Səməndər Rzayev: "Rəqsanəyə görə bir dayday zəng vurub hədə-qorxu gəldi"
Mənə görə o, Azərbaycanın 3 ən perspektivli və gənc "stand-up"çısından biridir. Məşhur olmasa da, yetərincə tanınır, sevilir və qəbul olunur. Müsahibə ərzində həmsöhbətimin sevilməyinin bir səbəbi də mənimçün aydınlaşdı. Amma bunu özünüz oxuyub biləcəksiniz. Beləliklə, Ölkə.Az gənc "stand-up"çı və aktyor Səməndər Rzayevin müsahibəsini təqdim edir.
- Səməndər, səni efirdən tanısaq da, haqqında elə də çox məlumatımız yoxdur. İstərdim əvvəlcə özün barədə danışasan...
- 1990-cı il martın 11-də Bakı şəhərində anadan olmuşam, 18 saylı məktəbi bitirmişəm. Orta məktəbdən Şən və Hazırcavablar Klubunun (ŞHK) fəallarından olmuşam. Müəllimlər də fəal olduğumu görüb, məni qabağa verirdilər. O vaxt məktəblərarası çempionatlar da iştirak edirdim.
- Bəs efirə necə yol tapdın?
- Doğrusu, heç vaxt efirə çıxmaq fikrim olmayıb, sadəcə ŞHK-da oynamaq istəyirdim. "Neftçi Bakı" komandamızla dəfələrlə Rusiyada çıxışlar etmişik. İlk dəfə Həştərxan şəhərindəki yarışda ermənilərə qalib gəldik. Volqaqrad şəhərinin "Diaspora" komandası var idi, ermənilərdən təşkil olunmuşdu. Birinci dəfə iştirak etdiyimiz çempionatda üçüncü olduq. Həmin vaxt 18 yaşım var idi və komandanın kapitanıydım. Efirə çıxmağıma gəlincə, bu məsələdə aktyor Ələkbər Əliyevin rolu olub. O da 18 saylı məktəbi bitirib, "Planet Parni iz Baku"nun ssenaristi və aktyorudur. Məni "Lider" televiziyasında yayımlanan "Cin Dəyirmanovlarda" serialının kastinqinə dəvət etdi və keçdim. Bu, mənim televiziya məkanına ilk addımım idi. Ardınca "Planet Parni iz Baku"nun keçirdiyi yumor kubokuna "Neftçi Bakı" ilə qatıldıq və finala qədər irəlilədik. "Comedy Az" az isə əvvəl klubların birində ayda bir dəfə keçirilirdi. O vaxt rəhbərimiz Fərid Abbasov idi. Gəlib dedi ki, ANS telekanalı layihəni efirə gətirməyimizi istəyir, amma Azərbaycan dilində. Çünki o vaxta kimi ancaq rus dilində çıxışlar edirdik. Əvvəlcə dedim ki, bəlkə lazım deyil. Getdik, alındı və layihə bir il davam etdi. Bir ildən sonra söz-söhbətlər oldu və uzaqlaşdım.
- Son "Səməndərmən" başladı...
- "Səməndərmən" şou ilə dörd ay efirdə olduq və yaxşı da reytinq verirdik. Sadəcə, telekanalın marağında olmadığı üçün layihə bağlandı. Layihə bağlanandan sonra Tahir İmanovun rəhbərlik etdiyi "Gülüş yığması" telelayihəsinə dəvət olundum. Ümumiyyətlə, onun mənə çox dəstəyi olub. Yeniyetmə vaxtlarımda "Qara qızıl" adlı komandamız var idi və bu komandanı Gənclər və İdman Nazirliyi beynəlxalq yarışlara göndərirdi. Bir dəfə elə oldu ki, səfərə getmək üçün on nəfərin pulu ödənildi və həmin siyahıda mən olmadım. Yolda təsadüfən Bəhram Bağırzadə ilə rastlaşdıq, soruşdu ki, səfərə nə vaxt gedirsiniz? Dedim ki, hamı gedir, mən getmirəm, maliyyə problemi var. Biz də Soçidə keçirilən ənənəvi festivalda çıxış etməliydik. Soruşdu ki, Soçidə olmusan? Dedim ki, yox. Tahir İmanovla Bəhram Bağırzadə mənim yol, otel, yemək xərclərimi ödədilər, gedib festivalda çıxış etdim.
- "Gülüş yığması"na necə çağırıldın?
- Tahir müəllim bu layihəyə Elməddin Cəfərov, Fərda Xudaverdiyev, Ələkbər Əliyevi də dəvət etmişdi. Heç gözləmirdim ki, o kollektivə dəvət olunacağam. Layihə bir il yayımlandı.
- Bildiyimə görə film çəkirsən. Ssenari, ideya hardan yarandı?
- Komediya janrında tammetrajlı filmdir. İdeya mənim və komandamızındır. Uşaqlar dedilər ki, hamı çəkir, biz də çəkək. Dedim ki, tələsməyək, lazım deyil. Çünki özüm Afrikada "Səhra almazı" filminə çəkilmişdim və çətinlikləri görmüşdüm. Oturub məsləhətləşdik. Axırda qərara gəldik ki, komediya janrında, amma mənalı bir film çəkək. Bizim janrımız elədir ki, ciddi film çəksək, camaata maraqsız olacaq. Filmin adı "İki tüstü"dür.
- Yenə "ora" gedib çıxmısınız?
- Getdik "ora" çıxdıq. Amma filmin əsas məqsədi odur ki, gənclər narkotikə yox desin.
- Ssenarini kim yazıb?
- Ssenarini mən yazmışam, rejissor Əlisəttar Quliyevdir.
- Maliyyə məsələsini necə həll etdiniz?
- Özümüz kimin nəyə imkanı çatdısa, atışbı çəkdik.
- Film neçəyə başa gəldi?
- Ümumi 47 min manat xərcimiz çıxdı?
- Çəkilişlər harda oldu?
- Çəkilişlər ancaq Bakıda olub. Dənizdə, bağda, şəhərin mərkəzində çəkilişlər etmişik. Hazırda Gürcüstanda montaj prosesi gedir. Operatorlarımız, montajçı və rəssam gürcüstanlıdır.
- Niyə məhz gürcülər?
- Təbii ki, Azərbaycanda da yaxşı operatorlar, montajçılar var. Amma burada kimə müraciət etsəm ki, gəl bu işi pulsuz görək, sonra imkanım olanda verərəm, razılaşmayacaq.
- Gürcülər pulsuz işlədilər?
- Əlbəttə. Orda dostlarım var ki, Hollivudda çəkilən filmlərdə işləyiblər. Zəng edib dedim ki, belə bir fikrim var, kömək edin, sonra mən də sizə hədiyyə kimi nəsə hörmət edərəm, razılaşdılar.
- Bildirdin ki, ssenariləri özün yazırsan. Bizdə ssenarist qıtlığı varmı?
- Problem ssenaridə yox, fantaziyadadır. Gənclərimizin fantaziyası çox məhduddur, sanki hər şey dördbucağın içində fırlanır. Məsələn, Tahir İmanov mənə öyrədib ki, ssenari yazanda özünə çərçivələr qoyma, əvvəlcə yaz, sonra düzəldərsən. Ssenari yazanda sərhəd qoydunsa, alınmayacaq.
- Bu filmə başqa kimlər çəkilib?
- Filmdə xalq artisti Arif Quliyev çəkilib. Zəng elədim, heç bir problemsiz gəlib çəkildi.
- Qonorarsız?
- Yox, qonorar oldu. Bir gün çəkildi və özü də çox bəyəndi. Rus Dram Teatrından Həcər Ələkbərova var, çox güclü aktrisadır, o da bu filmdə var. Vüsal Əzizov, Elsevər Mehdizadə də əsas rolları oynayıblar.
- Komediya janrında çəkilən filmlər var. Narahat deyilsən ki, qəbul olunmaz?
- Əsas inamdır və mən inanıram ki, bəyəniləcək. Kimsə bunu biznesə görə edirsə, məni məhsulumun maraqlı olmağı düşündürür.
- Filmdən kiməsə borcun qalmayıb?
- Şükür Allaha, heç kimə borcum yoxdur. Bakının çox maraqlı məkanlarında çəkilişlərimiz oldu. Göstərmək istəmişik ki, Bakı heç də Avropa şəhərlərindən geri qalmır.
- Təqdimat nə vaxt olacaq?
- Oktyabrda olacaq. İstəyirik kinoteatrlarda elə vaxt yayımlansın ki, xarici filmlərlə üst-üstə düşməsin. Çünki bizim millət xarici filmlərə üstünlük verir. Amma kinoteatrlarda yaxşı filmlərimiz getsə, insanlarımız tədricən öz çəkdiklərimizə də maraq göstərəcəklər.
- Yerli komediya seriallarına və filmlərinə baxırsan?
- Seriallara yox, amma filmlərə baxıram. Düzdür, Fərda bizi təqdimata dəvət etməsə də, uşaqlarla gedib "Xoxan" filminə baxdıq. Çox xoşumuza gəldi, güldük. Elməddinlə Fərdanın aktyorluğu super idi. Kinoteatrlarda bütün yerlər dolmuşdu, birtəhər dördüncü sıraya bilet tapdıq. "My name is İntiqam"a da baxdıq. "Xoxan" qədər xoşumuza gəlməsə də, normal idi.
- İxtisasın nədir?
- Rejissor.
- Qazancın toylardandır?
- Dost-tanış var da. Toylara çox dəvət etsələr də, getmirəm. Düşünürəm ki, 25 yaşımdaq toyda mikrofonu əlimə götürüb böyük-böyük danışmağım düzgün deyil.Toy aurası mənimçün tezdir. Gərək əvvəlcə özüm böyüyüm. Amma ad günlərində, digər korporativ məclislərdə bir saatlıq çıxışlar edirik.
- Qonorar nə qədər olur?
- Heç vaxt konkret məbləğ demirəm. Bu, mənim xoşladığım işdir də. İlk növbədə işimdən həzz alıram. Duet "Diana-Syoma" və duet "Papanin"lə gedirik. Ən çox tələb olunanlar budur. Toy axşamılarında isə duet "Papanin"lə çıxış edirik.
- Dianadan söz düşmüşkən, çoxları sizi sevgili bilirlər.
- (gülür) Diana məndən beş yaş böyükdür, onun öz ailəsi və uşağı var. Diana qardaşdı, aramızda sevgi-məhəbbət yoxdur. Sadəcə, səhnədə sevgiliyik və bu, bizim taktikamızdır.
- "Stand-up"ların müşahidələrinə əsaslanır, yoxsa fantaziyaya?
- Bu janrda olan çıxışlarım sırf müşahidələrimə əsaslanır. Mən metroya, avtobusa minməsəm, küçədə gəzməsəm, camaatla ünsiyyətdə olmasam, taksi sürücüsünün danışdığına qulaq asmasam, maraqlı olmaz, yazdığım istənilən kimi alınmaz.
- Elə olub ki, maraq naminə taksiyə minib sürücünü danışdırıb, ondan monoloq hazırlayasan?
- Belə şeylər çox olub. Özüm də qəsdən uzaq yol sürdürmüşəm ki, daha çox danışsın.
- Bəzən tanıyanda susublar?
- Hə, elə də olub.
- Uşaqlığın harda keçib?
- Uşaqlığım Bakıda keçib. Amma heç vaxt "Papanin"də yaşamamışam (gülür). Sadəcə, Bakıda "Papanin" deyəndə ilk ağıla glən narkotik və qaqaşlar orda olduğuna görə bu adı seçmişik. Rus dilində çıxış edəndə duetimiz "Uyanlar" adlanırdı. Azərbaycan formatına keçəndə bir neçə ad düşündük. Kubinka, Sovetski kimi adlar da var idi, amma Papanin daha şirin səsləndiyinə görə bu adın üzərəndə dayandıq.
- Heç "Papanin"dən zəng vurub etiraz edənlər olub ki, niyə bizi bu qədər tənqid edirsən?
- Mən orda heç kimi tənqid etmirəm. Qaqaşları göstərirəm də. O qaqaşlar nəinki "Papanin"də, bütün Bakı şəhərində var.
- Çıxışına görə hədələndiyin olub?
- İki dəfə olub. "Xəzər" televiziyasında "Miks şou" adlı verilişdə çıxışlar edirdik. Şou biznes xəbərlərini oxuyurdum. Bir dəfə prodüser Tolik haqda xəbər oxudum. Zəng vurdu, başladı danışmağa, hədələməyə. Dedim ki, mənlik heç nə yoxdur, prodüser Ramiz Hüseynzadədir, mövzuları da o verir. Ondan sonra zəng eləmədi. Müğənni Rəqsanənin adını verilişdə bir-iki dəfə çəkmişdim. Qalın səsli dayday zəng vurmuşdu ki, xeyir ola Rəqsanənin adını çəkirsən?
- Bəlkə qohumu, məsələn, əmisi oğlu imiş?
-(gülür) Bilmədim vallah kim idi. Dedim ki, o Rəqsanə, o da sən, mənim adımı çəkməyin. Əgər başqa fikriniz varsa, söhbət edək. Sırf zarafata görə mən zəng etməyin.
- Tamaşaçıların 25 yaşşa kimi olan gəclərdi...
- Əvvəl mən də elə düşünürdüm. Əslində elə deyilmiş. Küçədə, yolda yaşlı nəsil məni daha çox tanıyır
- Sosial şəbəkələrdə qızlar fotolarına yaxşı sözlər, hətta etiraflar yazırlar. Tanınmağından istifadə edib hansısa qızla münasibət qurmusan?
- Yox, belə şey olmayıb. Tanınmağımdan sponsorla danışanda istifadə edirəm. Görürəm ki, tanıyır, daha ürəklə danışıram. "Facebook"da çox qızlar yazır, münasibət qurmaq istəyirlər. Amma elə şeydən uzağam. Fikrimcə, belə şeydən istifadə etmək düz deyil.
- Saqqal saxlamısan. İbadət edirsən?
- İbadət etmirəm. Filmə görə saqqal saxlamışdım, istədiyim dəyişiklik olsun, belə saxladım.
- Yumorlarını sırf Bakı ləhcəsində təqdim edirsən. Əslən bakılısan?
- Əslim Siyəzəndəndir.
- Yumoristlərin çoxu monoloqlarını ləhcəylə çatdırırlar. Məsələn Fərda və Elməddin daha çox Qrəb zonasının ləhcəsinə üstünlük verirlər, Müşfiq cənub zonasının. sən Bakı ləhcəsində danışıran. Ümumiyyətlə, bu, doğrudurmu? Məsələn, ola bilər ki, sənin yumorun lerikliyə çatmasın.
- Razıyam, çatmaya bilər. Amma bir məqam var. Fikrimcə nə Elməddin, nə Fərda ləhcələrlə danışmırlar. Uşaqlıqdan onların "Tək səbir" layihəsinə çox baxmışam və həmişə də mən şirin gəlib.
- Ümumiyyətlə stand-up janrında ləhcə vacibdir?
- Mənim obrazımda ləhcə kömək edirsə, nəinki Bakı, digər bölgələrin ləhcələrindən də istifadə edirəm. Çalışıram ki, ləhcədə danışmayım. Stand-up elə janrdır ki, ləhcə olmaz.
- Bəzən açıq zarafatların da olur...
- Bizim kütlə Rusiyanın bu tip layihələrinə baxmağı"Komedikomediklabına baxmağı xoşlayır və mən də baxıram. Orada açıq zarafatlardan çox istifadə olunur. Amma bizə çatanda irad bildirirlər.
- Niyə bizim tamaşaçı Cem Yılmazın söyüşlərinə qulaq asa bilir, amma öz aktyorlarımız nəyisə açıq deyəndə etiraz edirlər? Bəlkə elə tamaşaçı doğrudan da haqlıdır...
- Cem Yılmaz böyük bir kütlənin qarşısında çıxış edir və kim bəyənmirsə, zaldan çıxır. Zaldan gedəndə Cem Yılmaz onun arxasınca da iki kəlmə "yağlı" söz deyir. Bizdə isə qəbul etməyəndə durub danış-danışa gedirlər. Biz gedənə heç nə deməmişik. Bu zarafatdır da. Açıq zarafat kimisə təhqir etmək üçün deyil. Guya həyatda açıq zarafatlar etmirik? Sadəcə xoşlayırıq ki, qabağa gedəni tənqid edib, yerə çırpaq.
- Kimlərdən öyrənirsən?
- Mənə kimsə heç nə öyrətməyib, özüm öyrənmişəm.
- Məsələn, Rafaellə Coşqunun stili sənə nə dərəcədə yaxındır?
- Onların öz janrı var və bunu nə mən, də başqası edə bilməz. Uşaqlıqdan Rafael və Coşqundan, Elməddindən, Fərdadan çox şeylər öyrənmişəm. Hələ "Parni iz Baku" vaxtından hər bir üzvünü izləmişəm. Bu, o demək deyil ki, özümü onlara oxşadıram, sadəcə, öyrənirəm.
- Xüsusi pərəstiş elədiyin kimlər var?
- İlk növbədə Bəhram Bağırzadə, Tahir İmanov Cabir İmanov. Yumor sahəsində ən bəyəndiyim bu üç nəfərdir. Fərda və Elməddini də bəyənirəm, çıxışlarına baxıram.
- Mütaliə ilə aran necəcir?
- Mətbuatdan gündəmi izləyirəm.
- Səhnə adamlarının şəxsi həyatı da maraqlı olur. Bəzən gec ailə qururlar, bəzən isə uğursuz evlilik yaşayırlar...
- Bu işim ailə qurmağa heç bir problem yaratmaz. Ailə qursam, yoldaşım məni qısqansa, düz gəlməz. Sözsüz ki, ona əvvəlcədən hər şeyi izah edəcəm və qəbul etsə, ailə quracam. İndi ailə qurmaq yox, karyeram, az da olsa, sözümü demək haqda düşünürəm.
- Verilişlərdə səndən inciyib gedən qonaqlar olurdu?
- "Səməndərmən" verilişini açılanda Nadir Qafarzadə dedi ki, Səməndər uşaqdır mən o uşağın veirlişinə nəyə gəlim? Açığı başa düşmədim. Halbuki Nadir "Comedy Az"-a gələndə qulağıma deyirdi ki, mənimlə işin olmasın ha. Öz verilişimə çağırdım, gəlib olmadı.
- (zarafatyana) Həmin layihədə həmişə tamaşaçı qismində gözəl xanımlar iştirak edirdi. Onları kim çağırırdı?
- Məsələn, Nəriman dayı digər verilişlərin tamaşaçısıdır, o qızlar da bizim. Açığı, çoxları öz tanışlarımızdır. Gözəllik yarışmasının laureatlarıdır. Bir-iki dəfə gəldilər, zarafatlaşdıq, xoşlarına gəldi. Sonra özləri gəlmək istədilər.
- Ən maraqlı qonağın kim olub?
- Namiq Qaraçuxurlu gəldi, bizə çox kömək elədi. Sadə insandır da. Belə pis çıxmasın, ayağı boyda oğlanın verilişinə gəldi, dəstək oldu, biz də çox razı qaldıq. Səidə Sultan və rəqqaasə Aytən də komplekssiz insanlardı.
- Bəs ən darıxdırıcı qonaq...
- Aşıq Əlini ilk efirimizə dəvət elədik. Düşündük ki. aşıqdır, gələcək, çal-çağır olacaq. Gəldi və saızını da gətirmədi. Verilişin axırına kimi də sakitcə susub oturdu.
- Və son olaraq istərdim gələcək planların barədə danışasan.
- Bir həftəyə gürcüstana yollanıram filmlə bağlı. Sonra filmin piar işlərinə başlayacağıq. Ardınca bir saatlıq solo konsert etmək istəyirəm. İnşallah görək nə olur.
Söhbətləşdi: İntiqam VALEHOĞLU
Fotolar: Nurlan Gülməmmədov