Lalə Məmmədova oxuduğu mahnını yaşadı: \"Çökdüm, qəbrini qaza bilmədilər...\"

"Studiyaya daxil oldum və mahnını oxudum. Bundan sonra eynisini yaşadım. 24 saat tamam olmamış evdə yaşlı bir insan - qayınatam rəhmətə getdi".

Ölkə.Az xəbər verir ki, bu sözləri müğənni Lalə Məmmədova deyib. 

O, başına gələn kədərli hadisədən danışıb: "Mahnı mənə təqdim olundu, çox bəyəndim və dedim ki, sabah studiyaya gedib oxuyacağam. Sözlərinə diqqət elədim: bir tənha qoca ağlayır, yağış kəsənə bənzəmir, torpaq əsir, məzar qərib, yağdıqca içim dağılır. Əlbəttə, mahnının sözlərini yazan anlamını daha gözəl bilər. Və məzar sözlərinə görə, narahatlığımı ifadə etdim. Mənə deyildi ki, sözlərinə dəyməyim, yazılıbsa, yaşanmış şeylərdir. Deməli, studiyaya daxil oldum və mahnını oxudum. Bundan sonra eynisini yaşadım. 24 saat tamam olmamış evdə yaşlı bir insan - qayınatam rəhmətə getdi. İndiyə qədər yadımdadır, qayınanam - tənha qoca - bir küncdə ağlayırdı. Yağış bilirsiniz necə yağırdı?! Eyni mahnıda deyildiyi kimi... Hətta o qədər güclü yağırdı ki, məzarı belə qaza bilmədilər. Mən çökdüm, oxuduğum mahnı gözümün önündən lent kimi keçdi. Birdən ayıldım ki, dünən bu günü oxuyurdum".

Sənətçi bildirib ki, oxuduğu bütün mahnılarında həyatından parçalar var: "Ona görə son illər oxuduğum mahnıların sözlərinə fikir verməyə başlamışam".