İlahiyyatçıdan Nadir Qafarzadənin fikrinə reaksiya: "Müğənnilik qəbul olunan iş deyil"

İlahiyyatçı alim Əkrəm Həsənov müğənni Nadir Qafarzadənin Ölkə.Az-a müsahibəsində işlətdiyi "Bir çox məsələlər var ki, əstafurullah, heç o, Allahın da əlində deyil, bəndənin əlindədir" fikrinə münasibət bildirib

İlahiyyatçı əməkdaşımızla söhbətində deyib ki, əslində, müğənniliyin özü İslam dinində qəbul olunan iş deyil. Amma sənətçinin səsləndirdiyi bu fikir iki mənada yozula bilər:

"Hörmətli müğənnimiz burada gördüyümüz kimi əvvəlcə Allahdan bağışlanmasını istəyib. Çünki, “əstəğfirullah” sözü tərcümədə “Allahım səndən bağışlanmağımı istəyirəm” deməkdir. Müğənni burada iki məna qəsd edə bilər. Birincisi, ya tamamilə bütün işlərin bəndələrin əlində olduğunu qeyd edə bilər. Yəni, “əstəğfirullah” deməsi onun söylədiklərinin doğru olmadığı mənasına gəlir. İkinci məna ümumi işlərin Allahın əlində olduğunu bildiyi halda burada demək istəyir ki, əslində hər şeyi Allahdan gözləmək doğru deyildir. İnsanlar da bir-birlərinə kömək etməlidirlər. Çünki, Allah-təala hamını eyni yaratmır. Həmçinin güc birlikdədir. Bundan başqa dinimizə görə də insanlar həmişə bütün işlərdə bir olmalıdırlar. Çünki, Peyğəmbərimiz də buyurur ki, hamınız bir yumruq kimi, yaxud da bir binanın kərpicləri kimi bir olmalıyıq".

İlahiyyatçının qənaətinə görə, Nadir Qafarzadə kimi düşünənlərin sayı yetərincədir və bu, günümüzün ən problemli məsələlərindəndir:
"Onun belə deməsində dünyəvi məsələlərə görə həqiqət vardır. Çünki, bu gün insanlar bir-birlərinə qarşı səhlənkardırlar, biri digərinə kömək etmir, hamı özü üçün çalışır. Bu səbəblə Nadir bəy də bunu demək istəyib ki, Allahın bəndələri də bir-birlərinə dəstək durmalıdırlar. Düşünürəm ki, bu səhlənkarlıq mənasında Nadir bəy haqlıdır. Ancaq ümumən inanmaq lazımdır ki, bütün işlər Allahın əlindədir. Çünki, bir hədisdə deyilir ki, əgər Allah sizi sevsə, qəlblərdə də sizə qarşı sevgi yaradar və bütün insanlar da sizi sevərlər. Hətta dinimizə görə Allahın vermədiyini bütün insnanlar yığılsa, da verə bilməz, verdiyini isə bütün insanlar yığılsa da qarşısnı kəsə bilməz. Allahın veridyi nemət mütləq insana gəlib çatar və heç kim onun qarşısını kəsə bilməz. Bütün bunlara baxmayaraq Allah-təala bu dünyada bir qanun da qoyubdur ki, hamı bir-birini sevsin, hamı bir-birinə kömək etsin. Mən elə ailə, nəsil tanıyıram ki, onlardan birinin çətinliyi olanda, ya banka borcu olanda hamı yığılıb onun problemini həll edir, borcunu bağlayır. Amma belə nəsillər indi nadir halarda tapılır. İndi birinin imkanı bir az çoxalan kimi hamıdan üz çevirir, elə bilir ki, o varlanmaqla hamıdan böyük olur. Ancaq unudur ki, Allah qarşsında hamı eynidir".

İntiqam VALEHOĞLU
Ölkə.Az