\"Mərhəmət” yeni layihəyə başladı
“Mərhəmət” İctimai Birliyi Azərbaycan Respublikasının Prezidenti yanında Qeyri Hökumət Təşkilatlarına Dövlət Dəstəyi Şurasının dəstək verdiyi "Regionlarda kənd turizminin inkişafı üçün tarix və mədəniyyət abidələrinin mühafizəsinin genişləndirilməsi sahəsində maarifləndirmə tədbirlərinin təşkili" adlı layihənin icrasına start verib.
Bu barədə Ölkə.Az-a ictimai birliyin sədri İradə Nəsirova məlumat verib. İ.Nəsirova bildirib ki, layihənin icrasına başlamaq üçün QHT üzvlərinin iştirakı ilə toplantı keçirilib. Toplantıda görüləcək işlərlə bağlı fəaliyyət planı tərtib edilib. İctimai birliyin üzvləri fəaliyyət planını müzakirə edib, təkliflər irəli sürüblər.
Xatırladaq ki, layihənin məqsədi regionlarda - Ağdam, Agcabədi rayonlarında və Mingəçevir şəhərində milli mədəni dəyərlərimizin, eləcə də tarixi- mədəni abidələrimizin qorunmasını təbliğinə, regionlarda kənd turizmi ilə bağlı işlərə təkan vermək, bu sahənin inkişafına yardım etməkdir.
QHT sədri bildirib ki, layihə çərçivəsində ilk tədbir mayın 16-dan 20-nə kimi Ağcabədi rayonunda keçiriləcək. Tədbirdə ictimaiyyətin nümayəndələri - müəllimlər, gənclər, yerli turzm və mədəniyyət sahələrində fəaliyyət göstərən mütəxəssislərin iştirakı nəzərdə tutulub.
İntiqam VALEHOĞLU
Ölkə.az