Azərbaycanlı müğənni: "Boşanandan sonra..."

- Əvvəl daha qapalı geyinməyinizə baxmayaraq, indi artıq sizi mini geyimlərdə, şortlarda və daha açıq-saçıq geyimlərdə görürük. Bu dəyişikliyin səbəbi nədir?

- Tərzimi dəyişməyimin ən böyük səbəbi mənim arıqlamağım oldu. Artıq çəkilərim üzündən bunları geyinə bilmirdim. Çünki uşaqlıqdan mən mini geyimlər, şortlar geyinmişəm. Çəki sonra mənə mane oldu. Amma artıq tam arıqladıqdan sonra düşündüm ki, ürəyim istəyən şeyi geyinməyin zamanı gəlib çatdı. Həyat tərzimin dəyişməsi də geyimlərimə təsir etdi. Geyim tərzimə əhval-ruhiyyəmin necə olması da təsir edir. Qadağalar isə heç vaxt olmayıb. Nə yoldaşım, nə də valideynlərim tərəfindən geyimimə qarışan olmayıb. Onlar bilirlər ki, hara nə geyinmək lazımdır, dərk edirəm. Ona görə də rahatdırlar.

- Özünüzü cazibədar xanım hesab edirsiniz?

- Bəli, hesab edirəm. Mən deyə bilmərəm ki çox gözəl qadınam. Nə də ki, ideal deyiləm. Amma cazibədaram. (gülür) Şəxsən mənə görə cazibədar olmaq, gözəl olmaqdan önəmlidir. Məsələn baxarsan ki, bir gözəl xanımdır, burun, qaş, gözlər, sima, fiqura hər şey qaydasında, amma diqqət çəkmir. Biri də var, bunların heç biri xanımda yoxdur, amma cazibəlidir. Bu həm də sənin verdiyin enerjidən asılıdır. Mən belə düşünürəm.

- Cazibədar və gözəl olmaq üçün müəyyən məbləğdən keçmək gərəkdir. Nə qədər məbləği “qurban” edirsiniz?

- Gündəlik olaraq saç və makiyajı özüm edirəm. Hər iki gündən bir efirlərim olduğu üçün sözsüz ki, salonlara müraciət edirəm. Salonlar da sənət adamlarına güzəştə gedirlər. Bu baxımdan çox rahatam. Ən çox pulum isə geyimə gedir. Mən geyinməyi çox sevirəm. Elə vaxt olur ki, 1 geyim almaq üçün mağazaya girirəm, çıxanda 10-15 dolu çanta ilə çıxıram. (gülür) Şoppinqdən özümü saxlaya bilmirəm. Xərclərdən danışmağı isə özümə uyğun bilmirəm. Günlük xərcim heç də az deyil. Aktiv həyat tərzini çox sevirəm. Dostlarımla əylənməyi, gün ərzində hansısa məkana gedib oturmalıyam və s. bunlar mənim üçün çox önəmlidir. Ona görə də xərclərim çoxdur.

- Bəs, bu məbləği necə qarşılayırsınız?

- Deyə bilmərəm ki, sənətdən elə də çox qazanıram filan. Sənətin gəliri ilə qarşılamıram. Ailəmin böyük dəstəyi var. Valideynimin və qardaşlarımın sayəsində deyək.

- Uşaq vaxtı çox nağıl eşitmisiniz, yəqin ki... Sizə indi də “nağıl” danışanlar var?

- (gülür) Bu sual mənim çox xoşuma gəldi. Bəli, indi də nağıl danışanlar var. Sözsüz ki, biz də çox “diqqətlə” qulaq asırıq. İnanırmışıq kimi edirik. Özümüzü elə aparırıq ki, guya o, düz deyir. Nağıla sonacan qulaq asırıq. Nağıl danışanı da qırmaq istəmirəm ki, qoy danışsın. Amma öz bildiyimizi edirik. Mən belə şeyə çox fikir verən deyiləm. Həyata bir dəfə gəlirik. Heç kimin qəlbinə dəymək istəmirəm. Onsuz da bu dünyadan köçəndə özümüzlə heç nə aparmırıq. Əgər, apara bilsəydim, özümlə qızıllarımı aparardım. O qədər qızıllarım itib, oğurlayıblar ki..

- Yoldaşınızla bir müddətdir ayrılmısınız. Münasibətiniz qalıbmı?

- Bəli, danışırıq. Münasibətimiz qalıb. Övladını nə zaman görmək istəyərsə, mən ona icazə verərəm. Mən övladımın sağlam düşüncədə böyüməsini istəyirəm. Ayrılmağımıza baxmayaraq onunla görüşürük, uşaq haqqında müzakirələr edirik. Dostluq münasibətlərimizi saxlayırıq. Ayrılmağa səbəbi isə heç yerdə deməmişəm. İndi də deməyəcəm. Amma söz verirəm ki, ilk sizin sayta deyəcəm. Çünki indi demək lazım deyil. Nə özümü hazır görürəm, nə qarşı tərəfi. Ona görə bunun səbəblərini keçirəm. Həmin məqam yetişəndə danışacam.

- Bəzi məlumatlara görə sizi xəyanət ayırıb.

- Xeyr. Xəyanət üzündən ayrılmamışıq. Bu cür əsassız söyləntilər çox yayılıb. Və bunlar da məni əsəbləşdirir. Hər kəs həyatda səhv edə bilər. Səhvlər oldu və ayrıldıq. Qərara gəldik ki, bir-birimizə ziyan vurmadan münasibətimizə son qoyaq. Onunla 7 il birlikdə oldum. Bu illər üçün peşman deyiləm. İnşallah ikimiz də xoşbəxt olarıq.

- Lətifə sevərkən necə biri olur? Çılğın sevir, ya sakit təbiətlidir?

- Yox mən sakit sevə bilmirəm. Çox çılğınam. Ailə quranda heç düşünmürdük ki, ayrılacağıq. Çox sevirdik. Amma elə olur ki, bu addımı atmağa məcbur qalırsan. Mən dəhşətli dərəcədə çox sevə bilərəm. İlk baxışda bir insan mənim gözlərimi tuta bilərsə, mən onu çox sevə bilərəm. Sevərkən özümdən çox qarşımdakı insanı düşünürəm. Hər şeyin onun üçün yaxşı olmasını istəyərəm. Onun üçün isti münasibət yaratmağa çalışaram. Ayrılıq zamanı depressiyaya düşdüm. Amma çalışdım ki, bunu kimsəyə göstərməyim. Amma zaman keçdikcə bütün yaralar sağalır. Hiss etsəm ki, depressiyaya düşürəm, o an nə lazımdır edirəm. Tez bir əyləncə məkanına gedirəm, musiqi ilə ruhumu qidalandırıram, səhərə kimi rəqs edirəm. Günə pozitiv enerji ilə başlamağa çalışıram.

- Ayrılandan sonra sizə sevgi mesajları, evlilik təklifləri gəlməmiş olmaz...

- Standart və ciddi fikirlərlə mənə yanaşan insanlar çox oldu. Bəli, milyoner biznesmenlər, yaxşı məkanları tutan şəxslərdən çox eşq təklifləri aldım. Amma mənə nəyinsə qarşılığında kiminləsə birlikdə olmaq lazım deyil. Mənim necə bir ailədən olmağım bilinir. Heç nəyə ehtiyacım yoxdur.

- Aktrisa olmaq kimi arzunuz var?

- Bəli, var. Dram janrında olan filmdə rol almaq istəyərəm. Dram olsa, hər halda içində də sevgi olacaq. Sevgi dolu insanam. Mahnılarımda da drama üstünlük verirəm. Digər rollarda da oynayaram. Yüksək qonorar qarşılığında ssenari uyğun olarsa, erotik səhnəli filmə çəkilərəm. Təbii ki, filmdən də çox şey asılıdır. Əgər sən aktrisalığı qəbul edib filmə “hə” deyirsənsə, o rolu çirkin yox, gözəl bir şəkildə təqdim etməyi bacarmalısan.

- Sənətdən iyrəndiyiniz vaxtlar olub?

- Bəli, olub. Əslində sənətdən yox, münasibətlərdən iyrənirəm. Qeyri-səmimi insanlar çoxdur. Efir başlayanda hamı bir-biri ilə səmimi olur, deyir-gülür, amma efir bitəndən sonra sifətləri çevrilir. Bunlardan iyrənirəm. Sənət yoldaşlarımdan bir xahişim olacaq. Efirdə sənət yoldaşlarınızdan kimsə oxuyanda arxada fikrinizi başqa səmtə yönəltməyin, telefonda qurcalanmayın, diqqətinizi ona yönəldin. Belə daha yaxşı olar.

- Sənət barədə nə yenilikləriniz var?

- Yeni mahnı üzərində işləyirik. Artıq sona çatmışıq. Az müddət sonra işıq üzü görəcək. Mahnıdan sonra isə klip çəkilişlərimiz olacaq. Bir sevdiyim mahnım var. Onu az-az oxuyuram, klip üçün saxlamışam. Yeni fotosessiyalarım da olacaq. Bununla yanaşı albomum da təbii ki təqdim olunacaq. Və sonda istəyərəm ki, yay ərəfəsində konsertim olsun. Düşünürük hələ ki.

- Sosial şəbəkələrdə haqqınızda tənqid xarakterli nəsə yazılanda reaksiyanız necə olur?

- Normal qarşılayıram. Hər kəsin öz fikri var. Hər kəs hər kəsi sevə bilməz axı. Fikirlərinə hörmət edirəm. Çalışıb öz işlərimlə onların fikirlərini dəyişməliyəm. Elə müğənnilər var ki, heç onlar haqda heç nə yazılmır. Bu da o deməkdir ki, onu tanımırlar. Demək ki, məni tanıyırlar, nəsə yazırlar. Bu da böyük şeydir.