Məşhurlarımız 28 mayın nə bayramı olduğunu bilmədilər

Bu gün Şərqdə ilk dünyəvi demokratik dövlət olan Azərbaycan Xalq Cümhuriyyətinin yaranmasında 97 il ötür.

Məhəmməd Əmin Rəsulzadənin banisi olduğu cümhuriyyətin yaranma tarixi bu gün ölkəmizdə Respublika Günü kimi qeyd olunur. Bəs görəsən dövlət tədbirlərində səhnə almaq üçün bir-biri bəhsə girən sənətçilər, aparıcılar 28 may tarixinin hansi hadisəylə əlamətdar olduğunu bilirlərmi? Ölkə.Az bununla bağlı sorğu keçirib. Onların cavablarını olduğu kimi diqqətinizə çatdırırıq.

Teleaparıcı Lətafət Ələkbərova:

"Bu gün 28 May Azərbaycan Demokratik Bayramıdır, Respublika Günüdür. 1918-ci ildə təməli Məhəmməd Əmin Rəsulzadə tərəfindən qoyulmuş Azərbaycan Milli Demokratik Respublikasının yaranma günüdür".

Müğənni Manaf Ağayev:

"Bu günün nə günü olduğunu bilməyən adam var? Bayram günüdür, bar-bar bağırır, konsertlərdi, müstəqillik günümüzdür. Ən əziz günümüzdür. Dövlətimizin çiçəkləyən günüdür. Necə izah edim sizə? Müstəqillik günüdür".

Tanınmış rəqqasə, əməkdar artist Məryəm Süleymanova:

"Bu gün 28 may Respublika Günüdür".

Müğənni Mətanət Əsədova:

"Bu gün 28 maydır da...(düşünür) Yuxudan indi durmuşam, gözlə özümə gəlim, sizi yığıram. Kimdənsə öyrənib deməyəcəyəm, vallah. Yəqin ki dürüstlüyümə inanırsınız. Bu, prezidentimizlə bağlı da bir gün ola bilər. Arxayın olun, heç kimdən soruşmayacağam". Bir saatdan sonra zəng vurub dedikləri: "Ağlıma üç şey gəlir. Biri Qurtuluş Günü, Biri Müstəqillik Günü, bir də Cümhuriyyət bayramı".

Müğənni Nurlan Əzizbəyli: "Bu gün 28 May Respublika Günüdür".

Aktrisa, əməkdar artist Münəvvər Əliyeva: "Bu gün...Bu gün müstəqillik günüdür də. Məhəmməd Əmin Rəsulzadənin hakimiyyətdə olmasının ildönümüdür. Sizə görə yeməyim də yandı".

Müğənni Ruhəngiz Musəvi: "28 May Respublika Günüdür".

Müğənni Sevda Əliqızı: "Respublika Günüdür də. bunu bilməmək ayıb olar ki..."

Müğənni Sevinc Ağaşirinova: "Bu gün Respublika Günüdür. Hazırda Kiprdə bu münasibətlə keçirilən konsertdəyəm. Mən də çıxış edəcəyəm".

Aktrisa, əməkdar artist Sevinc Əliyeva: "Bu gün 28 maydır da. Bir dəqiqə dayan görüm. Sorğu keçirirsiniz, bilmirsiniz nə günüdür?" Telefon qəfil qapanır və növbəti dəfə zəng edirik: "Hə, "adboy" getdi. Azərbaycan Respublikasının günüdür. Necə yəni ki?"

Teleaparıcı Vüsalə Şahvəliqızı: "Bu gün Respublika Günüdür. Radioda da bu barədə fikrilərimi qeyd etmişəm. 1918-ci ildə Məhəmmədəmin söyləmişdi ki, bu gün Respublika Günüdür".