“Heç kimə arzulamıram dostlarını xəstə yatağında tanısın”

Şairə Nazilə Səfərli vəfat edən meyxanaçı Xəyyam Əhmədli ilə bağlı paylaşım edib.

Ölkə.Az xəbər verir ki, o, instaqram səhifəsində "Heç kimə arzulamıram, dostlarını xəstə yatağında tanısın. Xəyyam Əhmədli, Allah rəhmət eləsin" sözlərini yazıb.

Qeyd edək ki, meyxanaçının sağalması üçün ona qiyməti 130 min dollarlıq süni ürək aparatı lazım idi. Həmin məbləğin toplanılmasında meyxanaçılar bir araya gələrək yardıma başlamışdılar. 

Meyxanaçı Namiq Qaraçuxurlu bununla bağlı yerli mətbuata açıqlama verərək mərhumun əməliyyatına dəstək olmaq istəyən şəxsdən danışıb.

O bildirib ki, Xəyyamı Rusiyaya aparmağa hazırlaşsalar da, alınmayıb:

"Meyxanaçılar Xəyyam üçün 70 min manatdan çox pul toplamışdı. Amma onun əməliyyatını etdirmək istəyən şəxs dedi ki, bütün pulu özüm ödəyəcəyəm. Həmin şəxs onu Moskvada əməliyyat etdirmək istəyirdi. Xəyyam isə bildirdi ki, Belarusda həkim tapıb və oranı istəyir. Xərci çəkən adam da dedi ki, harada istəyirsiniz etdirin, mən məbləği ödəyəcəyəm. Hətta yolxərcini də öz üzərinə götürmüşdü. Düzdür, onun xarici ölkəyə aparılması riskli idi. Hələ bir il əvvəl Xəyyam reanimasiyaya yerləşdiriləndə həkimlər bildirmişdi ki, gedin dəfnə hazırlaşın. Onun bir il yaşaması möcüzə idi.

Həmin məbləğ ailəsinə veriləcək. Onlar nə məsləhət bilərlər edərlər. Mən öz və Xəyyamın ailəsinin adından bütün meyxanaçılara, ona dəstək olanlara təşəkkür edirəm".