Mehriban Xanlarovadan qızı ilə bağlı

Akademik Milli Dram Teatrının tanınmış aktrisası, əməkdar artisti Mehriban Xanlarova şəxsi həyatıyla bağlı ilginc açıqlama verib.

Ölkə.Az-ın məlumatına görə, aktrisa qızı Ayselin onun doğma övladı olmadığını bildirib:

“İlk dəfə şəxsi həyatımla bağlı sirrimi xalqımla bölüşürəm. Bütün Azərbaycan xalqı bilir ki, mənim bir qız övladım var. Aysel mənim rəhmətlik bacım Sevda Xanlarovanın yadigarıdır. Hər kəs mənə sual verir ki, Mehriban xanım niyə bu sirri açdınız? Sadəcə, istədim sağ ikən insanlar bunu məndən eşitsin. Dünyanın işini bilmək olmaz. Bu gün varıq, sabah yoxuq.

İstəmirəm mən dünyamı dəyişəndən sonra haqqımda artıq-əskik danışsınlar. Mən bu sirri açmaqdan utanmıram, nə də heç kimdən çəkinmirəm. Bunu da nəzərinizə çatdırmaq istəyirəm ki, Aysellə münasibətimiz əladır. Gələcək aylarda dördüncü nəvəm dünyaya gələcək.

Bu barədə jurnalistlər məndən müsahibə almaq istəyirlər. Mənə, menecerimə zəng vururlar, amma hələ ki, müsahibə vermək istəmirəm. Səhhətimdə problemlər var. Bir az istirahət etmək istəyirəm”.

Xatırladaq ki, M.Xanlarovanın qızı Aysel 2009-cu ildə ailə həyatı qurub.

İntiqam VALEHOĞLU
Ölkə.Az