Xoşqədəm: "Ölüm hökmü bərpa edilsin"

Məşhur aparıcı zorlanaraq öldürülən 5 yaşlı Aişəni kədərlə xatırladı
 
Məşhur aparıcı Xoşqədəm Hidayətqızı ölüm hökmünün bərpa edilməsini tələb edir. ANS TV-də yayımlanan "Axtarıram səni" və "Sən tək deyilsən" verilişlərinin aparıcısı Xoşqədəm Hidayətqızı bir neçə gün əvvəl Bakının Pirallahı qəsəbəsində zorlanaraq öldürülən 5 yaşlı qızın faciəsinə münasibət bildirərkən belə deyib.
 
Xoşqədəm Hidayətqızı 1 İyun - Uşaqların Beynəlxalq Müdafiəsi gününə təsadüf edən verilişində studiyaya balacaları qonaq edib. Studiyadakı uşaqları qucaqlayıb bağrına basan Xoşqədəm xanım zorlanaraq öldürülən 5 yaşlı Aişəni xatırlayaraq kədərlənib.
 
"Mən körpə balanın o vəziyyətə salınmasını eşidəndə göz yaşları tökdüm. İnanın mənə, çox pis oldum... Mən parlamentdə əyləşən millət vəkillərindən xahiş edirəm ki, ölüm hökmünün bərpasını müzakirəyə çıxarsınlar. Mənim 5 yaşlı balama o cür işgəncə verənə ölüm hökmü verilsin. Bilirəm, mənim bu fikrim birmənalı qarşılanmayacaq. Amma mən fikrimin üstündə dururam. Cinayət Məcəlləsinə o maddənin əlavə edilməsini istəyirəm", - aparıcı deyib.
 
Qeyd edək ki, millət vəkili Fazil Mustafa da ölüm hökmünün bərpa edilməsi tələbini bəyan etmişdi: "İllərdir tələb edirəm ki, uşaqların və hamilə qadınların qəsdən öldürülməsinə görə ölüm hökmü bərpa olunmalıdır".
 
Mayın 28-də Pirallahı rayonunda itkin düşmüş 5 yaşlı qızın meyiti tapılıb. Onun meyiti elə yaşadığı məhlədən qonşularının həyətində aşkarlanıb. Qızın elə həmin həyətdə yaşayan qonşusu 1984-cü il təvəllüdlü Çernov Yakov Viktoroviç tərəfindən qətlə yetirildiyi bildirilib. 5 yaşlı uşağın zorlandığı da deyilir. 
Çernov Viktoroviçi polis yaxalayıb. Faktla bağlı cinayət işi başlanıb, araşdırma aparılır. (anspress)

Ölkə.Az