"Brilyant əl"in aktrisasında xərçəng aşkarlanıb

Rusiyanın Əməkdar artisti Svetlana Svetliçnayada xərçəng aşkarlanıb.

Axşam.az xəbər verir ki, bu barədə "Mash" teleqram kanalı məlumat yayıb. Bildirilib ki, həkimlər Svetliçnayanın alt çənəsində şiş aşkar ediblər. Nəşrin məlumatına görə, son bir aydır ki, sənətçi sol qulağındakı ağrılardan əziyyət çəkir və bu səbəbdən xəstəxanaya gedib. Nəticədə ultrasəs müayinəsində aktrisada üç santimetrlik şiş və iki böyümüş limfa düyününün olduğu ortaya çıxıb. 

Bundan əvvəl aktrisaya ikinci dərəcəli diz osteoartriti diaqnozu qoyulub.

Xatırladaq ki, sənətçi 2021-ci ildə itkin düşmüş və bir neçə gündən sonra tapılmışdı. Ona beyin zədələnməsi diaqnozu qoyularaq psixiatrik klinikaya yerləşdirilmişdi.

Qeyd edək ki, o, "Brilyant əl", "Baharın on yeddi anı", "Görüş yerini dəyişmək olmaz" kimi bir çox filmlərdə rol alıb.