Azis yenə Bakıya gəlir

Ekstravaqant müğənni dekabr ayının 19-da Bakıda konsert proqramı ilə çıxış edəcək.

Ölkə.Az xəbər verir ki, bu barədə Azisin Bakıdakı ilk konsertinin təşkilatçı Samir Xəttab İnstagram hesabında məlumat yayıb:

"Bu konsert qeyri-adi keçəcək. Gözləmədiyiniz sürprizlər olacaq. Sizi konsertin əvvəlindən sonuna qədər möhtəşəm şou gözləyir", - deyə Xəttab bildirib.

Bir müddət öncə Azis yenidən Bakıya gələcəyini vəd etmişdi. Sosial şəbəkədə "Tezliklə Bakıda...” sözlərini yazan Azis əlavə heç nə qeyd etməmişdi.

Xatırladaq ki, Azisin ilk Bakı konserti bu ilin 25 iyulunda baş tutmuşdu. Konsertin təşkilatçısı Samir Xəttab olmuşdu. Anşlaqla keçən konsert uzun müddət yerli media ilə yanaşı, həm də xarici mətbuatın da gündəm mövzusuna çevrilmişdi.

Qeyd edək ki, əsl adı Vasil Troyanov-Boyanov olan Azis pop-folk janrında oxuyur. O, musiqi karyerasına 1999-cu ildən başlayıb. Azis biseksualdır və bunu gizlətmir. Müğənni 2006-cı il oktyabrın 1-də oğlan sevgilisi Niki Kitaetslə qeyri-rəsmi nikaha girib. Bolqar ulduzun 2007-ci ildə keçmiş rəfiqəsi folk müğənni Qaladan Raya adlı qızı doğulub.

Yeni konsertə biletlərin qiyməti 20-150 AZN-dir.

Rəşid

Ölkə.Az