Xoşqədəmə görə Əbülfəs Qarayev və Oqtay Şirəliyev məsuliyyət daşıyır
İntiqam VALEHOĞLU
Bu kadrları xeyli vaxt idi görmüşdüm. Hətta haqqında eşidib, amma görmədiyim kadrlar da var. Hər halda Xoşqədəmin yaxın "silahdaşlarından" öyrəndiyimə görə bu kadrlara rəhmət oxutduracaq görüntülərdir onlar. Bunun məsuliyyətini nə mən daşımıram, nə də redaksiyamız. Təbii ki, məsələyə cavabdeh olan tərəflər ATV, Xoşqədəm Hidayətqızı və MTRŞ-dır. Amma indi oxuyuram ki, qurum rəsmisi Toğrul Məmmədov efirə getməyən kadrlara görə nəsə danışmağın yersiz olduğunu bildirib.
Amma mənə maraqlı olan bilirsiniz nədir?
Dünyada bu kimi verilişlərin əksəriyyəti qurama olur və insanlar yalan olduğunu bilə-bilə məhz belə şoulara maraq göstərirlər. Həmin bu veriliş də nə az, nə çox düz üç il ard-arda teleməkanın ən reytinqli proqramıydı. Elə məhz bu verilişdə reklam yerləşdirmək də hər adama nəsib olmurdu. Çox güman ki indi də belədir.
Tutaq ki, bu kadrlar yayıldı və hamı gördü ki, Xoşqədəm camaatı aldadır. Guya sabahdan heç kim o verilişə baxmayacaq? İndi neçə nəfər baxırsa, iki o qədər də tamaşaçı qazanacaq bu proqram. İnanmırsınızsa, həmin videonu o verilişə ömründə bir dəfə baxmayan bir dostunuza göstərin. Əslində, Xoşqədəm Hidayətqızıyla bağlı məsələ aydındır və geniş şərhə də ehtiyac qalmır. Mən Səhiyyə Nazirliyini qınayıram ki, niyə onun adını əməkdar həkim siyahısına saldırmayıb. Çünki həkim həkimliyiylə xəstəyə neçə kub iynə vurmaq lazım olduğunu onunla məsləhətləşir. Mən deyəndə ki, Oqtay Şirəliyev yerində deyil, inanmırsınız. Bu məsələdə Əbülfəs Qarayev də günahkardır. Onun niyə günahkar olduğunu isə özünüz düşünün.
Oradakı ağ xalatlı qadın yəqin ki, həkimdir. Bax onun vicdanına şəxsən mənim şübhəm var. İndi o adam ayağa qalxmasın, heydən düşsün deyə, Xoşqədəmin xoşuna gəlsin deyə, verilişin reklamı bol olsun deyə, sən o ömrünü onsuz da boşa vermiş yazıq adama yarım kub nəsə vurmalısan? Məncə sənin kimi həkimə pambıq yığdırmaq yox, tövlə kürütdürmək də artıqdır.
