Elza Seyidcahanın kitabı çıxır

Bəstəkar-müğənni, əməkdar artist Elza Seyidcahanın şeirlərindən ibarət kitabı çap olunacaq. Bu barədə Ölkə.Az-a sənətçinin özü məlumat verib. Onun sözlərinə görə, əslində kitab çıxartdırmaq fikri yox imiş:

"Əslində, mənim heç vaxt kitab çıxartdırmaq fikrim olmayıb. Amma belə bir misal var. Deyir ki, qurban olum düşmənimə, məni qoymur düşməyə. Bəzi uğursuz yazarlar, şairlər, jurnalistlər nalayiq şeirləri mənim adıma çıxdılar. Həm də mənim cızmaqara adlandırdığım şeirlərim, yazılarım insanlar tərəfindən sevilir. Neçə illərdir özlərini şair, yazar sayan, "Türksəs", "Elsəs", "Azərsəs" kimi təxəllüslər götürən insanların yazılarından fərqli olaraq, mənim cızmaqaralarım böyük səs-küyə səbəb oldu, oxundu, müzakirə olundu. Mən təvazökarlıqdan uzaq olmamaq üçün bunlara cavab vermədim. Hətta səsvermə nəticəsində "ilin şairəsi" diplomuyla təltif edildim. Bizim hər zaman gözəl şairlərimiz olub. Sadəcə, hər insanın öz aləmi olduğu kimi mən də ürəyimdəkiləri qələmə aldım. Artıq kitabım hazırlanır və bir neçə dildə çap olunacaq. Kitab "Cızmaqalalar" adlanacaq. Hazırda ölkəmiz bir sıra beynəlxalq tədbirlərə ev sahibliyi edir. Ona görə də kitabın çapını payız aylarına saxlamışıq. Hər kəs də ora dəvət olunacaq. Ora söz xiridarlarını dəvət edəcəyəm. Bir var sözü yeyirsən, bir də var sözü yeyirsən, həm də həzm edirsən. Kitabımın təqdimatında sözü yeyib həzm edə bilən insalar iştirak edəcəklər"

Qeyd edək ki, Elza Seyidcahanın son aylarda yazdığı şeirlər mətbuatda və sosial şəbəkələrdə müzakirə mövzusuna çevrilib.

İntiqam VALEHOĞLU
Ölkə.Az