İtkin düşən müğənni: \"Haqqımda bu sözləri yayanlar...\"

"Son iyirmi ildə xınayaxdılar demək olar ki, ləğv olunmuşdu. İki-üç il əvvəldən başlayaraq, yenidən dəbə mindi. Amma indi bəzi həmkarlar bu dəbdən istifadə edib, insanların cibinə girirlər. Bəzən elə qiymətlər eşidirəm ki, həmin pula rayon yerində üç oğula toy eləmək olar".

Bu fikirləri Ölkə.Az-a açıqlamasında müğənni Afət Fərmanqızı xınayaxdı məclisinə gedən həmkarları barədə danışarkən səsləndirib:

"Həmin xına məclisinə mən də gedirəm. Özü də musiqiçilərdən tutmuş, videooperatora, fotoqrafa qədər aparıram. Bütün adətlərimizə də lazımınca əməl olunur. Ancaq bəzi xına aparıcılarının dediyindən iki dəfə aşağı qiymət deyirəm. Ona görə yox ki, mənim pula ehtiyacım yoxdur. Sadəcə, çalışıram insanları başa düşüm. Onsuz da bu adət bölgələrimizdə daha çox qalıb. Rayon yerlərində isə insanların 4-5 mini ödəməyə imkanı yoxdur".

Afət Fərmanqızı bir neçə gün öncə yoxa çıxması barədə yayılan xəbərdən də danışıb:

"Xəbəri Ölkə.Az saytı yaymışdı. Əslində, sizi də qınamıram, məlumat vermişdilər, siz də görmüşdünüz ki, zəng çatmır, götürüb yazmışdınız. Ancaq belə xəbərləri məni xınayaxdı sahəsində görmək istəməyən adamlar yaydırırlar. Çünki artıq bir ildir bu sahədə olmağıma baxmayaraq, müxtləlif bölgələrdən olan insanlarımızın məclislərinə təkliflər alıram. Yəqin ki, yaxın günlərdə haqqımda belə şayiələri yayanların kimliyini öyrənib mətbuata açıqlayacağam."

İntiqam VALEHOĞLU
Ölkə.Az