Madonna məhkəməyə müraciət edib

58 yaşlı pop-diva Madonna yaşadığı binanın sahibini məhkəməyə verib.

Ölkə.Az xəbər verir ki, ulduz müğənni Nyu-Yorkun 64 Street ünvanında yerləşən dəbdəbəli binanın sahibini məhkəməyə verib.

Onun iddiasına görə, binanın sahibi Madonnanın yaxınlarına və ailə üzvlərinə pop ulduz evdə olmayanda binaya gəlməyə icazə vermir.

Adıçəkilən ünvanda yerləşən binada iki mənzil Madonnaya məxsusdur. Birinci mənzil 12 il əvvəl alınıb. O, uzun müddətdir ki burada yaşadığı üçün qayda-qanunlara yaxşı bələddir.

Bu səbəbdən də nə ulduz müğənni, nə də onun ailə üzvləri binanın digər sakinlərinə mane olmur. Madonnanın vəkilləri isə hesab edir ki, bina sahibi evi satıb və mülkün sahibi müğənnidir. Müğənni dünya şöhrətli ulduz olduğu üçün müntəzəm qastrol səfərlərinə çıxır. Bu zaman isə onun ailə üzvləri və yaxınları evdən istifadə edə bilmirlər.

Xatırladaq ki, bu, 2016-cı ildə baş tutan ikinci məhkəmə prosesi olacaq. İlk məhkəmə prosesi Madonnanın oğlu Rokkonun qəyyumluğu məsələsi olsa da, ulduz müğənninin iddiası təmin edilməmişdi. Rokko atası Qay Riçi ilə birlikdə Londonda yaşayır.

Hikmət
Ölkə.Az