Aygündən yeni layihə

Xalq artisti Aygün Kazımova "Əsgər marşı" adlı yeni layihəsini təqdim edib

Ölkə.Az-ın məlumatına görə, bəstənin sözləri Cəlal Qurbanova, musiqisi və aranjimanı isə Yaşar Baxışa aiddir. Sənətçi saytımıza açıqlamasında yeni layihəsi barədə bunları deyib:

"Vətənpərvər ruhda olan mahnılarımın əksəriyyətinin müəllifi dostum Cəlal Qurbanovdur. Yaşar Baxış ilə məni uzun illərin yaradıcı yolları bağlayır. Marşı vətənpərvər mahnıların peşəkar ifaçısı Şəmistan Əlizamanlıya da təqdim etmişik. O da ifa edib. Onun ifasında da "Əsgər marşı" çox uğurlu alınıb".

Xalq artisti bildirib ki, vətənpərvərlik ruhunda ifalarının ardı gələcək.

"Bütün əyləncə ruhlu layihələrimi dayandırmışam. Fikrim əsgərlərimizin yanındadır. Ona görə vətənpərvər ruhlu layihələrə başlamışıq. Haqqımda ölüm xəbəri, şər-böhtan, təxribat xarakterli xəbərləri yayan, yazan, danışan və bununla qalmaqal yaradıb gündəmə gəlmək istəyən insanlara demək istəyirəm ki, hal-hazırda çox məşğulam. Sizə cavab verəcək zamanım heç yoxdur. Bir az xəttdə qalın...".

Aygün Kazımova yaxın günlərdə "Əsgər marşı"nın klip çəkilişlərinə başlayacağını da bildirib.

İntiqam VALEHOĞLU
Ölkə.Az