Yəhudi əsilli türkiyəli müğənnidən təzyiqlərə reaksiya - FOTO

"HƏMAS qatildir" sözlərini sitat gətirən və Qəzzadakı xəstəxana hadisəsinə reaksiya vermədiyi üçün tənqidlərə məruz qalan yahudi əsilli türkiyəli müğənni Linet özünü müdafiə edib. 

Ölkə.Az xəbər verir ki, müğənni instaqram səhifəsində yazılı paylaşım edərək açıqlama verib.

“Düşünürəm, bu qədər ağrı olduğu halda özümü ifadə etmək ağrının başqa bir növüdür. Amma bunu etməliyəm. Mən 500 il əvvəl Osmanlı İmperiyası dövründə əcdadlarım Türkiyəyə gələndən bəri bu torpaqda yaşayan yəhudi ailəsinin üzvüyəm.

Mən 30 ildir, bu torpaqlarda sənəti ilə məşğul olan, bu torpaqlardan çörəkpulu qazanan, bu ölkədə vergi ödəyən Türkiyə vətəndaşıyam. Biz bu torpaqda həmişə müsəlman, xristian və yəhudi olaraq mehriban, qardaşcasına yaşamış və qonşu olmuşuq. Bundan sonra da bu şəkildə yaşamağa davam edəcəyik. Hamınız kimi mən də günlərdir, davam edən bu vəhşiliyi yaşadım və yaşamaqda davam edirəm.

Yeganə arzum odur ki, bu qəddarlığa, qan tökülməsinə hər iki tərəf tez bir zamanda son qoysun. Ailə üzvlərim, qohumlarım, dostlarım hazırda müharibənin ortasındadırlar. Müharibədə qalib yoxdur. Tökülən qanın dini, dili, irqi yoxdur! Məni belə bir mövzuda mühakimə edib hədəf göstərməyin vicdanı olmaz. Şərhlərinizi bildirərkən sizi vicdanlı və sağlam düşüncəli olmağa dəvət edirəm. Arzum budur ki, axan qanlar dayansın və bu müharibə tez bir zamanda bitsin. Bütün dünyasını dəyişənlərə Allahdan rəhmət diləyirəm”.

Günay