Nazilə Səfərli: \"Nədir axı Cavanşir Məmmədovun ölümünə sevinmək?\" 

“Deyirəm, gör hansı zəmanəyə gəldik. Ölən insana bir rəhmət deməyə dilləri gəlmir. Cavanşir müəllimin ölüm xəbərinə açığı pis oldum. Biz çox da yaxın deyildik. Uzaqdan-uzağa "salam-sa ğol". Yazılan şərhləri oxuyuram, bədənim əsir. Niyə axı? Neyləmişdi sizə bu yazıq adam?".

"Ölkə.az" xəbər verir ki, bu sözləri şairə və qiraətçi Nazilə Səfərli mərhum müğənni Cavanşir Məmmədovun ölümündən sonra müzakirələrlə bağlı sosial şəbəkə hesabında paylaşdığı postda yazıb.

"Cavanşir müəllim ölən gününəcən işləyib. Heç kimə möhtac olmayıb. Ən güclü ansambl zamanında onun olub. Ən bahalı toylara dəvət alıb. İşçilərinə böyük hörmətlə yanaşıb. Haqq yeməyib. Heç kimi toydan burmazdı. İşçiləri xəstələnəndə belə, gəlmədikləri gün maaş verib. Siyasi xadim deyil, pis vərdişi yox, heç kimin namusuna göz dikməyib. Sadəcə, səsli düşünən kompleksiz insan olub. Başqa necə olmalı idi ki, bir rəhmət yazasınız? Onu sevməyə bilərdiniz, bunu sizdən istəyən də olmayıb. Nifrətin də əsası olmalıdır. Onun ölümünə sevinmək nədir? Lap tutaq ki, pis adam olub. Sizə nə? Kim bilir necə öləcək? Məgər hamıya torpaq qismət olur? Cavanşir müəllim, Allah sizə rəhmət eləsin. Allah haqsız yerə sizə pis şərhlər yazanların ömründən kəsib balalarınıza calasın".

Qeyd edək ki, C.Məmmədov 70 yaşında evində qəfil ürəktutmasından vəfat edib. O, anası Güllü Məmmədovanın yanında Yasamal qəbiristanlığında dəfn olunub.