"Kişi sevirsə, hər şey etməlidir... Atamı arxamda hiss edirdim”

Kişilər maskanı çıxardandan sonra gördükləri Dilarəyə baxsınlar. Həmişə istəmişəm ki, necə varamsa, insanlar da məni elə tanısın. Müxtəlif obrazlara bürünə bilərik, amma sonda maska çıxanda görünən şəxs biz özümüzük. Qarşı cinsin şansı isə hər zaman var. 

Ölkə.Az xəbər verir ki, bunu "AZXEBER.COM"un "Gəl Danış” rubrikasının qonağı olan "Maska şou”nun qalibi, müğənni Dilarə Kazımova deyib.

Müğənni sevmək istədiyini açıq-aşkar etiraf edib:

“Məncə, bir kişi üçün mümkünsüz deyə bir şey olmamalıdır. Əgər kişi bir qadını sevirsə, onu əldə etmək üçün hər şeyi edəcək və ya etməlidir. Kişi ən birinci özünə inanmalıdır. Bir insanı sevəndən sonra alınmasa, deyə bilmərəm ki, bir daha sevməyəcəyəm. Axı mən sevmək istəyirəm və sadiq insanam. Mənnim yanımda olan insan, həqiqətən də özümə uyğun biri olmalıdır”.

12 yaşında itirdiyi atasından danışan müğənni kövrək anlar yaşayıb:

“Mən ilk öncə o Dilarəyə sarılardım. Çünki o 12 yaşında atasını itirən Dilarədir. Ona deyərdim ki, hər nə qədər çətin olsa da, özündən şübhə etmə. Öz yolunu seç və irəli get. O zaman hər şeyə nail olacaqsan. Atam mənim konservatoriyada oxumağımı çox arzulayırdı. Hətta psixologiyada da belə bir qayda var ki, insan bir zaman sonra özünə məktub yazmalıdır. Mən də atama məktub yazmağa başladım. Düşünürəm ki, hazırkı uğurumdan sonra o məktub bitəcək. Bu layihə boyu mən atamı və Allahı öz yanımda hiss edirdim. Sanki kimsə mənim qolumdan tutub qaldırırdı. Nə olur olsun, bir gün hər şeyin yaxşı olacağına inanmaq lazımdır. Hər birimizin içində bir canavar var. Sadəcə onu oyatmaq lazımdır ki, o da sizinlə birlikdə savaşsın. Ağlamamaq üçün özümü güclə saxlayıram. Ümumiyyətlə çox duyğusal insanam. İnanın ki, bu qalibiyyət mənim üçün vacib idi. Bir ara ümidsizliyə qapıldım, dedim yenə də 3-cü, 4-cü yeri tutacaqsan. Amma ədalət öz yerini tapdı”.