Türkiyədə məşhur serialın çəkiliş meydançası yanıb külə döndü, çəkilişə fasilə verildi - FOTO
Türkiyədə məşhur seriallardan birinin çəkiliş meydançasında yanğın olub.
Ölkə.Az Türkiyə mətbuatına istinadla xəbər verir ki, hadisə TRT-də həftəiçi hər gün yayımlanan "Aziz Mahmut Hüdayi Aşkın Yolculuğu" serialının çəkildiyi yerdə baş verib.
Yanğın Riva ərazisində qeydə alınıb. Qısa müddətdə yayılan alovun qarşısını almaq mümkün olmadığından serialda dərgah kimi quraşdırılan meydançanın bir hissəsi yanaraq külə dönüb.
Bədbəxt hadisə çəkilişlərin olmadığı saatda baş verdiyindən xəsarət alan olmayıb.
Ekran işinin çəkilişlərinə bir gün fasilə verilib.
İlkin ehtimala görə, yanğına səbəb qısqapanma olub.
Qeyd edək ki,"Aziz Mahmut Hüdayi Aşkın Yolculuğu" serialında baş rolları Rüzgar Aksoy, Cem Kurtoğlu, Hakan Örge, Duyğu Gürcan və Tuğba Melis Türk ifa edir.
Billurə
