Xəyal Rzazadə yeni klipini təqdim edib
“Səni unutmaq” mahnısıyla qısa müddətdə tanınan müğənni Xəyal Rzazadə yeni klipini təqdim edib.
Ölkə.Az xəbər verir ki, həmin mahnıdan sonra karyerasına qısa müddətlik ara verən Xəyal Rzazadə yeni layihə ilə geri dönüb. Müğənni klipi barədə fikirlərini saytımızla bölüşüb:
“Bir müddət yeni layihələr üzərində çalışdığımız üçün karyeramda durğunluq var idi. Amma indi yeni mahnım olan “Qayıt”a klip çəkdirdim. Sosial şəbəkələrdə klipin qısa videosunu paylaşdıq və aldığımız reaksiya məni və komandamı çox sevindirdi. Artıq bir neçə gündür ki, klipi tam yayımlamışıq və düşünürəm ki, qısa müddət ərzində istədiyimiz nəticəni əldə etdik”.
İfa tərzi və klipləri ilə fərqlənən Xəyal Rzazadə tezliklə dinləyicilərini sevindirəcəyinin müjdəsini verib:
“Yeni klip və mahnı ilə yanaşı, ilk albomum üzərində işlərə başlamışıq. Artıq mahnılar hazırlanır. Albomdakı mahnılarda da Ramin Vəlibəyovla, İsmayıl Əsədovla çalışacağıq”.
Qeyd edək ki, “Qayıt” mahnısının sözləri İsmayıl Əsədova, musiqisi və aranjemanı Ramin Vəlibəyova məxsusdur. Klipin prodüsseri mahnının musiqisinin müəllifi olan Ramin Vəlibəyovdur.
