərə müraciət etmişəm. Repertuarımda Səid Rüstəmov, Cahangir Cahangirov, Ramiz Mirişli, Hacı Xanıməmmədov, Rauf Hacıyev Emin Sabitoğlu kimi böyük bəstəkarlaırn əsərləri var. Sadəcə, bəzən repertuarımızda kommerisya xarakterlo mahnılar da olur. Klassik əsərlərimizi unutmurq. Bu yaxınlarda oxuduğum "Sən mənimsən, Qarabağ" mahnısı çox yaxşı qarşılandı. Bacardığım qədər çalışıram ki, mədəniyyətimizə və incəsənətimizə töhvələr verim.

- Bir dəfə hansısa saytda oxudum ki, adını fəxri ad almaq üçün Mədəniyyət və Turizm Nazirliyinə təqdim olunubmuş. Amma hansısa həmkarınızın "səyi" nəticəsində geri qaytarılıb

- Bu gün mənim böyük tamaşaçı auditoriyam var. Kütləvi tədbirlərdə, konsertlərdə o alqışları görmək lazimdir. Nə deyə bilərəm ki? Fəxri adsız da keçinərəm. Qulu Səgərov, Hüseynağa Hadiyev kimi sənətkarların da adı olmayıb Təbii ki, fəxri ad önəmlidir, amma durub davam edəsi deyiləm ki, mənə niyə vermirsiniz? Əslində adım 2007-ci ildən adım nazirliyə təqdim olunub. Amma bu günə kimi heç nə yoxdur. Halbuki hazırda ən çox işləyən müğənni mənəm. Bilirsiniz, Allah insana bir çox şeylər verir, mənə də verib. Amma bir çox məsələlər var ki. əstafurullah, heç o, Allahın da əlində deyil, bəndənin əlindədir. Arxanda kimsə durmalıdır. Mən isə təkəm, həmişə də tək olmuşam.

İntiqam VALEHOĞLU
Ölkə.Az