Ayan: "Kişi məndən 30 yaş da böyük ola bilər, amma..."

Gənc müğənni Ayan Babakişiyeva Ölkə.az-ın suallarını cavablandırıb.

- Ayan xanım, istərdim əvvəlcə yaradıcılıq barədə danışaq...

- Yaradıcılığımda yeniliklər təbii ki, var. Məhərrəm ayında sənətçilər yaradıcılığa daha çox vaxt ayırırlar. Çünki sakitçilik olur, toya getmirik.

- Toya gedirsiniz?

- Gedirəm.

- Yəqin ki, yarım saatlıq.

- Yarım saat da gedirəm, ansamblla məşq edib toyu bütünlüklə də idarə edirik. Canlı oxumaq mənimçün problem deyil və toy təcrübəm də var.

- Toy qiymətiniz nə qədərdir?

- Yarım saatı 2000-2500 manat, toyu əvvəldən axıra idarə etmək isə danışıqdan asılıdır.

- Məsələn?

- Yalandan deyə bilmərəm ki, tez-tez toyu əvvəldən axıra idarə edirəm. İndiyə kimi cəmi 5-6 dəfə belə olub. Ona görə də 7-8 min qonorar almışam.

- Şou-bizneslə bağlı ciddi yoxlamalara başlanılıb. Vergi ödəyicisi kimi qeydiyyatda varsınız?

- Xeyr. Mənim toylarım digər həmkarlarımla müqayisədə azdır və sırf toy müğənnisi deyiləm. Bir qism müğənnilər var ki, toy bazarları çox gözəldir və digərlərinin bu bazara girməsinə imkan vermirlər.

- Ən az toylara gedən sənətçilərdənsiniz və istər geyimlərin, istər avtomobilin ən bahalısı sizdədir. Çox qəribə təzad var...

- Doğrudan?

- Doğrudan. Əlavə bir gəlir yeriniz var?

- Hər bir xanım müğənni analıq məzuniyyətinə çıxana qədər həyatında hər şey çox gözəl olur. Bunu tam səmimi etiraf edirəm. Gənc xanımlar da ailə həyatı qurandan sonra görürsən ki, sənətdən bir qədər uzaqlaşırlar. Övlad böyüyür, ona qayğı göstərməlisən, qrafikin onun səhhətinin, istəyinin üzərində qurulur. Mən də bu dövrdə toylara getmirdim.

- Mənim soruşduğum başqa məsələ idi...

- Nəyim varsa, sırf sənətimə görə nail olmuşam. Şansdan düzgün bəhrələnmək lazımdır.

- Adətən xanım sənətçilər rəsmi, yaxud vətəndaş nikahı ilə ailə qurandan sonra maddi durumları bir qədər də yaxşılaşır. Bu kimi məsələlərin sizin maddi durumunuzla əlaqəsi yoxdur ki?

- Heç bir əlaqəsi yoxdur və çalışaq şəxsi məsələləri bu işə qatmayaq.

- Belə bir fikir var ki, müğənni oxuduğunu yaşamasa, uğurlu alınmaz. Ən uğurlu mahnınız olan "Ya ona dön, ya məni sev"in şəxsi həyatınızla əlaqəsini bilmək maraqlı olardı...

- Oxuduğum mahnılardakı vəziyyəti sonradan yaşayıram. Keçmişimi yaddan çıxardan insan deyiləm, amma keçmişimlə yaşayan da deyiləm. Təbii ki, oxuduğum hər bir mahnı həyatımın müəyyən dönəmini əks etdirir.

- Soruşuram ki, adını çəkdiyim mahnı yaşadığınız bəlli olaylardan əvvəl yazılıb, yoxsa sonra?

- Bu, sifarişlə yazılmayıb. Sözləri və musiqisi Xanım İsmayılqızına aiddir, bəyəndim, oxudum. Mahnı da hər şey gözəl olanda oxunub. Hər şey indi də gözəldir. Həyat davam edir...

- Niyə mətbuatın münasibətləriniz barədə yazdıqlarını inkar edirdiniz?

- Bu haqda danışmaq istəmirəm. Həyatımda olmayan şeydən danışmağı xoşlamıram.

- Hətta dostluq münasibətləri də qalmayıb?

- Yox.

- Emma Ələkbərzadə, Ədalət Şükürov və sizin barənizdə yəhudi olmağınızla bağlı söz-söhbətlər gəzir. Hətta qızınızın adı da ...

-(sözümü kəsir) Selena qədim yunan ilahəsinin adıdır. Bu, qadınları qoruyan bir ilahədir.

- Bəs repertuarınızdakı yunan mahnıları, tez-tez bu ölkədə səfərdə olmaq? İnsanlar düşünürlər ki, siz yəhudisiniz.

- Anamın nənəsi Dərbənd əsilli dağ yəhudisidir.

- Siz yəhudisiniz?

- Deyirlər ki, yəhudilərdə insanın dini anadan sayılır. Mən Azərbaycan vətəndaşıyam və burada yaşamaq çox gözəldir.

- Bir amerikalı da Azərbaycan vətəndaşı ola bilər. Konkret cavab istəyirəm. Yəhudisiniz?

- Şərhsiz.

- Konkret? Əzizə Mustafazadə də xtistianlığı qəbul edib. Yəni buna görə onu qınaya bilmərik...

- İnsanları dininə və irqinə görə dəyərləndirmək lazım deyil. Müsəlmanlara aid olan bayramlar mənə çox doğma və əzizdir. Bu fikirlərim yəhudi bayramlarına da aiddir.

- Din etibarilə yəhudisiniz?

- Xeyr, müsəlmanam. Amma yəhudilərin bayramlarını keçirdirik, qaydalara əməl etmirəm. Azərbaycanın, müsəlmanların bayramlarını da qeyd edirəm.

- Gənc sənətçinin şəxsi həyatı da yetərincə maraqlıdır.

- Sakitçilikdir.

- Yəni namizəd də yoxdur.

- Bu gün övladımın atası da, anası da mənəm.

- Maddi olaraq?

- Hərtərəfli. Xoşuma gəlmir ki, ortada haqqımda bəzi şayiələr gəzir. Amma mənə kiminsə maddi dəstəyi və köməyi lazım deyil.

- İmtina etmisiniz?

- Hər şeydən imtina etmişəm. Bu gün fikrimdəki yalnız ailə qurmaqdır. Həyatımda sevgili, eşq yalnız ailə qurmaqdır. Ailə müqqəddəsdir və onu dağıtmaq üçün qurmursan.

- Selenanın soyadı Babakişiyevadır?

- Təbii ki. Bir daha deyirəm ki, övladımın atası da, anası da mənəm. Heç kimin maddi və mənəvi dəstəyi lazım deyil. Düşündüyüm ailə qurmaqdır və bunu çox istəyirəm.

- Vətəndaş nikahında münasibət qurmazsınız?

- İstəyirəm rəsmi nikahlı hörmət və istəkli ailəm olsun.

- Yaş fərqinin sizə görə önəmi var?

- Heç bir önəmi yoxdur. Hörmət olanda hər şey olur. Hətta özümdən otuz yaş da böyük ola bilər.

- Bəs sevgi?

- Sevgi boşdur və ötəri hissdir. Hörmət olanda xəyanət də olmur, yalan da.

- Ailə quracağınız insana görə sənətdən uzaqlaşmağınız mümkündür?

- Uzaqlaşaram.

- Maddi şərtlər olur?

- Ailə qurursansa, burdan nə təmənna güdə bilərsən?

- Fəhlə ilə ailə qura bilərsiniz?

- Gəlin real danışaq. Axı mən adi fəhlə ilə yaşaya bilmərəm.

- Sizə 700 manatlıq xəz jilet ala bilməyəcək biri ola bilər.

-(gülür) Mənim artıq varımdır və qarderobum doludur.

- Onda bunların olmaması narahat edər, yoxsa özünüz də ona alarsınız?

- (gülür) Bu haqda düşünməmişəm.

- Müəllim olarsa?

- Onda mənə deməsin ki, müğənnilikdən uzaqlaş. O da işləsin, qazansın, mən də.

- 200 manat əməkhaqqı alacaq.

- Onda mən artıq müğənni olmalıyam.

- Belə çıxır ki, işləyib həm də kişini saxlayacaqsınız...

- (gülür) Düşünməmişəm. Siz məni çox tez ayıltdınız. Bəzən maddiyyat ailənin dağılmağında böyük rol oynayır. Məsələn, oğlan kasıbdır, öz maddi səviyyəsində qız alır. Sabah uşaq dünyaya gəlir, evin kirayəsi, uşağın bezi, corabı...beləcə ailə dağılır. Ailə quran isan öncədən düşünməlidir.

- Ailənin hansı büdcəsi olmalıdır ki, onun qarşılığında peşənizdən də uzaqlaşasınız?

- Hər ailənin bir büdcəsi var. Əgər mən müğənni olmasam, görün həyatımdan nələr çıxır. İki menecerimin əməkhaqqı, sürücü, gözəllik salonu, səhnə geyimləri...

- Bunlara aylıq 3-5 min xərciniz çıxır?

- Daha çox.

- Azərbaycanda bir ailə təxminən min manata ayı başa vurur. Bu hələ yüksək göstəricidir. Siz bu məbləğə ailəni bir ay dolandıra bilərsiniz?

- Mən yox, yalan deyərəm.

- Bəs iki min manata?

- Beş min manat olsa, idarə edərəm.

- Ayan, demək olarmı ki, sizi son olaylar tanıtdı?

- Xeyr, doqquz ildir səhnədəyəm. Bu olaylar baş verəndə mən Ayan idim.

- Son olaraq, sevənlərinizə sözünüz

-Əgər bu gün məni sevirlərsə, deməli, Allahın seçilmiş bəndələrindən biriyəm. Sevənlərimə deyərdim ki, məni olduğum kimi qəbul edin. İnsanın gözündən hər şeyi oxumaq olur. Yalan sözdür ki, insanı on ilə tanımaq olur. İnsanı tanımağa bir saat da bəs edir.

İntiqam VALEHOĞLU
Ölkə.az