"Uşaqlarına görə yanındadır, artıq onun gözündə ən alçaq adamsan"

Azxeber.com-un "Gəl danış” layihəsinin bu həftəki qonağı klarnet ustası Hüseyn Məhəmmədoğlu olub.

Ölkə.Az xəbər verir ki, Hüseyn xəyanətlə bağlı suala verdiyi cavab ilə gündəmə gəlib.

4 il öncə ikinci dəfə ailə quran musiqiçi, xanımına heç vaxt xəyanət etmədiyini deyib:

“Ümumiyyətlə, insan həyatındakı qadınla bağlı seçim edəndə ilk olaraq onun psixoloji durumuna baxıb qərar verməlidir. Bu, əsas şərtlərdən biridir. O ki qaldı "qadın nə istəyir" sualına, bunun da cavabı var. Qadın qarşısında düzgün, xəyanətsiz ər istəyir. Hər zaman dostlarıma da bunu deyirəm ki, əgər sizi bir dəfə xəyanət üstündə tutsalar, bilin ki, o qadında sevgi öldü. O, sadəcə, uşaqlarına görə sizin yanınızdadır və siz artıq onun gözündə ən alçaq adam olursunuz. Ona görə də belə şeylər etməyin. Mən 4 ildir, 2-ci dəfə ailə qurmuşam. Ona xəyanət etməmişəm, etmirəm və heç vaxt da etməyəcəyəm. Sizə onu da deyim ki, bir kişinin xəyanət etməyi, daha çox onun xanımından asılıdır. Əgər xanım həyat yoldaşına dəyər versə, onu qiymətli hiss etdirsə və qarşılığında kişi ona xəyanət etsə, demək o kişi dünyanın ən alçaq insanıdır. Mənim kişilərə bir tövsiyəm var. Çox tez ailə qurmağa çalışmasınlar. Ailənin nə olduğunu dərk edib, ailə dəyərlərini biləndən sonra ailə qursunlar. Allaha şükür, mən onu gec də olsa, tapmışam.

“Qadın mütləq çalışmalıdır” deyən klarnet ifaçısı, fikrini belə əsaslandırıb:

 “Ailədə tək kişi önəmli deyil, qadına da dəyər vermək lazımdır. O da hansısa kişinin qızıdır. Ən əsası insandır. Mən ümumiyyətlə qadına paltaryuyan gözü ilə baxmıram. O da bu həyatı doya-doya yaşamalıdır, həyatdan zövq almalıdır. Elə şeylər var ki, qadına onun üçün mütləq icazə verməlisən. Çox vaxt kişilər qadını çalışmağa qoymur. Mən bununla heç cürə razılaşa bilmirəm. Mən daha geniş fikirləşirəm. Bəlkə, anidən öldüm. Mənim uşaqlarıma kim baxacaq? Mənə bir şey olsa, mənim işsiz olan uşaqlarımın anası nə edəcək?”