Azərbaycanlı müğənnilər Dağıstanı "partladır" - Əməkdar artist kim olacaq?

Dağıstanın növbəti Əməkdar artisti kim olacaq?

Ölkə.Az xəbər verir ki, Azərbaycanın tanınmış gənc müğənniləri Elvin Babazadə və Üzeyir Mehdizadə bu günlərdə Dağıstanda səfərdədirlər.

Onlar mühüm şəxslərdən birinin övladının toyunda iştirak etmək üçün Dərbənd şəhərinə yollanıblar. Lakin toy əsl konsertə çevrilib. Belə ki, hər iki müğənninin dağıstanlı pərəstişkarları onları görmək üçün həmin yerə toplaşıb.

Bildirilir ki, kütlə gənc ulduzları mühasirəyə alaraq şəkil çəkdirib və imzalar istəyib.

Oktyabrın 4-ü isə Üzeyir Mehdizadənin Dərbənd konserti böyük anşlaqla baş tutub.

Üzeyir Mehdizadə isə bir neçə il ərzində həm Azərbaycan, həm bir sıra xarici ölkələrdə məşhurlaşıb. O, İsrail, Özbəkistan, Rusiya və digər yerlərdə konsert proqramları ilə çıxış edib.

Ümumiyyətlə, son zamanlar Azərbaycanın gənc ifaçıları qonşu Dağıstanda xeyli populyarlıq qazanıblar. Onların mahnıları gənclər arasında dinlənilir və ən yüksək musiqi verilişlərində yüksək reytinq toplayır.

Elvin Babazadə daha çox hit mahnıların ifaçı və müəllifi kimi tanınır. O, eyni zamanda, 2012 və 2013 Avroviziya Milli seçim turlarının iştirakçısı, 2005-ci ildə UNESCO tərəfindən istedadlı uşaqlar üçün keçirilən müsabiqədə fəxri diplomun sahibi və eyni ildə Türkiyədə keçirilən “Novruz” festivalının mükafatçısıdır. Elvin Babazadə İsrail və Dağıstanda konsert proqramlarında çıxış edib. 2013-cü ildə o, Dağıstanın İlin ən yaxşı müğənnisi mükafatına layiq görülüb.

Bundan əlavə, o, 2014-cü ildə Nadia Mikayılla birlikdə Dağıstanda pərəstişkarlarına konsert təqdim edib.

Dağıstandakı mənbələrdən verilən məlumata görə, gənc ifaçı Elvin Babazadənin yaxın zamanlarda Dağıstanın Əməkdar artisti fəxri adı alacağı gözlənilir.

Bir müddət öncə Azərbaycanın və Dağıstanın əməkdar artisti Ədalər Şükürov Dağıstanda xalq artisti adına layiq görülüb.

Rəşid

Ölkə.Az