ATV-nin Xoşqədəm yalanı üzə çıxdı

Əməkdar jurnalist, "Səni axtarıram" verilişinin aparıcısı Xoşqədəm Hidayətqızı ilə Azad Azərbaycan Müstəqil Teleradio şirkəti arasında gərginlik davam edir. Bir neçə gün öncə yayılan məlum videogörüntülərdən sonra ATV-nin yaydığı məlumatda bir sıra maraqlı məqamlar yer alıb.

Ölkə.Az-ın apardığı kiçik araşdırma nəticəsində məlum olub ki, şirkətin bir neçə gün öncə yaydığı açıqlama ötən ilin aprel ayında yaydığı açıqlamanı təkzib edir.

2015-ci ilin aprelində ATV-nin mətbuata yolladığı açıqlamadan bir hissə:

"O ki, qaldı komanda məsələsinə, yəni birgə çalışdığı insanlarla birlikdə digər kanala keçməsinə, ATV kanalı olaraq bir daha bəyan edirik ki, adı çəkilən layihədə çalışan insanlar kanalın əməkdaşlardır, konkret olaraq hansısa şəxsin yox. Və digər tərəfdən həmin layihədə çalışanların ümumi sayı, Xoşqədəm xanım daxil 10 nəfər olub. Və onlardan 5 nəfəri hazırda da şirkətdə digər layihələrdə öz işlərini davam etdirirlər. Digər 4 nəfər isə hələ ki, öz yekun qərarını verməyib".

İndi isə bir neçə gün öncə yayılan məlumata nəzər salaq:

"Bütün bunlara baxmayaraq, yaradıcılıq prosesindəki nöqsanların getdikcə çoxaldığı, həmçinin konkret saxtakarlıqların olduğu dəqiqləşdirildikdən sonra verilişin yayımının dayandırılmasına qərar verilib. Daha sonra verlişin hazırlanmasında iştirak edən bütün heyət kanaldan xaric edilib".

Apardığımız araşdırma nəticəsində məlum olub ki, "Səni axtarıram"ın 2014-cü ilə qədər olan heyətindən hazırda ATV-də 10-a yaxın əməkdaş (adlarını yazmağı lazım bilmirik-İ.V.) çalışır.

Sözügedən məsələylə bağlı ATV kanalı Ölkə.Az-ın sorğusunu cavablayıb:

"ATV kanalının 2015-ci ildə "Səni Axtarıram" verilişi ilə bağlı ortaya çıxan xoşagəlməz prosesdə mətbuata verilən açıqlama ilə bir neçə gün öncəki açıqlaması arasındakı məntiqi əlaqəsizliyi iddia etmək yanlışdır. 2015-ci ildən 2016-cı ilə qədər xeyli vaxt kəsiyi var ki, o müddət ərzində ATV-yə çoxları gəlib, çoxları gedib. Gedənlərin içərisində həm də tam tərkibdə "Səni Axtarıram" verilişinin aparıcısının kadrları olub. Bu o demək deyil ki, məlum verilişdə işləmiş texniki işçilərdə yaradıcı heyətə daxil idilər. Konkret bəyan edirik ki, məhz indi ortaya çıxarılan faktlar səbəbi ilə "Səni Axtarıram" heyətinin hamısı bir nəfər kimi ATV-dən xaric edilib. Sonradan verilişin aparıcısı ilə öz komandası arasında nələr yaşanıb, bax bu əsl araşdırma mövzusu olmalıdır. Çünki ATV kanalı üçün də müəmmalı qalan bəzi məqamlar var. O məqamların araşdırılması üçün artıq müvafiq dövlət qrumuna müraciət edilib. Düşünürük ki, hüquqi müstəvidə və qanuni araşdırma aparılacaq həqiqi pravakatorlar tapılacaq və bununla bağlı ictimaiyyət məlumatlandırılacaq".

İntiqam VALEHOĞLU
Ölkə.Az