Xuraman Şuşaya köçə bilmir: İcra hakimiyyətinə müraciət etdi

Artıq Şuşadan olan məcburi köçkünlərin doğma şəhərə qayıdışı başlanıb. 

Şuşa şəhərinə köçən ailələr çoxmənzilli binalarda evlə təmin olunublar. İşğaldan azad olunmuş torpaqlara qayıdanlar arasında bir sıra məşhurlar da var.

Doğma yurda qayıtmaq istəyənlərdən biri də müğənni Xuraman Şuşalıdır.

Yenisabah.az-a danışan sənətçi ata-baba yurduna köçmək arzusu olduğunu və bununla bağlı rəsmi şəkildə dövlət qurumuna müraciət  etdiyini açıqlayıb:

“Mən bununla bağlı Şuşa şəhər İcra Hakimiyyətinə müraciət etmişəm. Sadəcə, 18 yaşım olanda Şuşa qeydiyyatından çıxıb Bakı qeydiyyatına düşmüşəm deyə məsələ bir qədər uzanır. Bizim ailədən qardaşım Şuşaya köçəcək. Bilirsiniz ki, Azərbaycanda belə bir ənənə var, ata mülkü oğula qalır. Bu səbəbdən, allahın izni ilə qardaşım Şuşaya köçəcək. Bizim Şuşada iki evimiz olub. Qardaşım köçdükdən sonra biz təkrarən müraciət edəcəyik. Hələ ki, qardaşımın köçməyini gözləyirik, artıq onu qeydiyyata alıblar”. 

İfaçı qeyd edib ki, işlə təmin olunarsa, köçüb Şuşada yaşamağa hazırdır:

“Mən əlbəttə ki, köçmək niyyətindəyəm. Nə vaxt ki, insanlar köçəcək, mən də köçəcəyəm. Hazırda köçənlər işlə də təmin olunublar. Getdiyin yerdə işləməlisən. Mən də işləmək istəyirəm, çünki toydan-toya gedib-gəlmək düzgün deyil. Vətənimdə daimi çalışmaq istəyirəm. Şuşada oxuduğum Niyazi adına musiqi məktəbində çalışmaq istəyərəm. Harada olarsa, harada deyərlərsə, ora da işləməyə canla-başla hazıram. Həyat yoldaşım da mənimlə birgə köçməyə hazırdır. Onun da istəyi var. Mən harada xoşbəxtəmsə, o da mənimlə birgə orada olmaq istəyir. Əgər mən gedərəmsə, ailəm də mənimlə birgə olacaq. 

Allah hər kəsə öz vətənində yaşamağı nəsib etsin, mən də öz vətənimdə çox xoşbəxtəm. İnsan doğulduğu torpaqda xoşbəxt olur. Alimlərdən biri deyib ki, harada doğulmusansda, orada yaşasan həm uzun ömürlü olsarsan, həm də xoşbəxt. 

Mən də 3 dəfə Şuşaya getmişəm, hər dəfə də anlada bilməyəcəyim qədər xoşbəxt olmuşam. Bu hissi sözlərlə ifadə etmək olmur. Alllah şəhidlərimizə rəhmət etsin. Mənim orada uşasq gülüşlərim əmələ gəlib, bir başqa olmuşam. Kədər, nostalji öz yerində, amma insan dogma torpağında tam başqa cür xoşbəxt olur. Allah mənə nəsib etsin, elə orada da yaşayım”.