Sevda Əliqızı: "37 yaşlı oğlum var"

Bir zamanlar ən populyar xanım sənətçilərdən sayılırdı.

Xalq artisti Səməd Səmədovla duet ortağı olması onu tamaşaçıya bir qədər də tanıtdı. Amma son bir neçə ayda bu iki sənətçi arasında münasibətlər inanılmaz dərəcədə soyuqdur. Çünki iş birliyinə son verərkən yetərincə qarşılıqlı ittihamlar səsləndirilmişdi. Beləliklə, Ölkə.Az-ın suallarını tanınmış müğənni Sevda Əliqızı cavablandırır.

- Sevda xanım, istərdim ki, əvvəlcə yaradıcılığınızdan danışaq. Hazırda hansı bəstəkarlarla işləyirsiniz, nə yeniliklər var?

- Hazırda heç bir bəstəkarla işləmirəm. Çünki özüm bir neçə mahnı yazmışam. Bu mahnıların həm sözləri, həm də musiqisi özümə aiddir.

- Əvvəllər repertuarınızda öz bəstələdiyiniz mahnılar olub, yoxsa bu sırf maddi məsələlərə görədir?

- Xeyr, maddiyyatla heç bir əlaqəsi yoxdur. Əlbəttə, repertuarımda öz bəstəm olan bir neçə mahnım var. Mahnı yazmağı bacarıram və deyilənə görə pis alınmır. Bəzən insan ürəyindən keçən musiqi və sözləri çatdırmaq istəyir.

- Bəstələrinizi digər müğənnilər oxuyubmu?

- Xeyr, heç kim oxumayıb. Çünki yazdığım sözlər də, musiqilər də sırf özümə aiddir. Ancaq bundan sonra mahnılarım istədiyim müğənniyə verəcəyəm.

- Sevda xanım, hər sənətçinin həyatında önəmli rolu olan bir həmkarı, dostu olur. Bəs sizin geniş tamaşaçı auditoriyasına tanınmağınızda kimin rolu olub?

- Açıq deyəcəyəm, 36 ildir sənətdəyəm. Onun cəmi on beş ilini Səmədlə (Səməd Səmədovu nəzərdə tutur - İ.V.) çalışıb işlədim. Və tamaşaçılar da məni Səmədlə duet oxuyan sənətçi kimi tanıdılar. Amma bu o demək deyil ki, onun mənim üstümdə zəhməti olub. Səmədlə işlədiyim dönəmdə maddi məsələləri yarı bölmüşük. Elə zəif müğənni deyiləm ki, kiminsə kölgəsində qalım. Əvvəllər dövlət televiziyasının efirindən düşmürdüm. Elə onda da sevilirdim, bütün tədbirlərə dəvət olunurdum. Sadəcə, son illər onunla işlədiyimə görə belə oldu. Sevda Əliqızı deyəndə yanında Səmədin adı çəkilir.

- Maddi məsələləri yarı bölmüşük deyərkən, qazancı nəzərdə tutursunuz?

- Xeyr, qazancı yarı bölməmişik. Efirlərə, kliplərə, mahnılara xərclədiyimiz pulun yarısını o verirdi, yarısını mən.

- Bəs qazancın?

- Təbii ki, o, qazancın böyük hissəsini götürürdü.

- Məsələn beş min manata getdiyiniz məclisdən sizə və ona çatan məbləğ nə idi?

- Beş min manatdan mənə dörd yüz, musiqiçilərə də 100-150 manat verirdi. İndi hesablayın, özünə nə qədər qalır (gülür). Amma mən heç vaxt narazılıq və naşükürlük etməmişəm.

- Yəni bu şərtlərlə işləmək sizi qane edirdi?

- Bəli, heç vaxt narazılığım olmayıb, şükr etmişəm. İnsanlar var, ayda dörd yüz manat qazana bilmir.

- Bəs niyə birdə-birə 15 illlik münasibətlər nəzərə alınmadı və qarşılıqlı ittihamlar səsləndirməyə başladınız?

- Bu addım mən tərəfdən olmadı.

- Səməd Səmədov durduğu yerdə dedi ki, Sevdanı türkə mən ərə vermişəm?

- Yox canım, bu söhbətin bizim ayrılmağımıza heç bir aidiyyatı yoxdur. Sizə düzgün məlumat verilməyib. Səməd kimdir ki, məni kiməsə ərə versin?

- Səməd Səmədov açıqlamalarının birində demişdi ki, Sevda qocalıb ona görə duet ortağımı dəyişirəm. Başa düşmürəm, siz toya gedirdiniz, yoxsa sevgili idiniz? Yaşın məsələyə hansı aidiyyatının olduğunu izah edin lütfən.

- Yaxşı olardı ki, bu sualı Səmədə verəsiniz. Mənim Səmədlə işləməyimə öz həyat yoldaşım razılıq vermişdi.

-Yəni keçmiş həyat yoldaşınız.

- Bəli, keçmiş həyat yoldaşım. Mənim Səmədlə iş birliyindən başqa münasibətim ola da bilməzdi.

- Sirr deyil ki, bir çox duet ortaqları həm də sevgili olurlar. Ola bilərmi ki, onun sizə simpatiyası olub və bu istək qarşılıqlı olmadığından münasibətlər pozulub? Yaxud da belə bir münasibət olub, sadəcə demək istəmirsiniz?

- Əstağfirullah. Mən bayaq dedim axı, həyatı boyu belə bir şey ola bilməzdi. Belə bir deyim var, imam üçün ağlayanda yezid üçün də ağlamaq lazımdır.

- Yezid deyərkən, yəni Səməd Səmədovu nəzərdə tutursunuz?

- Yox, sadəcə, belə bir məsəl var. Mənim heç kimi təhqir etmək fikrim yoxdur. Demək istədiyim odur ki, Səməd də heç vaxt mənə qarşı başqa fikirdə olmayıb. Biz əvvəldən ailəvi dost olmuşuq.

- Yenidən qayıdaq ərə getmək məsələsinə. Doğrudanmı siz türklə ailə qurmuşdunuz? Bəs niyə alınmadı?

- Heç xoşuma gəlməyən sualdır. Amma səmimi danışırıqsa, sizə cavab verərəm. Əvvəla, Səmədin mənim şəxsi işimə qarışmağa ixtiyarı yoxdur. Mənim öz ailəm, 37 yaşlı oğlum, anam, dayım, bibim və digər qohumlarım var. Əgər ailə qurmaq fikrim olsa, əvvəlcə evimin içiylə məsləhətləşərəm, Səmədlə yox. Səməd isə gedib qızına yiyəlik edə bilər. İkincisi, mənim ailə qurmağımın başqalarına nə dəxli var? Bəli, mən türk vətəndaşıyla ailə qurmalıydım, hətta nikahımız da olmuşdu. Amma son anda bu evlilikdən özüm imtina etdim

- Səbəb? Başa düşürəm ki, danışmaq istəmirsiniz. Amma istərdim bu barədə ilk və son dəfə danışıb hər şeyə aydınlıq gətirəsiniz...

- Bilirsiniz, bu şəxsi məsələdir. İstəməzdim ki, şəxsi həyatım barədə danışım. Ən azından oğlumun xoşuna gəlməz. Həm də mən etik qaydaları gözləyən insanam. Axı kimin nəyinə lazımdır ki, mən ərə getmişəm, ya getməmişəm? İstəmədim, getmədim və nə yaxşı ki imtina etdim.

- İctimailəşmiş insanların şəxsi həyatı da hər zaman diqqət mərkəzində olur. Yoxsa şəsxən bu məsələ mənə qətiyyən maraqlı deyil.

- Bilirem. Amma mən heç vaxt ailə münasibətlərimi ortaya çıxartmamışam. Məncə bu, ədəbsizlik və özümə qarşı hörmətsizlikdir.

- Onda belə çıxır ki, şəxsi həyatını müzakirə edənlər ədəbsizdirlər?

- Mənə görə elədir. Ailə söhbəti ailədən kənara çıxmamalıdır.

- Aydındır. Sizə görə evlilik üçün çox gecdir, yoxsa bundan sonra da mümkündür?

- Artıq çox gecdir mənə görə. Mənim ailəm övladımdır, nəvələrimdir.

- Evlənmək gecdir, bəs sevmək?

- Sevgi də ölüb gedib. Məndəki sevgi Allahadır, sonra anama, övladıma və gözəl nəvələrimə.

- Sənət aləmində rəfiqələriniz, dostlarınız kimlərdir?

- Mənim bir rəfiqəm var. O da Ruhəngiz Musəvidir. O, tək rəfiqə yox, həm də can dostumdur, pis və yaxşı günün dostudur. Digər sənət dostlarımla isə sadəəcə yaxşı münasibətlərim var. Ruhəngizin çox böyük ürəyi var, amma xasiyyətcə körpə uşaq kimidir. Çünki qəlbi təmizdir.

-Yenidən kiminləsə duet ifa etmək, iş birilyi qurmaq fikriniz var?

- Xeyr, duet oxumaq fikrim yoxdur. amma başqa alyihəm var. Əvvəlcədən heç nə demək istəmirəm.

- Deyəsən dərsiniz güclü olub)

- Dərs deyil, kiminsə adının adımın yanında çəkilməyindən bezmişəm.

-Tək işləmək qazancınıza təsir edib?

- Edib, amma yaxşı mənada. Müstəqil işləmək daha yaxşı və sərfəlidir. Şükürlər olsun, əvvəlkindən daha artıq toylara gedirəm və məbləği də özüm istədiyim kimi dnışıram.

-Bildirdiniz ki 37 yaşlı oğlunuz var. Əslində çoxları üçün bu inandırıcı deyil. Qadın olaraq özünüzə necə baxırsınız? İdman, yoxsa başqa metodlar da var?

- Əvvəllər idman edirdim, indi heç nə etmirəm.

- Bildirdiniz ki, toyları özünüz danışırsınız. Neçəyə?

-Prodüser danışr.

-O neçəyə danışır?

- Qiymətlər müxtəlif olur. Yarım saatlıq, bir saatlıq və bütöv toyun qiymətləri fərqlidir. Mən pambıqla baş kəsmirəm (gülür). Konkret qiymət yoxdur.

- Bəs minimum?

- Yarım saat üçün 500 manat.Məni qane edir, Allah bərəkət versin.

-Nə zaman yenidən efirə qayıdırsınız?

- Məgər mən efirdə yoxam? (gülür)

- Əvvəlki qədər yox.

- Az olsun, təmiz olsun. İnsanları bezdirmək olmaz.

İntiqam VALEHOĞLU
Ölkə.az