Maykl Ceksonun heç yerdə eşidilməyən sirləri ortaya çıxdı

Ölümündən 6 il keçsə də hələ də musiqiləri dinlənilir, klipləri baxılır, haqqında danışılır

Söhbət pop musiqisinin kralı Maykl Ceksondan gedir. Bu dəfə müğənninin plastik cərrahı ifaçı haqqında heç yerdə eşidilməyən sirləri açıb.

“Maskanın arxasındakılar”... Dünyaca məşhur plastik cərrah Patrick Treacy-nin yeni işıq üzü görən və məşhurlar haqqında bir çox məlumatın yer aldığı kitab məhz belə adlanır. Kitabda ən çox diqqət çəkən pop musiqisinin kralı Maykl Cekson haqqında etiraflardır.

Mayklla televiziya proqramlarının birində tanış olduğunu deyən cərrah qeyd edir ki, elə həmin gündən müğənniylə dostluq münasibəti yaranıb. Cərrahın sözlərinə görə Maykl Ceksonun uşaqlığı elə də xoş keçməyib. Tez-tez atası tərəfindən döyülən pop ulduzun kosmetika məhsullarına marağı da elə o vaxtdan başlayıb. Plastik cərrah eyni zamanda müğənnin çox əyləncəli, elmə, xüsusilə də tibb elminə böyük maraq göstərdiyini deyib. Vitiligo – yəni dəridə rəngsiz, ağ ləkə xəstəliyindən əziyyət çəkən Maykl Ceksonun ən böyük kompleksi də məhz bununla bağlı olub. SİTAT: Bir gün əlində bir kitab ofisimə gəldi. İçindən bir səhifə açdı. Bu, qaradərili bir uşaq şəkli idi. Uşaq qaradərili olsa da bədəni həm qara, həm də ağ idi. Mənə dedi ki “Bu uşağın nə qədər əzab çəkdiyini bilirəm”. Sonra şalvarının balağını yuxarı qaldırdı. Onun da dərisinin eynilə şəkildəki uşaq kimi həm qara, həm də ağ olduğunu gördüm. Bütün bədəni elə idi”

Qeyd edək ki, Maykl Cekson 2009-cu ildə şəxsi həkimi Konrad Mürreyin vurduğu ağrıkəsici iynədən sonra dünyasını dəyişmişdi. (atv.az)

Ölkə.Az