"Zərb çalanda güləş hərəkətlərindən də istifadə edirəm"
Onu sosial şəbəkələrdə tanımayan yoxdur. Bir çox videoları mübaliğəsiz-filansız bəzi xalq artistlərindən daha çox baxılır. Düzdür, baxış sayı göstərici olmasa da, onu sevənlərin sayı da az deyil. Lakin bütün bunlarla yanaşı, inanıram ki, onun adını da indi oxuyursunuz.
Beləliklə, Ölkə.az-ın suallarını son zamanlar sosial şəbəkələrin fenomeninə çevrilmiş zərb ifaçısı Rəşad Allahverənzadə cavablandırır.
- Rəşad bəy, istərdim əvvəlcə özünüz haqda danışasınız.
- Qubalıyam, Qubada yaşayıram, 33 yaşım var. Uşaqlıqdan zərb alətləri ifa edirəm. Bu sənəti də atam Qədir Allahverənzadədən öyrənmişəm. O, şimal zonasının ən güclü zərb və nağara ifaçısı olub, 1998-ci ildə dünyasını dəyişib. Atam dünyasını dəyişəndən sonra kasetlərini qoyub baxmışam, evdə məşq eləmişəm. Bir az dəcəl uşaq idim. Atam birinci sinifdən məni özü ilə toylara aparırdı, qoşa nağara çalırdım. Ondan sonra da özüm toylara getmişəm.
- Sizi digər zərb ifaçılarından fərqləndirən qeyri-adi maneralarınızdır. Atanız da ifa edərkən bu cür edirdimi, yoxsa bu sizin yeniliyinizdir?
- Atamın da özünəməxsus hərəkətləri olub. Bu hərəkətləri də onun əlinə baxıb götürmüşəm.
- Məsələn, ayağınızla zərb "ifa edirsiniz". Atanız da belə edirdimi?
- Xeyr.
- Onda bu sizin yeniliyinizdir.
- Bəli.
- Bəs atanızın zərb ifaçısı kimi fərqi nə idi?
- Onun ifası tamam fərqli və daha mükəmməl olub. Atamgil dörd qardaş olublar, üçü, eyni zamanda qardaşı oğlanları musiqiçidir.
- Nə vaxtsa idmanla məşğul olmusunuz? Çünki zərb çalarkən bəzi idman hərəkətləri də edirsiniz...
- Bəli, güləşlə məşğul olmuşam.
- Zərb çalarkən güləş elementlərindən istifadə elədiyiniz olur?
- (gülür) Hərdən olur. O hərəkətləri edəndə ifam yerində qalır. Sadəcə, rəngarənglik olur.
- Bu hərəkətləri diqqət çəkmək üçün edirsiniz, yoxsa istəmədən alınır?
- Özü alınır.
- (zarafatyana) Bir videonuz var, ayağınızda ağ corab. Ayağınızı qaldırırsınız zərbin üstünə... Orada fikriniz nə idi? Bu da yenilik gətirmək idi, yoxsa sənətdən insanları küsdürmək?
- (gülür) Elə şey olmayıb.
- Yəqin ki, şimal bölgəsinin məclislərinə daha çox dəvətlər alırsınız.
- Təkcə şimalda deyil, bütün bölgələrdə məclislərdə oluram.
- Toyda bu cür ifanızı xüsusi istəyənlər olur?
- Elə olanda toy daha da maraqlı gedir.
- Məhz bu cür ifana görə dəvət edib deyirlərmi ki, gəl, şou göstər?
- Bu, mənim özümdən asılıdır, istəsəm şou göstərərəm, istəməsəm göstərmərəm.
- Toylara ansamblla gedirsiniz, yoxsa solo?
- Öz dəstəm də var, ayrı da gedirəm.
- Toya neçəyə gedirsiniz?
- Altı nəfərlik ansamblla 450-500 manata.
- Yəqin ki, ansamblın rəhbəri kimi qonorarınız daha çox olur.
- 350 manat uşaqlarındı, 100 manat mənim.
- Məsələn, Ağstafaya, Qazaxa toya neçəyə gedərsiniz?
- Baxır adamına, bəlkə kasıb adamdır. Dəqiq qiymət deyə bilmərəm.
- Nağara və zərb ifaçıları sizin videoları paylaşıb tənqid edirlər...
- Olur, olur. Amma bu dəqiqə Qubada ən qabaqda olan zərb ifaçısı mənəm. Bakıdan məni duelə çağırıblar, gəlmişəm, rəqib gəlməyib.
- Kim olub?
- Biz ona "Elişka" deyirik, Zeynəb Xanlarovanın ansamblındakı məşhur zərb ifaçısı Eyvaz Rzayevin tələbəsidir.
- Azərbaycanda sizdən güclü zərb ifaçıları kimlərdir?
- Mənimçün ən gözəl zərb ifaçısı bakılı Mirzəli olub.
- Nağara ifaçılarını dinləyirsinizmi?
- Buzovnalı Gülağaya, Elşad Şəkiliyə, Ceyhun Dağlıya qulaq asıram. Hərdən Eyvaza da qulaq asıram. Amma onda nağara uğurlu alınmır. Zərb ifaçısının zərbdə qalmağı yaxşıdır. Nağara "pramoy"u sevir, zərb isə xırdalıqları.
- Nağara daha çətin alətdir, yoxsa zərb?
- Zərb. Zərbin xırdalıqları çoxdur. Zərb adamı tez yorur, hərəkət tələb edir, əl partlayır. Çünki nağaranın kənarları lakdır, zərbdə dəmir.
- Zərb hansı millətə məxsus alətdir?
- Şərq alətidir.
- Nə zamansa peşənizin təhsilini almaq istəyiniz olub?
- Ona ehtiyac yoxdur, çünki atamın yanında olmuşam. Beş-altı il onun yanında toylara getmişəm.
- Sosial şəbəkələrə videolarınızı kim yayır?
- Dost-tanışlar, sevənlər çəkirlər. Özüm cəmi bir video paylaşmışam.
- Tələbələriniz var?
- Tələbəm yoxdur, oğlumu öyrədirəm. Oğlumun 14 yaşı var, hələ toylara getməyinə icazə vermirəm. Çünki çox tezdir. Zərb ağır alətdir.
- Bakıdakı tanınmış musiqiçilərlə münasibətiniz necədir?
- Toylarda görüşürük. Baloğlan Əşrəfovun ansamblı ilə bir məclisə düşdük. Baloğlan müəllim ansamblındakı zərb ifaçısını qoymadı çalsın. Dedi ki, camaat bunu istəyir, qoy bu ifa etsin. Deyəsən həmin ifaçı onun yeznəsidir. Əlikram Bayramovla, digər tanınmış oxuyanlarla məclislərdə olmuşuq.
- Qayıdaq yenidən ifanıza. Zərbi bu formada ifa etmək onu aşağılamaq kimi görünmür ki?
- Xeyr.
- Yəqin ki, ifa etdiyiniz alətlər bahalıdır...
- İki zərbim var, hərəsi min manatdır. Qızılı rəngdə olan atamın, digəri Eyvaz Rzayevindir.
- Çay evlərinin birindən videonuza baxdım. Bu cür məkanlarda da ifa edirsiniz?
- Onlar öz uşaqlarımızdır, meyxana deyənlərdir. Qonaq kimi çağırmışdılar.
- Xəbəriniz varmı ki, sosial şəbəkələrdə yetərincə tanınırsınız və əksəriyyət də sizi qınayır, hətta bəziləri ələ salır? Bir sözlə sizlə bağlı münasibət birmənalı deyil. Ancaq etiraf edim ki, bəyənənlər də var.
- Məni bəyənməyənlərin, qısqananların əlli faizi musiqiçilərdir.
- Niyə?
- Çünki İran toyunda da olmuşam, millət ayaq üstə alqışlayıb. Ona görə paxıllıq edirlər. ATV-də Zaurun apardığı "Tanıdım səni" layihəsinin qaliblərindən biri olmuşam. Sonra bəzi səbəblərdən Bakıya gələ bilmədim.
İntiqam VALEHOĞLU
Ölkə.az
