Mehriban Xanlarova Kərimi məhkəməyə verir

Akademik Milli Dram Teatrının tanınmış aktrisası, əməkdar artist Mehriban Xanlarova müğənni Kərim Abbasovu məhkəməyə verir.

Bu barədə Ölkə.Az-a aktrisa özü açıqlamasında bildirib. M.Xanlarovanın sözlərinə görə, müğənniyə qarşı mülki qaydada iddia irəli sürəcək:

"Artıq vəkilim sənədləri hazırlayır. Bu həftənin beşinci günü Binəqədi Rayon Məhkəməsinə müraciət edəcəyik. Çünki Kərim bu rayonda qeydiyyatdadır. Artıq üzr istəməkdən də keçib. Mən bir neçə gün səbr etdim, amma ondan səs çıxmadı. Bundan sonra güzəştə getmək fikrim yoxdur".

Qeyd edək ki, aktrisa və müğənni arasında münasibətlər "Maşın" şoudan sonra pozulub. Belə ki, Kərim layihədən uzaqlaşdıqdan sonra "Instagram" səhifəsində əməkdar artist barədəs yazıb:

"Əslində mən bir dağlı olaraq xəcalət çəkirəm sizdən, Mehriban xanım… Sizin kimi həyasız insanın ucbatından bütün dağlı xanımlarının adı ləkələnir. Dağlı xanımı hər bir azərbaycanlı xanımı qeyrətli və namuslu olur. Amma sizi görəndən sonra çox insanların beynində dağlılar başqa cür formalaşır. Azərbaycan incəsənətində dağlıların əvəzolunmaz yeri var. Bəsdir, biz dağlıların adına xələl gətirdiniz. Ən azından daşıdığınız Xanlarova soyadından utanın”.

İntiqam VALEHOĞLU
Ölkə.Az