Abbaszadədən imtahanların çətinliyi ilə bağlı iradlara cavab: "Elan etmişdik ki..." - FOTO

“Martın 5-i və 12-də keçirilən imtahanlarda istifadə olunan mətnlərlə əlaqədar Azərbaycan dili sualının və xüsusilə “Telekinez”lə bağlı mətndən dolayı bizə qarşı çox ciddi iradlar olub”.

Ölkə.Az xəbər verir ki, bunu Dövlət İmtahan Mərkəzinin Direktorlar Şurasının sədri Məleykə Abbaszadə ali təhsil müəssisələrinə sənəd qəbulunun başa çatması və buraxılış imtahanlarına həsr olunmuş mətbuat konfransında deyib. 

“Hələ dekabr ayında buraxılış imtahanları ilə bağlı bizim xüsusi jurnalımız buraxılıb. Həmin jurnalda hər bir fənnə aid olan standartlar var. Amma biz pedoqoji ictimaiyyəti əvvəlcədən məlumatlandırırıq ki, Azərbaycan dilindən 5-ci sinifdə formalaşan hansı standartlar yoxlanacaq, 6-cı sinifə aid olan standartlar və s. Bu hamısı dekabrda elan olunmuşdu. 

Bizə irad tuturlar ki, çox mürəkkəb mətn veririk. Jurnalda hər bir fənnə aid olan mətnlərin nümunələri də verilib. Bu jurnal elektron formatda da var. Mənə elə gəlir ki, mütəxəssislər bu fikirləri söyləməzdən əvvəl onlar gərək bu jurnalla tanış olaydılar.

Bizə ən çox irad tutulan “Telekinez”lə bağlı olan mətndir. 4-cü sinif Azərbaycan dili ilə bağlı metodik vəsaitə baxın. Bu dərslik müəllimlərdə var. “Telekinez” haqqında uşaqlar 4-cü sinifdə məlumat alıblar”. 

Billurə Yunus