Vəkil: \"Bir də ayılacaq ki, Kamran Həsənliyə həbs qətiimkan tədbiri seçilib\"
Müğənni Samir Piriyevlə şoumen Kamran Həsənli arasında 80 minlik pul davası davam edir. Ötən gün şoumenin vəkili Türkel Süleyman aznews.az-a açıqlamasında bildirib ki, Samir Piriyev bu məsələdə K.Həsənlinin bacısı Gülər Həsənlidən şantaj vasitəsi kimi istifadə edir:
“Samir özünü nə sayır? Kamran güc naziridir, yoxsa Baş Prokurordur ki, müstəntiq ondan qorxa. Ötən dəfə mətbuata açıqlama verib ki, Kamrandan çəkinirlər. Niyə çəkinməlidirlər? Bizim istintaq orqanları MTN-nin generallarından çəkinmədilər, Kamrandan çəkindilər? Azərbaycanın istintaq orqanları yeri gələndə generalları həbs edir. Məsələ ondan ibarətdir ki, bu iş Samirin böhtan və yalan ərizəsi əsasında açılıb. Deyir ki, Kamran ona biznes üçün söz verib, sonra gedib Türkiyədə baxıb ki, həmin yerdə heç nə yoxdur, boş səhradır. Amma sonra istintaqa etiraf edib ki, həmin obyektlər mövcuddur, sahibini də görüb. O, Gülər xanımdan sadəcə şantaj üçün istifadə edir. Azərbaycan mentalitetidir də, düşünüb ki, bacısı ilə şantaj etsin”.
T.Süleyman onu da əlavə edib ki, G.Həsənli bu prosesdə şahid qismindədir:
“Bu günə kimi Gülər xanıma heç bir bildiriş gəlməyib. Samir ərizəsində yazıb ki, pulu Bakıda Kamran Həsənliyə verib. Belə olan halda Gülər xanımlıq heç nə qalmır. Əgər siz pulu mənə vermisinizsə, mənim bacımın, qardaşımın bura nə aidiyyəti? Pulu verdiyin şəxsdən tələb elə. Əslinə qalsa o, pulu Kamrana deyil, obyektə verib. Görəndə ki, yalanları üzə çıxır, başladı Güləri bu oyuna salmağa. Şahidi deyir ki, pulu 2009-cu ildə Heydər Əliyev Mərkəzinin yanında maşında vermişəm. Halbuki həmin il o mərkəz tikilməyib. Sonra dedi ki, prezident iqamətgahının yanında çayxanada vermişəm. 80 min pul verəsən, amma yadında qalmaya ki, onu harada və necə vermisən?”.
Samir Piriyevin vəkili Ruslan Əhmədoğlu isə Ölkə.Az-a açıqlamasında qarşı tərəfi qanunları bilməməkdə ittiham edib:
"Belə qərara gəldik ki, Kamran Həsənlinin soyadını bilmədiyim Türkel adlı vəkilinə qanunvericiliklə və Cinayət Məcəlləsi ilə bağlı müəyyən kitablar göndərək, oxusun. Qanunvericiliyi bilmirsə, neynəyək, təzədən vəkilə qanun öyrədək? Bu adam hey Türkiyədəki biznesdən danışır. Bu biznesin sənədlərini heç olmasa özü görübmü? 2008-ci ildə Kamran şirkətə şərik olur, guya əllərində şirkətlə şəriklik müqaviləsi var. Nə vəsait yatırdığı hesab nömrəsi, nə səhmdar olduğunu təsdiq edən sənəd təqdim edə bilmir. Əvəzində 2013-cü ilin hansısa müqaviləsini göstərir. Özü də deyir ki, şirkət 2011-ci ildə müflis olub. Kamran Həsənli 2011-ci ildə müflis olan şirkətlə iki il sonra müqavilə imzalayıb. Qaldı digər məsələyə, bəs Samir Piriyevə hansı sənədlər təsis payı ilə və ya hansı hesaba pul oturub deyə sənəd veriblər? Əlbəttə yox. Onlar Gülər Həsənlidən fikri yayındırmaq xətrinə hər cür fikirlər irəli sürürlər! Vəkil deyil e, rejissordur. Vəkil Kamran Həsənliyə narahat olma deyə-deyə bir də ayılacaq ki, Kamran Həsənliyə həbs qətiimkan tədbiri seçilib!"
Mövzunu diqqətdə saxlayacağıq.
İntiqam VALEHOĞLU
Ölkə.Az
