Xalq artistinin tələbəsi qanqster obrazında

Müğənni Rasim Mustafazadə ilk fotosessiyasını etdirib.

Ölkə.az-ın məlumatına görə, sənətçinin şəkillərdəki imici və obrazı xüsusi diqqət çəkir və dünyaca tanınan qanqster Al Kaponeyə bənzəyir. Rasim özü bu haqda zarafatla belə deyib:

“Bəlkə də bənzərliyimiz var. Amma fotosessiya edərkən Al Kapone obrazını yaratmağı düşünməmişdik. Şəkillər hazır olduqdan sonra bənzərliyi gördüm. Mənim qanqsterliklə heç bir əlaqəm yoxdur”.

Qaranlıq dünyanın adamları ilə maraqlanmadığını deyən müğənni əvvəllər fikrini peşəkar idmana, son zamanlar isə müğənnilik karyerasına yönəltdiyini bildirir.

Azərbaycanda ilk dəfə peşəkar idmandan müğənniliyə addım atan Mustafazadə yeni mahnılar üzərində çalışdığını bildirib:

"Bir müddət əvvəl 2 klipimi tamaşaçıların ixtiyarına verdim. Yaxın günlərdə isə daha bir mahnımın klip təqdimatı olacaq. Sözləri və musiqisi Azər Nəsibovun olan “Mənim üçün sevgi” adlı ritmik mahnını yenə də rejissor Rəhman Əliyev ekranlaşdırıb. Klipin son montaj işləri gedir. Operator işi Delee-yə, mahnının aranjimanı isə Elvin Musayevə məxsusdur. Klip hazır olduqdan sonra ilkin baxış üçün media nümayəndələrinin ixtiyarına veriləcək".

Qeyd edək ki, Rasim Mustafazdə xalq artisti Samir Cəfərovun tələbəsidir.

Ölkə.Az