ATV-dən jurnalist məsələsinə rəsmi REAKSİYA

“Eurovision 2015” mahnı müsabiqəsinin yarımfinalından sonra keçirilən mətbuat konfransında özünü ATV-nin əməkdaşı kimi təqdim edən Samirə Süleymanovanın təmsilçimiz Elnur Hüseynovdan mahnı oxumasını istəməsinə reaksiya gəlib.

ATV-nin mətbuat xidmətinin rəhbəri Vaqif Aydınoğlu Ölkə.Az-a eksklüziv açıqlamasında bildirib ki, sözügedən şəxsin telekanalla heç bir əlaqəsi yoxdur:

“Eurovision” təmsilçimiz Elnur Hüseynova müsabiqənin yarımfinalından sonra özünü ATV-nin əməkdaşı kimi təqdim edən xanım tərəfindən sual verilib və bir mahnı oxunması xahiş olunub. Bu, Binəqədə rayonunda çoxmərətəbəli binada baş verən dəhşətli yanğının səhəri gününə təsadüf edirdi. Məlum olduğu kimi Elnur Hüseynov da mahnı oxumaqdan imtina etmişdi. ATV olaraq bildiririk ki, bizim Samirə Süleymanova adlı əməkdaşımız yoxdur. Həmin şəxs “Fort Boyard” layihəsi efirə gedəndə dövrdə telekanalımızda işləyib və sonradan işdən çıxarılıb. Bildirmək istəyirik ki, Samirə Süleymanova indi “Eurovision”un təşkilat komitəsində çalışır”.

V.Aydınoğlu S.Süleymanovanın özünü ATV-nin əməkdaşı kimi təqdim etməsinin təxribat olacağını da istisna etməyib:
“Bu, ATV-yə qarşı təxribat da ola bilər. Amma hələlik bu barədə dəqiq nəsə demək çətindir. Yaxşı olardı ki, Süleymanova özü bu barədə açıqlama versin”.

İntiqam VALEHOĞLU

Ölkə.Az