Tolikin məscidi, Manafın 3 mini, Bilal və Arda
Ölkə.Az milli.az-a istinadla jurnalist İntiqam Valehoğlunun müəllif layihəsi olan "Həftəbecər"i (75-ci say) təqdim edir.
O gün axşamüstü Yasamal qəbristanlığı tərəfdən üzü "Qurd qapısı"na tərəf gedirəm. Gördüm bir boy-buxunlu yarlı-yaraşıqlı oğlan əlində çatı harasa tələsir. Adam o qədər yaraşıqlıdır ki, elə alaqaranlıqda da fərqlənir. Sümüyüm sancdı ki, bu işdə bir əmma var. Qardaşı sorğu-suala tutdum. Dedi ki, o gün "Həftəbecər" adlı layihənin müəllifinə bir xanım "yaraşıqlı jurnalist" yazıb, mən də bu müsibətə dözməyib, özümü asmaq qərarına gəlmişəm. Dedim, qardaş, məni tanıdınmı? Dedi, yox. Dedim, bax elə həmin o "yaraşıqlı" jurnalist mənəm, hamısı fotoşopun zibilləridi, cavansan canına qıyma. Qardaşın da hardasa 190 santimetr boyu 100-110 kiloqram çəkisi olar. Gördüm inanmadı, hələ bir mənə də hirslənib. Yaxşı ki, şəxsiyyət vəsiqəm üstümdə idi. Çıxartdım, göstərdim ki, buyur, bu da mənim ad soyadım - Alıyev İntiqam Valeh oğlu. Yalan olmasın, bir saat çəkdi mənim o yaraşıqlı, boy-buxunlu qardaşı fikrindən daşındırmağım. Bu söhbət haradan yadıma düşdü? Xahiş edirəm, "Həftəbecər"də fotolara yox, yazının özünə münasibət bildirəsiniz. Bir dəfə də yaraşıqlı jurnalist yazacaqsınız, başqa bir əsl yaraşıqlı eloğlu gedib özünü atacaq dənizə, xəbərimiz olmayacaq. Bir də ki, şəkil çəkdirəndə o fotoşop nənəsiölmüşün evini yıxmayın, az istifadə edin ki, yolda-izdə görəndə tanıya bilək.
Xuraman Laçınlını ("Şuşalı" təxəllüsü daşısa da, əslən Laçınlıdır) bərk hirsləndiriblər. O da arxasınca danışanlara yaman sərt cavab verib. Cavab çox uzundur, amma axırıncı cümlədə dəyərli məsləhət verib: "Qeybətimi edənlər, günahımı almayın. Öz yükünüzü çəkin, mənim yükümü daşımayın, yazıqsınız". Bax bu etirafı etmək oğul istəyir. Yəni yüküm o qədər ağırdır ki, çəkə bilməzsiniz, yazıqsınız. Deyiləcək bir söz var - əhsən!
Əməkdar artist Elnarə Abdullayeva həmkarları haqda sərt danışıb. Amma yazsam, sonra özü demişkən, bir hoqqa durğuzar ki, gəl görəsən. Yaxşısı budur, özünüz tapıb oxuyun. Nəysə konsert söhbətidir.
Müğənni Elçin Cəfərov özünə bəzi saytlar demişkən, qadağalı toy elədi. Yəni mətbuata qapalı toy. Amma nə yalan deyim, toy necə qapalı keçibsə, bax elə bu dəqiqə məclisin tamadasının, administratorun, operatorun köməkçisinin, ofisiantların adlarını da deyə bilərəm. Qardaşım, axı bu hoqqabazlıq kimə lazımdır?
Yeri gəlmişkən, toya gələnlər arasında Elçinin pərəstişkarları da olub. Özü də dəvətsiz gəliblərmiş. Eləcənə şəkil çəkdirib gediblər. Allah bekarçılığın üzünü qara eləsin. Cəfərovun fikrindən sitat: "Toyda elə insanlar var idi ki, onların görüntülənməsinə icazə yoxuydu".
Doğrudan da, deməyə söz tapmıram. Axı elə həmin o "gizli qonaqlar"ın bir çoxunu məclisdəki digər qonaqlar çəkib partapart sosial şəbəkələrdə paylaşırdılar. Bəs mən ofisiantların adını haradan bilirəm? Əgər belə vacib idisə, toya gələn qonaqların mobil telefonlarını yığardınız. Bu da olardı şou aləmində yenilik.
Ötən həftə bir qrup müğənni mətbuatın "tələsinə" düşdü. Şərti müştəri qismində olan jurnalist bir neçə sənətçidən toyuna daha ucuz qiymətə gəlməyi xahiş elədi. Özgə vaxt dəsmal çıxarıb ağlayan adamlar 10-15 min qiymət oxudular. Vasif Məhərrəmli isə efirdə təlim-tərbiyəsinə xas ifadələrlə jurnalist barədə xoşagəlməz ifadələr səsləndirdi.
Müğənni Manaf Ağayev deyib ki, aprel ayında cəbhədəki döyüşlərdə o da üç min manat xərc çəkib. Daha doğrusu, döyüşlərə yox, oralara gedib-gəlməyə. Ardınca deyib ki, axı mən niyə bununla reklam olunmalıyam? Bax, məncə, bu da rekorddur. Çünki son hadisələrdə heç bir müğənni bu qədər xərcə düşməyib. Düşsəydilər, reklam edərdilər, amma gördüyünüz kimi Manaf müəllim reklam etməyib, sadəcə, fikrini bildirib.
Müğənni Rəqsanənin qızı Aysun türkiyəli nişanlısı Əli Tanrıkulu ilə fotolarını paylaşıb və belə bir şərh yazıb: "Məni o qədər sevir ki, qəlbimin ritmi dəyişir". Deyirəm, görəsən, indi Aysunun qəlbinin ritmi 6-8-dir, salsa ritmindədir, samba üstündədir?.. Bax onu bilsək, bir eksklüziv xəbər düzəldərdik. Başlıq da belə olardı: "Aysunun ürəyi samba ritmi ilə döyünür - Eksklüziv".
Bilal Əliyev 2-3 il toylara getməyəcək, ingilis dilində öyrənib sonra konsertlər verəcək. Özü də ingilis dilində. Əla fikirdi, amma Bilal müəllim hələ gəncdir, məncə, öz səhnəmizdə daha da tanınandan sonra xarici arenaya çıxsa, daha yaxşıdır. Araqones 70 yaşında İspaniyanı Avropa çempionu eləmişdi, Bilal müəllimin isə hələ cəmi-cümlətanı 57 yaşı var, nə xəbərdi, qaçhaqaç deyil ki. On il əvvəl Arda Turanın ağlına gəlməzdi ki, "Barselona"ya transfer olunacaq "Qalatasaray"dan "Atletiko"ya, orada da "Barsa"ya keçdi. Bilal müəllim də bu təcrübədən yararlana bilər.
Prodüser Tolik məscid tikdirmək istəyir. Sitatı oxuyun, sonra deyəcəklərim var: "Azan səsi eşidəndə adamın ruhu dincəlir. Evimin qarşısından bir az aralıda məscid var. Azan səsi eşidəndə balkona çıxıram. Mən də istəyirəm ki, Türkiyədə olduğu kimi bizdə də hər məhəllədə məscid olsun. Azan səslənəndə hər yerdə eşidilsin. Allah mənə imkan yaratsın, bir qəsəbədə, ya da bir kənddə məscid tikdirim".
Öz canım üçün ciddi deyirəm, mən bu məsələdə Toliki dəstəkləyirəm. Bilirəm, indi çoxlarınız inanmayacaqsınız ki, bəlkə də kinayə ilə yazıram. Ay balam, Tolik olanda nə olar ki? O da bu xalqın övladıdır, Cavanşir də, Koroğlu da, Babək də, Samir Bağırov da, Rəhim Rəhimli də, Qorxmaz Əlili də, elə bax elə sənin, bəli-bəli sənin özü də. Əgər Tolik belə bir iş görsə, həmin məsciddən ilk reportajı şəxsən özüm hazırlayacağam. Yazacam ki, Tolik də məscid tikdirdi. Görün necə əzəmətli və maraqlı səslənir. Yoxsa ki, bütün günü saytlar yazır Tolik filankəslə dalaşdı, bəhmənkəslə məhkəmədə görüşdü, o biriylə saçyolduya çıxdı. Adamın dağ boyda ürəyi var. Görmədinizmi, elə şou tayfasından birinci hərbi paltarı da o geyinmişdi. Özü də ona yaraşırmış ha hərbi geyim. İki göz istəyirdi tamaşa eləsin. Mən onun həmin fotosuna yalan olmasın, 23 dəqiqə 58 saniyə baxdım, kövrəldim, fərəhləndim, qürrələndim, depressiyaya düşdüm. İndi görün bu adam nə qədər böyük qüvvə sahibidir ki, mənim kimi daş ürəkli adamı halbahal edir.
