2015-ci ildə konsert verən məşhurlarımız
Son illər ölkəmizdə solo konsert verən sənətçilərin sayı xeyli azalıb.
Məsələn, bir neçə il öncə ildə 2-3 solo konsert verən müğənni indiki halda bunu bir gündə 2-3 toyda oxumaqla "kompensasiya" edir. Arqument isə bundan ibarətdir ki, konsert salonlarının icarə haqqı çox bahadır. Bəs görəsən son bir ildə çətinliklərə rəğmən tamaşaçılarına hesabat verən məşhurlar kimlər olub?
Ölkə.az məsələ ilə bağlı kiçik araşdırma aparıb...
Ötən ilin ilk solo konserti tanınmış xanəndə Elnarə Abdullayevadan gəldi. Abdullayea fevralın 21-də "Zəfər çalacağıq" adlı iki günlük solo konsert proqramı ilə Heydər Əliyev adına Sarayda çıxış etdi. Hətta bu konsertdə nadir hallarda sənətçilər haqda söz deyən SSRİ xalq artisti Zeynəb Xanlarova da fəxri qonaq qismində iştirak edirdi.
Ötən il fevralın 21-də reper-yazar Elxan Qaraqanın solo konserti baş tutdu. Yeri gəlmişkən, qeyd edək ki, konsertdə qonaq qismində Əli Xəyyam, Okaber, RG. kimi məşhurlar da iştirak edib, yeni parçaları ilə yanaşı, köhnə və sevilən hitlərini də səsləndiriblər.
Azərbaycanın xalq artisti, Dövlət Akademik Opera və Balet Teatrının solisti Fidan Hacıyeva isə aprelin 19-da Heydər Əliyev Sarayında solo konsert proqramı ilə tamaşaçılara hesabat vermiş oldu. Xatırladaq ki, Hacıyevanı Opera və Balet Teatrının 150 nəfərdən ibarət Simfonik Orkestri müşayiət edirdi.
Aprel ayında ölkənin əsas konsert salonunda daha bir konsert proqramı baş tutdu. "Planet parni iz Baku" KVN teatrı bu dəfə də ənənəsinə sadiq qaldı.
Konsertlərlə zəngin olan aprel ayının daha bir maraqlı tədbiri Baku Jazz Center-də baş tuturdu. Ayın 26-da gənc olmasına rəğmən, yetərincə tanınan reper Aid-in konsertinə də yetərincə pərəstişkarı gəlmişdi. Özünün solo karyerası boyu 40-dan artıq mahnı yazan reper həm köhnə hitlərini, həm yeni parçalarını sevənlərinə təqdim etdi.
Tanınmış nağara ifaçısı, əməkdar artist Natiq Şirinov konsert üçün mayın 2-ni seçmişdi. Beynəlxalq Muğam Mərkəzində keçirilən tədbirdə əməkdar artistlə yanaşı, yaradıcısı olduğu "Natiq" ritm qrupu da çıxış edirdi.
Mayın 15-i isə keçmiş "N brothers"çi, müğənni Abdul Xalidin konserti ilə yadda qaldı.
Tanınmış müğənni Emin Ağalarov pərəstişkarlarına hesabat üçün iyulun 16-cı gününü seçmişdi. Bu, Yaşıl Teatrdakı Eminin sayca 7-ci solo konserti idi.
Bu günlərdə daha çox qalmaqalları ilə gündəmdə olan xalq artisti Aygün Kazımovanın ötənilki konserti isə sözün əsl mənasında yayın cırhacırına təsadüf edirdi. Estrada ulduzu avqustun 21-də dənizkənarı məkanların birində konsert verib. Maraq üçün qeyd edək ki, sənətçinin bu konserti həm də onun səhnədə növbəti dəfə yıxılması ilə yadda qalıb.
Keçmiş "Dəyirman"çı Miri Yusif isə Milli Musiqi Günündə (18 sentyabr) pərəstişkarlarına hesabat verirdi.
"Bu şəhərdə" konsert üçün oktyabrın 8-12-si aralığını seçmişdi. Əməkdar artistlər Rafael İsgəndərov və Coşqun Rəhimov hələ də son illərin ən çox konsert verən məşhurları kimi öndədirlər.
Oktyabrın 9-da Beynəlxalq Muğam Mərkəzində əməkdar artist Fərqanə Qasımovanın solo konserti baş tutub. Konsertin yaddaqalan məqamlarından biri Qasımovanın Azərbaycanda uzun müddətdir ifa olunmayan "Nəva" muğamını ifa etməsi idi.
Ötən ilin payızında - 26 oktyabrda Bakı Beynəlxalq Caz Festivalı çərçivəsində Salman Qəmbərovun caz konserti keçirilib.
Bundan iki gün sonra dahi bəstəkar Fikrət Əmirovun oğlu, əməkdar incəsənət xadimi Cəmil Əmirovun konserti keçirilirdi.
Həmin ərəfədə Azərbaycan Dövlət Filarmoniyasının səhnəsində Emil Əfrasiyabın konserti baş tuturdu.
Noyabrın 1-i isə Beynəlxalq Muğam Mərkəzində pianoçu Elçin Şirinovun konserti idi.
Noyabrın 21-i Müslüm Maqomayev adına Azərbaycan Dövlət Filarmoniyasında dünya şöhrətli opera müğənniləri, Azərbaycanın xalq artistləri Fidan və Xuraman Qasımova bacıları "Sizinlə bu axşam Fidan və Xuraman" adlı geniş konsert proqramı ilə çıxış ediblər. Anşlaqla keçən konserti dirijor, xalq artisti Teymur Göyçayevin bədii rəhbərliyi ilə Qara Qarayev adına Azərbaycan Dövlət Kamera Orkestri müşayiət edirdi.
Dekabrın 6-da "Səs” şou proqramının yaddaqalan ifaçılarından olan Nərgiz Zakirovanın konserti keçirilirdi.
Cavan, istedadlı və artıq məşhur cazmen Etibar Əsədli isə solo konsert üçün 22 dekabrı seçmişdi.
Dekabrın 24-ü Beynəlxalq Muğam Mərkəzində əməkdar incəsənət xadimi, bəstəkar Aygün Səmədzadənin yaradıcılıq gecəsi keçirilirdi. Konsertdə tanınmış müğənnilərdən Eyyub Yaqubov, Aygün Bəylər, Lalə Məmmədova, Ayaz Qasımov, Nurlan Növrəsli, Leyla İdrisova, instrumental ifaçılardan isə Ənvər Sadıqov və Elnur Əhmədov (kamança) iştirak edirdi.
Məhbubə Gülməmmədova
Ölkə.az
