Hamamdakı Tünzalə, Röyadan təqdirəlayiq hərəkət, "narkoman" Lalə, rəqqasə Sevda...
Ölkə.Az milli.az-a istinadən jurnalist İntiqam Valehoğlunun müəllif layihəsi olan "Həftəbecər"i (63-cü say) təqdim edir.
"Camaaat, gəldim e, gəldim". Bax siz gələn həftədən teleməkanda bu sözləri eşitməyəcəksiniz. Bəli, düz oxudunuz, gələn həftədən "Sevimli şou" efirdə olmayacaq. MTRŞ belə qərar verib. Getdi e, getdi... Amma necə deyərlər, çox da şey eləməyin. Çünki qərar dəyişə də bilər.
İkinci xəbərim də xoş olmaya bilər. Məlumunuz olsun ki, Mingəçevir Dövlət Dram Teatrının aktyoru, yox, yox, direktor müavini (adını yazıb layihənin reytinqini aşağı salmaq istəmirəm) demişkən, ali dərəcəli aktyoru Asim Məmmədov intihar etmək istəyirmiş. Son anda dost-tanış yığışıblar ki, ay kişi, özünə gəl, ayıbdır, intihardan vaz keç. Hələ teatr bununla bağlı bəyanat da yayıb. Bəyanat e. Rəhmətlik Səyavuş Aslan demişkən, "nervidən" adamı gic gülmək tutur, mən ölüm. Direktor da sosial şəbəkədə bir status yazıb, başlayıblar xəbəri yazan jurnalisti, yəni məni təhqir etməyə.
Röya, deyəsən, yavaş-yavaş tənqidlərdən nəticə çıxarır. Ona görə bu dəfə əməkdar artistin sözlərini təqdir etmək lazımdır. Sitat: "Özünü mənə oxşadanlara heç nə deyə bilmərəm, çünki onlar məni sevən insanlardır. Səhnədə geyimim üçün saatlarla bir paltarın üzərində çalışırlar. Amma oğlumu 1-ci sinifə apararkən, ordakı valideynlərdən yüksək olmamaq üçün 21 manatlıq paltar geyinmişdim. Bahalı geyinmək, kimisə əzib keçmək mənə yaraşmaz. Amma səhnə tamam başqadır".
Bax bu açıqlamaya ƏHSƏN demək olar. Əgər 2016-cı ildə müğənninin ağlı kəsirsə ki camaatın qüruruyla oynamaq olmaz, bu, gerçəkdən də, təqdirəlayiqdir. Amma hayıf ki, "200 manatdan aşağı kostyum geyinmirəm" deyən bəziləri ilə eyni havanı udmağa məhkumuq.
Rəqqasə, sonradan isə müğənni Sevda Sanaliyevanın əri də yaman qısqancmış. Eşitdiyimə görə, deyib ki, indiyə kimi nə olubsa, olub. Bundan sonra otur evdə, ancaq səviyyəli məclislərə get filan. Nə olubsa deyəndə, ağlınıza pis fikir gəlməsin. Yəni indiyə kimi nə oxuyub oynamısan, bəsindir. Hətta gör nə qədər qısqancdır ki, Sevdanı aktrisa kimi filmlərə, seriallara çəkilməyə də qoymur. Hələ indi oxuyuram e bunu. Sən demə, hətta o vaxt nişanlı imişlər. Yəni bu qadağanı qoyanda. Kişidə hökmə bax ha.
Əməkdar artist Lalə Məmmədova səhnəmizdəki tək-tük intellektual sənətçilərdəndir, hətta yanılmıramsa, hazırda elmi iş üzərində çalışır. Məsələn, ingilis dilini bilir, pedaqoji fəaliyyəti var. Bütün bunları ona görə sadalamıram ki, biz yaxın dostuq. Bəli, mənim onun, onun da mənim mövcudluğumdan, peşələrimizdən, nə dərəcədə peşəkar olduğumuzdan xəbərimiz var. Fikrimcə, qarşılıqlı hörmətimiz də var bir-birimizə. İntəhası, bu sözü deməsəm, vicdanım məni bağışlamaz. Məsələ burasındadır ki, Lalə xanım hər zaman ən maraqlı açıqlamalarını televiziyaya verir. Elə bu günlərdə verdiyi açıqlama kimi:
"Həyatımın çox ağrılı günləri xəstələndiyim an idi. Səhnədə ayaqlarım tutulmuşdu. Özümdə güc tapıb ayaqda dayanmışdım. Çəkiliş canlı idi. Bəxtim onda gətirdi ki, qaranlığıydı, halımın pisləşdiyini çox adam görmədi. Bu xəstəliyimi heç kim bilmir. Ayaqlarım tutulmuşdu. Elə ağrılar olurdu ki, onu sözlə ifadə edə bilmərəm. Ağlım başımda olmurdu. Həkim müayinəsindən sonra bəlli oldu ki, onurğa sütunumda problem var. Ümidsiz şəkildə müalicəyə başladım. Bir günün içində 70-80 yaşlı qoca qadına dönmüşdüm. Bir dəfə də ağrı başlayanda tibb bacısına yalvardım ki, "mənə narkotik tap gətir". Çantamda nə qədər pul varsa, hamısını verməyə hazır idim. Lalə Məmmədova, ailəli qadın, övladım var idi... Bunları düşünmürdüm. Yarımcan insan olmuşdum. Düşünürdüm ki, övladıma analıq edə bilməyəcəm, karyeram bitdi. Bir həkimlə tanış oldum, türkəçarə ilə məni sağaltdı".
İnanmıram ki, Lalə Məmmədova hansısa sayta, qəzetə belə bir açıqlama verərdi. Axı sənətçilərin aləmində mətbuat "ikinci növ" jurnalistikadır. Baxmayaraq ki, efirlər hər zaman məhz bizim materialları çırpışdırıb efir vaxtını doldururlar.
Bu həftənin daha bir üzücü xəbəri əməkdar artist Rəhman Rəhmanovun oğlu Emil Rəhmanovun oğlunun yenidən həbs olunmasıydı. Bu haqda geniş nəsə demək olmur. Deyiləcək bir şey var ki, Azərbaycan səhnəsi çox böyük bir səsi kəşf etmədən itirdi. Kim razılaşmasa, Emil Rəhmanov adı ilə axtarış verib ifalarını dinləyə bilər.
Əməkdar artist Tünzalə Ağayeva yenidən 2001-ci ildəki imicinə qayıdır, başını bağlayıb. Amma və lakin bu dəfə bir fərq var. Sənətçi bu dəfə başını bağlayıb, qolunu, çiynini örtmək yadından çıxıb. Bəlkə də özü belə istəyib. Bəzi saytlar da götürüb yazıblar ki, guya foto hamamda çəkilib. Hələ Tünzalənin özünü Röyaya oxşatdığını iddia edənlər də tapılıb. Mən də baxdım. Heç bir oxşarlıq görmədim. Röya maksimalist adamdır, bu məsələdə daha cəsarətlidir. Tünzalədə vəziyyət bir az başqadır. O, heç vaxt risk eləməz. Uzaqbaşı çiynini açar, vəssalam.
