Rəqsanənin saxlanılma səbəbi barədə məlumat yayıldı

Rusiyada saxlanıldığı deyilən Rəqsanə İsmayılovanın “Rüşvət vermə” və “Sənəd saxtakarlığı” maddələri ilə ittiham olunduğu barədə məlumat yayılıb.

Ölkə.Az Rusiya mediasına istinadən xəbər verir ki, müğənni ötən gün İstintaq Komitəsinin Solntsevo İstintaq İdarəsinə gəlib.

Qeyd edilir ki, o, dələduzluqda axtarışda olub, anası və bacısı isə Türkiyədə insan alverinə görə cinayət məsuliyyətinə cəlb edilib.

"R.İsmayılova Solntsevo Daxili İşlər Nazirliyinin Daxili İşlər İdarəsinin əməkdaşı Yelena Smirnovaya qarşı 2023-cü il işində şahid qismində gətirilib. Yelena Smirnova Qurbanov soyadlı biri ilə əlbir olaraq ona və ən azı iki azərbaycanlıya pasport verib.

Amma məlum olub ki, o, iki yox, üç nəfərə pasport verib - R.İsmayılovanın dindirilməzdən əvvəl müstəntiqə təqdim etdiyi pasportu da saxta şəxsiyyət məlumatları ilə hazırlanıb və 2019-cu ildə həmin işçidən alınıb", - deyə məlumatda vurğulanır.

Bildirilir ki, müstəntiqlərin fikrincə, müğənni həmin Qurbanova 650 min rubla (indiki məzənnə ilə 12 min manat – red.) yaxın pul verib və o, yoxlanılmış üsulla ona yeni sənəd almağa kömək edib.

Məlumata görə, 2023-cü il aprelin 2-də bu faktla bağlı cinayət işi açılıb və müğənni ölkədən çıxmamaq şərti ilə azadlığa buraxılıb.

Rəqsanə İsmayılova isə yayılan informasiyaları təkzib edib.