Çak Norris Bakıya gəlir

"...bura gəlməyə söz verdi"

Ölkə.Az xəbər verir ki, Sudo döyüş növləri cəmiyyətinin sədri, çun-kuk-do Azərbaycan nümayəndəliyinin və peşəkar karate-do təşkilatının rəhbəri Sabir Süleyman tanınmış kinoaktyor Çak Norrislə görüşüb.

O, görüş barədə təəssüratlarını "Apasport"la paylaşıb.

Samir Süleyman bildirib ki, Norris dağ keçisi ovlamağı çox xoşlayır.

"Ov həvəskarıdır. Mən də ona Azərbaycanda ov üçün gözəl yerlər olduğunu dedim və ölkəmizə dəvət etdim. Çak Norris gələn ilin sentyabrında bura gəlməyə söz verdi. Düşünürəm ki, buranı görsə, film də çəkdirər. Xüsusən də, Babadağ ətəyində ekstrim yerlər var", - deyə Süleymanlı qeyd edib.

Xatırladaq ki, Çak Norris Amerika kinoaktyoru və döyüş növləri ustası, Hollivud ulduzudur.

Əsl adı Karlos Rey Norris olan Çak Norris 1940-cı ildə ABŞ-ın Oklahoma ştatının Rayan şəhərciyində doğulub. Norrisin atası avtomexanik olub və gələcək aktyorun ailəsi kasıblıqla yaşayıb.

Çak Norris 5 uşaq atasıdır. Övladlarından 3-ü ilk nikahındandır. İkinci həyat yoldaşı isə 2001-ci ildə Dakota adlı oğlan və Daniel adlı qızdan ibarət əkiz övladlar dünyaya gətirib. Norris böyük oğlanları ilə dostluq əlaqələrini saxlayır. Onlardan biri kinolardan tryukların quruluşçu rejissorudur. Çakın qardaşı Aaron Norris isə kinorejissordur.

Rəşid Mustafazadə

Ölkə.Az