"Azəristar"ın ulduzu: "Rəhmətlik atam deputat idi"

Onu 2004-cü ildə ilk dəfə keçirilən "Azəristar" müsabiqəsinin tapıntılarından hesab etmək olar. Çünki istər ifası, istər davranışıyla Azərbaycanın klassik estrada ifaçılarını xatırladır. Amma məsələnin təəssüf doğuran tərəfi odur ki, bir zamanlar tez-tez efirlərdə gördüyümüz Pərviz Abdullayev bu gün bir kənara çəkilib.

Niyəsini Ölkə.Az-a Pərvizin özü danışır...

- Pərviz, xeyli vaxtdır efirdə görünmürsən. Nə işlə məşğulsan, yoxsa başın ancaq toylara qarışıb?

- Yaradıcılıqla məşğulam. Sadəcə, elə verilişlər olur ki, dəvətdən imtina edirəm. Görürəm ki, aparıcı məni dinləməyib, oxuduqlarımdan xəbərsizdir. O, mənim haqqımda necə danışa bilər? Məni verilişinə dəvət edən aparıcı heç olmasa, mahnılarımın bir qismini dinləməlidir. Demirəm ki, bütün aparıcılar oxuduqlarımı dinləsinlər. Ancaq çağırdığın qonaq barədə məlumatlı olmalısan.

- Yəni açıq şəkildə etiraz edib getmirsən...

- Yox, sadəcə yola verirəm.

- Hansı bəstəkarlarla işləyirsən?

- Samir Şirinovla işləyirik, aranjimanlarımı da o edir, arabir mahnılar da yazır. Bir diş həkimi var-Qoşqar Mirzəyev. Onun da bəstələrini oxuyuram.

- Son zamanlar gündəmdə olan bəstəkarlarla işləmirsən?

- Gövhər Həsənzadədən mahnı oxumuşam.

- Son illərdə Azərbaycanda keçirilən estrada müsabiqələrinin sayı həddən artıq çoxdur. Səncə bu müsabiqələr musiqimizə nəsə qazandıra bildi, yoxsa əksinə bayağılaşdırdı?

- Müsabiqələrin sayı çoxaldıqca keyfiyyət aşağı düşdü, bayağılaşma getdi. Məsələn, "Azəristar"ın ilk iki müsabiqəsi kimi heç biri olmadı. O müsabiqədən çox istedadlı uşaqlar çıxdı.

- Fikrincə, növbəti müsabiqələrdən çıxan ifaçıların zəif olmasının səbəbi nə idi? Münsiflər düz seçmirdilər, yoxsa başqa səbəblər var?

- Ola bilər ki, həmin müsabiqələr olmalıydı, elədilər.

- "Azəristar" Azərbaycan estradasına kimləri qazandırdı?

- Elton Hüseynəliyev, Nurlan Növrəsli, Ayaz Qasımov, Vaqif Şıxəliyev...

- Belə fikirlər var ki, son zaman sənətdə cılızlaşma gedir. Fikrincə, bu cılızlaşma tələbatdan irəli gəlir?

- Elə mahnı var ki, nə bəstəkarını tanıyıram, nə ifaçını, amma qulaq asanda əhvalım düzəlir. Çünki mahnı ürəyə yaxındır, səmimilik var.

- Özün kimlərə qulaq asırsan?

- Radioda kimin mahnısını verirlərsə qulaq asıram. Eyyub Yaqubova, İlqar Muradova daha çox qulaq asıram.

- Bu ifaçılar sənin oxuduğun janra daha yaxındırlar...

- Yaxınlıq məsələsi deyil. Eyyub Yaqubovun ifası doğrudan da adama ləzzət edir. Brilliant Dadaşovanı da dinləyirəm. Çünki orada musiqi var.

- Solo konsertin olub?

- Xeyr, olmayıb.

- Səncə, konsertin olsa, tamaşaçı gələr?

- 200 nəfərlik bir məkanda edə bilərəm və belə bir fikrim var. Konsertimin bir neçə hissədən ibarət olmasını istəyirəm. Məsələn, bir blokda klassik mahnılar, birində müasir estrada mahnıları...

- Hansısa televiziyanın solistisən?

- Heç yerin solisti deyiləm və olmamışam. Amma istərdim ki, AZTV-nin solisti olum.

- Tay-tuşun olan ifaçılar var ki, artıq fəxri ad da alıblar. Ümumiyyətlə, fəxri ada iddialısan?

- Əlbəttə, niyə də olmasın? İstərdim ki, tarixə düşüm. Fəxri adlar da insanı tarixə salır. Amma fikrimcə, fəxri adlar insana əməyi müqabilində verilməlidir. On il ərzində çalışaram və məni də qiymətləndirərlər.

- Amma sən də efirlərdən kənarsan, heç yerin solisti deyilsən. Bəs səni necə görüb qiymətləndirəcəklər?

- Kimisə görmək istəyirsənsə, onu görə bilirsən. Əsas istəkdir.

- Klipin var?

- Bəli, sonuncu klipimi bir neçə ay əvvəl Osloda "Belə olmaz" mahnısına çəkdirmişəm.

- O klipin "raskturka"sı çox olmadı.

- Bəzi telekanallarda getmişdi, sosial şəbəkələrdə var idi.

- Yeri gəlmişkən, sosial şəbəkələrdən istifadə edirsən?

- Facebook profilimi Samir Şirinov idarə edir, özüm ancaq "Instagram"da varam.

- Sosial şəbəkədə sənə nə yazırlar?

- Harasa girəndə hiss edirəm ki, bizi sevən və hörmət edən insanlar var.

- Müğənnilər toy qiymətlərini açıqlayırlar. Sən toya neçəyə gedirsən?

- Çalışıram ki, hamı ilə ortaq məxrəcə gələ bilim. Görürəm ki, bu adam məni çox istəyir, amma imkanı yoxdur, yarım saat da olsa, orada pulsuz iştirak edirəm. Dəfələrlə belə olub.

- Bəs normalda toy qiymətin neçədir?

- Onu deyə bilmərəm.

- Fikrincə qiyməti açıqlamaq nə dərəcədə doğrudur?

- Bir az mədəniyyətsizlik, görməmişlikdir. Bizim şou biznesdəkiləri çoxu olmayan şeylər haqda danışırlar. Həyat da onları sıxanda hər şey üzə çıxır. Məsələn, mən bu gün ikiotaqlı evdə yaşamağa gücüm varsa, çəkilişi aparıb villada edirəmsə, nəzərə almalıyam ki, o villanın qapıçısı, mühafizəçisi, mənim yaxın ətrafım, qonşularım bilir ki, bura mənim deyil. Belə edirsənsə, bu olur artistlik.

- Əslən Gəncədənsən. Gəncəyə tez-tez gedirsənmi?

- 2004-cü ildən Mədəniyyət və İncəsənət Universitetinin estrada aktyoru və vokal fakültəsinə daxil oldum. Azər Zeynalovun tələbəsi olmuşam, kurs rəhbərimiz Afaq Bəşirqızı, səhnə danışığı müəllimimiz Laləzar Mustafayeva idi. 11 ildir Bakıdayam, Gəncəyə tez-tez gedirəm, doğulduğum şəhərdi, ailəm orada yaşayır. Dostlarım, sinif yoldaşlarım, qohumlarım oradadır.

- Bakı ümidlərini doğrultdumu?

- Bu suala belə cavab verim də. "Azəristar"da iştirak etmək üçün Bakıya gələndə və həmin ərəfədə heç bilmirdim ki, nə iş görürəm.

- Bəs nə vaxt hiss elədin ki, səni tanıyırlar?

- Birinci efirdən sonra. Camaat doğrudan da müsabiqələrə baxırdı. Klassik mahnılar oxuyurduq. Hamını cavan qızlar öpəndə, məni yaşlı qadınlar, qoca kişilər öpürdü.

- Tanınmağının sənə mane olduğu məqamlar olur?

- Mənimçün nə xoşdursa, onu da edirəm. Gedib dostlarımla bir manatlıq çayxanada da otururam, domino da oynayıram. Heç bir kompleksim yoxdur. Bundan neçə dəfə çox tanınsam da, yenə belə olacaq.

-Bəzən də deyirlər ki, sənətçi əlçatmaz olmalıdır.

- Əslində, o düz fikirdir. Mən öz istədiyim kimi yaşayıram və mənə belə xoşdur.

- Həmkarların deyirlər ki, istəməzdik gələcəkdə övladımız müğənni olsun. Sən istərdinmi?

- Övladım yaxşı pianoçu olsun, operada Azərbaycanı təmsil etsin. Əlbəttə, fəxr edərəm. O nə deməkdir ki? İnsanın şəxsiyyəti, ailəsi, qanı necədirsə, o da həmin yoldadır. İstənilən sənət belədir. Taksi sürücüsü var 5 manatlıq yolu 10 manata aparır, sürücü də var ki, yolun öz qiymətini deyir. Hər ikisi sürücüdür, amma insanlıq fərqi var.

- Pərviz, sonda sənin heç vaxt heç yerdə danışmadığın bir məsələ barədə danışmağını istəyirəm. Bildiyimə görə şəhid oğlusan.

- Doğrudan da bu haqda efirdə, mətbuatda danışmamışam. Amma sual verdinsə deyim ki, bəli, atam şəhid olub. Özü də Gəncədə Şəhər Sovetinin deputatı idi. Allah bütün şəhidlərimizə rəhmət eləsin. Hər zaman onun adına layiq övlad olmağa çalışmışam və bundan sonra da çalışacağam. Əsas olan da budur.

İntiqam VALEHOĞLU
Ölkə.az